Morokon potonon Tamusi karetary tanon wa moro Jehowah pyny typanatoma su’kusa moro a’pemy’po kareta nenepory ta. Kywo’mikarykon man moro ipyny waitome potome imero (1 Petrus 2:2). Moro i’matypyn amano apyry’se ajataine mojaro awomeparykon man Tamusi auran poko tyse waty epo awaitokome. — Johanes 17:3 ; Judas 21 erubako.

Iru’pyn me Tamusi ukutyry jako o’waine moro anamyikarykon kynepori’tomatan. Moro anamyikarykon ro ajepanotaton Tamusi ety awongatome ajemamyrykon ta (Simosu 11:1, 6). Ajepanotaton ajemamyrykon u’matome irombo morokon yja’wangon ajemerykon ypedakamapotan o’waine. — Apojoma’san 3:19 erubako.

Iporo ro man moro anukutyrykon ekarityry’se mandon : pa’poro irombo kurangonon oka ekary arory kisipynaton. Mojaro Tamusi karetary poko awomeparykon ajepanotaton moro kareta akuru poko, moro anamyikarykon Jehowah poko morokon kurangonon oka kywanokon me man irokon enapa. — Rome 10:13-15 erubako.

Pyime kari’na morokon oka ekari’saton tomorykon wa naine typawanarykon wa enapa. Ajauranarykon te ukutokon. Moro inamyikarykon iporo waty man kykaton te i’waine moro Tamusi wykatopombo poko te erupatoko. Ukutoko enapa kurangon otykon kapyry jako o’waine ituru’san itukano moro ajauranarykon kopo. — 2 Timoteus 2:24, 25 erubako.

Tamusi auran poko awomeparykon ajepanotaton potome awaitokome a’kanano ta. Morombo wyino ro kurano mapyitaton Jehowah maro irombo omory ranaine maita’ton. — 2 Korinte 6:18 erubako.

Moro waponaka awytotokome a’kanano ta mojaro Tamusi Karetary poko awomeparykon man (Simosu 5:13, 14). Aturupotokon o’win Jehowah Ekary Aropone wa ajepanotokome moro kareta Qu’enseigne réellement la Bible ? poko. Mojaro awomepaporykon jako Tamusi auran poko tawa’pore maita’ton ajemamyrykon ta. — 1 Timoteus 4:15, 16 ; Rome 12:2 erubako.

Morokon kurangonon oka ero kareta a’pemy’po ta anene’san Jehowah wyino konosan, mo’ko tawa’pore Tamusi. Eponaka awopyrykon taro mandon mo’karon ety awonganamon ranakaine awopy’sandon (Simosu 10:24, 25). Moro awomikarykon jako Jehowah ety awongatome moro iporono amano taka mysaton moro i’matypyn amano. Moro Tamusi epo naka awairykon iru’pyn roten oty moro man anikapyrykon me. — 1 Timoteus 1:11 ; 6:19 erubako.