Gaˇ kawˆ 15
Aˬ jeˬ miˇ neh Yeˬhawˇbaˬ-euˬ gaˇ kawˆ-ahˇ, dzaw daˆ leꞈ paˬ-ehˇ g’eh-eu nga?
1. Jaˇliꞈ dzaw daˆ leꞈ naˇ, nawˬ-euˬ g’aˇ duˬ aˬ jeˬ muiˬ-eu nga?
Jaˇliꞈ laꞈ k’oeˇ-euˬ gaˇ kawˆ uˬ dzah yaw huiˬ deuˬ-ahˇ shaˇ sawˇ haw ngeh jawˇ, nawˇ Yeˬhawˇbaˬ-ahˇ gaˬ-eu nui gaˬ myaˬ dzehˬ laˇ-eu meh. Teu miˇ neh, nui gaˬ heu hmˬ-ahˇ yaw muiˬ paˬ-ehˇ laˆ saˆ daˆ leꞈ-eu loˬ meh. (1 Beˬtuˆluˆ 2:2) Nawˬ-euˬ dehꞈ ziˇ noeˬ tmˬ-eu jeˬ naˇ, Jaˇliꞈ-ahˇ dzaw geuꞈ-awˇ, mˇ caw-eu hawˇ-eu maˬ mˇ caw-eu gaˇ iˇ-eu tehꞈ meh.—Yoˇhaˬ 17:3; Yuˇdaˆ 21-ahˇ gui-awˬ.
Miˬyehˇ-euˬ gaˇ kawˆ ngehˬ-ehˇ siˬ nya laˇ naˇ ngehˬ-ehˇ, jah-eu jeˬ ziꞈ laˇ-eu meh. Jah jeˬ heu naˇ, nawˇ Miˬyehˇ nui ma tsaˬ-eu jeˬ-ahˇ mˇ nya ni caw ba nehˬ-eu meh. (Heˬbyehˇ 11:1, 6) Jah-eu jeˬ-aˬ, nawˬ-euˬ dehꞈ jeˬ dehꞈ kawˆ bi paˇ laˇ nya-awˇ, dehꞈ ziˇ gaˇ ma yaw muiˬ kahˇ-ahˇ cah nya ni caw ba nehˬ laꞈ-eu meh.—G’aˬk’ehˇ 3:19-ahˇ gui-awˬ.
2. Nawˬ neh siˬ nya-euˬ Miˬyehˇ-euˬ zaˬ siˬ nui gahˇ, aˬ cawˬ-ahˇ gaˇ dahˇ tsoeˬ ni aˬ joˆ-ehˇ zmˬ nmˇ?
Yeˬhawˇbaˬ nehˬ-ehˇ, ziꞈ dah ni cawˬ cawˬ-eu jeˬ-ahˇ za nya meh.
Nawˬ neh ya siˬ nya-euˬ muiˬ-eu gaˇ kawˆ, aˬ cawˬ-ahˇ ehˇ nehˬ mawꞈ tehꞈ-a. Nawˇ Jaˇliꞈ dzaw daˆ leꞈ ngeh jawˇ, muiˬ-eu gaˇ kawˆ hawˇ-eu Yeˬhawˇbaˬ-ahˇ nawˇ jah luꞈ-eu gaˇ kawˆ deuˬ, aˬ cawˬ-ahˇ ja mehˬ nehˬ ngeh g’oˆ shaw leˇ ni, Jaˇliꞈ-ahˇ aˬ joˆ-ehˇ ya zmˬ-eu lehˇ k’awꞈ, nawˬ-ahˇ siˬ nya laˇ-eu meh.—Loˇmaˆ 10:13-15-ahˇ gui-awˬ.
Tsawˇ haˬ myaˬ ni muiˬ-eu gaˇ kawˆ-ahˇ tsaꞈ gaˬ ngeh, yawˬ ha-euˬ yuiꞈ nyiˇ hawˇ-eu cawˬ deuˬ-ahˇ neh dahˬ beh-eu meh. Ehˇ k’awꞈ aˬ yawꞈ jeˬ-ahˇ aˬ yawꞈ ya haw-eu meh. Aˬ yawꞈ maꞈ jah luꞈ-eu jeˬ-ahˇ maˬ tsaˬ nga lehˇ maˬ ehˇ ni, Miˬyehˇ neh saˇ jaˇ dzaˬ taˬ-euˬ gaˇ kawˆ deuˬ-ahˇ ehˇ nehˬ-eu tsaˬ meh. K’oeˇ naˆ maˬ tseˇ noeˬ taˬ paˬ-ehˇ g’eh-eu jeˬ naˇ, tsawˇ haˬ zaˬ deuˬ-aˬ, dawˬ ngehˬ gaˇ naˆ maˬ tseˇ mˇ gaˇ shaˇ gaˇ haw-eu meh.—2 Tiˆmoˇseˬ 2:24, 25-ahˇ gui-awˬ.
