Ulian malajahin ajahan dasar Cakepan Suci, tresna baktin ragané tekén Yehuwa bisa ngancan kuat. Ento merluang utsaha. (1 Petrus 2:⁠2) Harapan idup langgeng ragané, tergantung apaké ragané terus paek ajak Ida ulian seleg malajahin Sabdan Idané.​—Baca Yohanes 17:3; Yudas 21.

Disubané pengetahuan ragané unduk Tuhan matumbuh, kapracayané bisa ngancan nguatang. Kapracayané ento bisa ngranaang ragané nyenengang Ida. (Ibrani 11:​1, 6) Ento bisa ngaénang ragané mabalik uli dosa-dosan ragané lan ngaé perubahan ané maguna di kaidupané.​—Baca Pamargin Parautusan 3:⁠19.

Biasané, ragané pasti makita ngorahin anak lénan unduk apa ané suba kaplajahin​—⁠iraga ajak makejang seneng nyritaang orti luungé ené. Krana ragané terus malajah, ragané lakar nawang carané nganggon Cakepan Suci buat nyelasang kapracayaan ragané unduk Yehuwa lan orti luungé ento.​—Baca Roma 10:​13-​15.

Liunan anaké mulai nyritaang orti luungé ené tekén timpal-timpalné utawi nyama-nyamané. Nanging patutja bijaksana. Tinimbang ngorahang agaman anaké tusing beneh, luungan critaang dogen janji-janjin Tuhan. Ingetangja, biasané anak-anak lénan lakar terkesan ajak laksanan ragané ané luung bandingang tekén omongan.​—Baca 2 Timotius 2:​24, 25.

Malajah Sabdan Ida bisa ngewantu ragané apang paek ajak Tuhan. Dadiné, ragané bisa ngelah hubungan ané istimewa ajak Yehuwa. Ragané lakar dadi gelah Ida lan bisa dadi anggota kluargan Ida.​—Baca 2 Korintus 6:​18.

Ragané bisa ngelah hubungan ané ngancan luung ajak Ida yéning ragané terus malajahin Sabdan Idané. (Ibrani 5:​13, 14) Palajahinja Cakepan Suci ajak Saksi-Saksi Yehuwa nganggo buku ané majudul Apa yang Bisa Kita Pelajari dari Alkitab? Ngancan liu ragané malajahin Sabdan Ida, idup ragané lakar ngancan bagia.​—Baca Kidung 1:​1-3; 73:​27, 28.

Orti luung asalné uli Yehuwa, Widi ané bagia. (1 Timotius 1:​11, Terjemahan Dunia Baru) Ragané bisa ngancan paek ajak Ida yéning nyak mapunduh ajak umat Idané. (Ibrani 10:​24, 25) Yening terus ngutsahayang nyenengang atin Ida Yehuwa, ragané lakar bisa maan idup ané sujati​—⁠idup langgeng. Tusing ada tetujon lén ané luungan tekén ngelah hubungan ané luung ajak Ida.​—Baca 1 Timotius 6:​19.