LEKSION 15
Taano ta Maninigo na Padagos Kang Mag-adal?
1. Paano ka makikinabang sa padagos na pag-adal sa Biblia?
Daing duda na napakosog an pagkamoot mo ki Jehova huli sa pagkaigwa nin pangkagabsan na pakasabot sa pundamental na mga katokdoan sa Biblia. An pagkamoot na ini kaipuhan na danay na pataluboon. (1 Pedro 2:2) An saimong paglaom na buhay na daing katapusan nakadepende sa padagos mong pagrani sa Dios paagi sa pag-adal sa Tataramon nia.—Basahon an Juan 17:3; Judas 21.
Mientras na nagtatalubo an kaaraman mo dapit sa Dios, magigin mas makosog man an pagtubod mo. An pagtubod makakatabang sa saimo na paogmahon sia. (Hebreo 11:1, 6) Papahiroon ka kaiyan na magsolsol asin gumibo nin kapakipakinabang na pagbabago sa pamumuhay mo.—Basahon an Guibo 3:19.
2. Paano makikinabang an iba sa kaaraman mo dapit sa Dios?
Puede kang magkaigwa nin espesyal na relasyon ki Jehova
Natural sana na gusto mong sabihon sa iba an nanonodan mo—gabos kita naoogmang magsabi nin maogmang bareta. Mantang padagos kang nag-aadal sa Biblia, manonodan mo kun paano iyan gagamiton sa pagpaliwanag dapit sa pagtubod mo ki Jehova asin sa maogmang bareta.—Basahon an Roma 10:13-15.
An kadaklan minapoon paagi sa pagsabi kan maogmang bareta sa mga katood o paryente. Magin mataktika. Imbes na sabihon na sala an relihion ninda, sabihon an dapit sa mga panuga nin Dios. Siring man, girumdomon na an mga tawo parateng mas napapahanga sa maboot na paggawe imbes na sa sinasabi mo.—Basahon an 2 Timoteo 2:24, 25.
3. Anong klaseng relasyon sa Dios an puede mong makamtan?
An pag-adal sa Biblia makakatabang sa saimo na tumalubo sa espirituwal. Pag-abot nin panahon, puede kang magkaigwa nin espesyal na relasyon ki Jehova. Puede kang magin kabilang sa pamilya nia.—Basahon an 2 Corinto 6:18.
4. Paano ka puedeng padagos na umoswag sa espirituwal?
Iyan paagi sa padagos na pag-adal sa Biblia. (Hebreo 5:13, 14) Makiolay sa sarong Saksi ni Jehova na tokdoan ka gamit an librong Ano an Itinutukdo Sato kan Bibliya? Mientras na mas dakol kang nanonodan sa Biblia, mas magigin mapanggana an buhay mo.—Basahon an Salmo 1:1-3; 73:27, 28.
An maogmang bareta hale ki Jehova, an “maogmang Dios.” (1 Timoteo 1:11, NW) Ika orog na magigin harani sa saiya paagi sa orog na pagrani sa banwaan nia. (Hebreo 10:24, 25) Paagi sa padagos na paghihingoang mapaogma sia, pinagmamaigotan mong makamtan an tunay na buhay—buhay na daing katapusan. An pagigin harani sa Dios an pinakamarahay na magigibo mo.—Basahon an 1 Timoteo 6:19.
Puwede Mo Man Magustuhan
MANUNGOD SAMO
Ta’no ta Kaipuhan Mag-adal nin Bibliya?
Sinisimbag kan Bibliya an importanteng mga hapot sa buhay kan minilyon na tawo sa bilog na kinaban. Gusto mo daw magin saro sa sainda?