3. Miˬyehˇ nehˬ-ehˇ aˬ joˆ-ehˇ cawˬ cawˬ nmˇ?
Miˬyehˇ-euˬ dawˬ dzaw-eu heu naˇ, nawˬ-euˬ nui jah g’aˬ k’aˆ laˇ-eu meh. Uˬ duˬ duˬ leˇ ngeh, Yeˬhawˇbaˬ nehˬ-ehˇ cawˬ cawˬ-eu jeˬ ziꞈ dah ni pyeuꞈ laˇ-awˇ, Miˬyehˇ nymˇ jiˇ laꞈ k’oeˇ-euˬ tsawˇ haˬ tiˬ g’aˬ pyeuꞈ laˇ nya-eu meh.—2 Gawˇliˬtu 6:18-ahˇ gui-awˬ.
4. Miˬyehˇ-euˬ zaˬ siˬ nui gahˇ paw huiˬ laˇ ni, aˬ joˆ-ehˇ jahˇ nmˇ?
Jaˇliꞈ-ahˇ paˇ dzaw daˆ leꞈ-eu baˬ da neh, Miˬyehˇ-euˬ zaˬ siˬ nui gahˇ paw huiˬ laˇ mahˇ laˇ-eu meh. (Heˬbyehˇ 5:13, 14) Jaˇliꞈ aˬ dui-ahˇ aˬ jeˬ mehˬ-eu nga? lehˇ ehˇ-eu paˇ dmˬ hawˇ-eu Jaˇliꞈ-ahˇ dzaw geuꞈ-eu g’aˇ duˬ, Yeˬhawˇbaˬ Saˇ kiˇ tiˬ g’aˬ paˬ-ahˇ kuˇ nya meh. Jaˇliꞈ gaˇ kawˆ ngehˬ-ehˇ siˬ nya laˇ naˇ ngehˬ-ehˇ, laꞈ k’aˬ cehˇ nui saˇ oꞈ-eu jeˬ za-eu yaw duˬ baw meh.—Ja ceuˬ 1:1-3; 73:27, 28-ahˇ gui-awˬ.
Muiˬ-eu gaˇ kawˆ heu-aˬ, laꞈ k’aˬ cehˇ-eu Yeˬhawˇbaˬ jawˇ gaˇ neh oe-euˬ meh. Miˬyehˇ-ahˇ uˬ duˬ tahˬ-eu deuˬ nehˬ-ehˇ nawˇ cawˬ cawˬ ngeh jawˇ, Miˬyehˇ-euˬ dawˬ peh jiˆ peh laˇ-eu jeˬ pyeuꞈ-eu meh. (Heˬbyehˇ 10:24, 25) Nawˇ Yeˬhawˇbaˬ nui k’ahˇ shiˇ-eu jeˬ-ahˇ mˇ daˆ leꞈ naˇ, mˬ maˬ maˬ byaˆ zaˇ ziˇ dehꞈ-eu jeˬ-ahˇ za-eu meh. Miˬyehˇ dawˬ peh peh leˇ ni mˇ-eu heu naˇ, nawˬ-euˬ dehꞈ ziˇ-ahˇ mˇ nya-eu yaw myaˬ jeˬ laꞈ k’oeˇ neh muiˬ dzehˬ-eu jeˬ pyeuꞈ meh.—1 Tiˆmoˇseˬ 1:11; 6:19-ahˇ gui-awˬ.
You May Also Like
Mehˬ bawˬ
Miˬyehˇ Miˇkʼahˬ Bawˬdzaˬnymˇ˗ahˇ nga maꞈ aˬ jeˬ jeˇ jahˇ˗eu nga?
Nawˇ yawˬ haˇ yawˬ ha haw mawˇ le˗awˬ.
Nga maꞈ nehˬ˗ehˇ taꞈ˗eu
Aˬ dui aˬ jeˬ miˇ neh Jaˇliꞈ dzaw paˬ˗ehˇ gʼeh˗eu nga?—Tiˬ byah
Miˇ kʼahˬ doe ni jawˇ˗eu tsawˇ haˬ gʼawˬ mya lam gʼaˬ, Jaˇliꞈ˗ahˇ neh dehꞈ ziˇ laꞈ kʼoeˇ aˇ yeˇ huiˬ˗eu gaˇ kawˆ deuˬ˗ahˇ ya siˬ˗euˬ meh. Nawˬ˗ahˇ jiˇ siˬ nya mawꞈ miˇ˗a laˬ?
