Sanggah hita marlajar pasal parlajaran na parlobei sahali, tontu ai mambahen holong ni Nasiam lambin orot bani Jahowa. Holong on porlu totap ipupuk. (1 Petrus 2:2) Boi do Nasiam mandapot hagoluhan na sadokah ni dokahni anggo Nasiam marusaha gabe hasoman ni Naibata anjaha marlajar bani Bibel.​—Basa Johannes 17:3; Judas 21.

Anggo roh buei ni pambotoh Nasiam pasal Naibata, haporsayaon Nasiam lambin gogoh. Marhitei haporsayaon, Nasiam boi pasonangkon Naibata. (Heber 11:1, 6) Haporsayaon ai boi mangojur Nasiam ase mubah anjaha marparlahou na dear ibagas goluh Nasiam.​—Basa Lahoan ni Apostel 3:19.

Tontu Nasiam sihol patugahkon hubani na legan aha na dob iparlajari Nasiam. Hita pe haganupan tontu sonang do patugahkon barita na madear. Anggo pongkut Nasiam marlajar boi do Nasiam gabe pentar mamakei Bibel patorangkon haporsayaon Nasiam pasal Naibata Jahowa pakon barita na madear.​—Basa Rom 10:13-15.

Bahat do hasomanta patugahkon barita na madear parlobei sahali hubani hasoman-hasomanni atap pe hubani kaluarga. Pandei anjaha maruhur ma Nasiam patorangkon, ulang hatahon ugama sidea na kahou, tapi patugah ma janji-janji Naibata hubani sidea. Anjaha porlu idingat, parlahounta na dear gabe hasaksian na jenges marimbangkon aha pe na ihatahon.​—Basa 2 Timoteus 2:24, 25.

Anggo Nasiam marlajar Hata ni Naibata, partonduyon Nasiam pe lambin gogoh. Ujungni, parhasomanan Nasiam pakon Jahowa  lambin orot. Nasiam boi gabe panombahNi na marsada i sab dunia on.​—Basa 2 Korint 6:18.

Nasiam mambahen hamajuan ibagas partonduyon anggo Nasiam pongkut marlajar Hata ni Naibata. (Heber 5:13, 14) Pindou ma hubani sahalak Saksi-Saksi Jahowa ase rap marlajar pakon Nasiam mamakei buku Apa yang Sebenarnya Alkitab Ajarkan? Roh buei ni parlajaran ni Bibel Nasiam, boi do Nasiam marhasil ibagas pargoluhan.​—Basa Psalmen 1:1-3; 73:27, 28.

Barita na madear roh humbani Jahowa, Naibata na martuah. Nasiam boi gabe hasomanNi anggo hombar hubani juak-juakNi. (Heber 10:24, 25) Anggo Nasiam pongkut pasonangkon Naibata, Nasiam boi mandapot hagoluhan na sasintongni aima hagoluhan sadokah ni dokahni. Lang adong tujuan na marmulia marimbangkon marhasoman pakon Naibata.​—Basa 1 Timoteus 1:11; 6:19.