ISAMBILILO 15
Mulandu Nshi Mufwile Ukutwalilila Ukusambilia Baibolo?
1. Busuma nshi bukafumamo nga mwatwalilila ukusambilila Baibolo?
Ukwabula no kutwishika, aya amasambililo mwabalilapo ukusambilila mu Baibolo nayalenga ukuti mutemwe sana Yehova. Pa kuti uku kutemwa kutwalilile, mufwile ukulacitapo fimo. (1 Petro 2:2) Nga mulefwaya ukuba no mweo wa muyayaya, mufwile ukutwalilila ukulapalama kuli Lesa ukupitila mu kusambilila Icebo cakwe.—Belengeni Yohane 17:3; Yuda 21.
Ilyo muletwalilila ukwishibilapo na fimbi pali Lesa, icitetekelo cenu ca kulakoselako kabili mukalasekesha Lesa. (AbaHebere 11:1, 6) Cikalenga mukalapile ku membu shenu no kwalula imibele yenu.—Belengeni Imilimo 3:19.
2. Bushe ifi mwishibe Lesa, mukacitapo shani?
Kuti mwapepa ipepo lya kuipeela kuli Yehova no kuba icibusa cakwe ica pa mutima
Mu cifyalilwa fye, tulatemwa ukwebako bambi ilyashi ilisuma, na imwe bene kuti mwatemwa ukulaebako bambi ifyo mulesambilila. Nga mwakonkanyapo ukusambilila Baibolo, mukeshiba ifya kubomfya Baibolo pa kulondolwela bambi ifyo mwasuminamo pali Yehova na pa mbila nsuma.—Belengeni Abena Roma 10:13-15.
Abantu abengi batendekelapo ukushimikila imbila nsuma ku banabo nelyo kuli balupwa. Ilyo mulebashimikila, mulingile ukuba abacenjela. Ukucila ukubeba ati imipepele yabo ya bufi, bebeni fye pa fyo Lesa atulaya. Na kabili, muleibukisha ukuti ilingi line imibele yenu iisuma e ingalenga abantu ukukutika ukucila ne fyo mwingalanda.—Belengeni 2 Timote 2:24, 25.
3. Bushe cibusa ca musango nshi mukakwata na Lesa?
Ukusambilila Icebo ca kwa Lesa kukalenga ukuti mukeshibe ifingi pali Lesa. Umuye nshiku, Yehova akaba cibusa wenu uwa pa mutima. Na kuba kuti mwaingila mu lupwa lwakwe no kuba umwana wakwe.—Belengeni 2 Abena Korinti 6:18.
4. Kuti mwacita shani pa kuti mutwalilile ukwishibilapo na fimbi?
Kuti mwaishiba sana Lesa nga mwatwalilila ukusambilila Icebo cakwe. (AbaHebere 5:13, 14) Kuti mwaeba Inte sha kwa Yehova pa kuti balesambilila Baibolo na imwe ukubomfya icitabo citila, Bushe Cinshi Baibolo Isambilisha? Nga mwatwalilila ukwishibilapo na fimbi ifyaba mu Cebo ca kwa Lesa, e lyo mukekala bwino.—Belengeni Amalumbo 1:1-3; 73:27, 28.
Iyi mbila nsuma ifuma kuli Yehova, Lesa wa nsansa. Kuti mwapalama kuli ena nga mulesangwa na bantu bakwe. (AbaHebere 10:24, 25) Nga mwatwalilila ukuibikilishako ukulasekesha Yehova, mukaba ne subilo lya kwisakwata umweo wine wine, e kutila, umweo wa muyayaya. Ukupalama kuli Lesa e cintu icawamisha ico mulingile ukucita.—Belengeni 1 Timote 1:11; 6:19.
Nalimo Kuti Mwatemwako ne fi
PA NTE SHA KWA YEHOVA
Mulandu Nshi Mulingiile Ukusambilila Baibolo?
Mu Baibolo mwaliba ifyasuko ku mepusho yacindama ayo abantu abengi pano calo bakwata. Bushe na imwe kuti mwatemwa ukusanga amasuko ku mepusho mwakwata?
