GONDO 15
Ngu ku txani u di fanete kuya masoni u gonda to tala ngu Jehovha?
1. Nji txani txi u no txi bhindula ngu kuya masoni u gonda diBhibhele?
Kha ti kanakanisi ti to, ku xolisisa kuwa ka tigondo ta makhato ta diBhibhele ti tsanisile nzila yi u randako Jehovha ngu yona. Lirando lonelo li lava ku sakulelwa. (1 Pedro 2:2) Themba yako ya wutomi wo mbi guma yi emelwa ngu ku ya masoni u tshuketa ka Txizimu ngu ku gonda Dipswi da txona.—Gonda Johane 17:3; Judha 21.
Ku nga ti wuzivi wako ngu Txizimu wu txi kula, likholo lako li na tsana ngutu. Likholo li na ku vhuna ti to u tsakisa Txizimu. (Vahebheru 11:1, 6) Lona li na ku susumeta ku hunduka ni ku maha ku txitxa aku ku fanelako ka wutomi wako.—Gonda Mithumo 3:19.
2. Wuzivi wako ngu Txizimu wu nga va wuyelisa ngu nzila yihi vamwane?
Awe u nga va ni wuxaka wo sawuleka ni Jehovha
Ti tolovelekile ti to u na lava ku gela vamwane ati u nga ti gonda—hotshethu ha ti tsakela ku gela vamwane mahungu a manene. Mbimo yi u simamako u gonda diBhibhele, u na gonda nzila yo di thumisa ati to u txhamusela likholo lako ngu Jehovha ni ngu mahungu a manene.—Gonda Varoma 10:13-15.
Vathu vo tala va khata ngu ku gela vangana vawe ni maxaka awe mahungu a manene. Ti wonele. Makhaloni yo va gela ti to wukhongeli wawe hi nga wa ditshuri, va gele ti Txizimu txi ti thembisako. Kambe u nga divali ti to vathu va tsakiswa ngutu ngu mahanyelo ako a manene i si nga ti u ti wombako.—Gonda 2 Timoti 2:24, 25.
3. U nga tidila ngu wuxaka wuhi ni Txizimu?
Ku gonda Dipswi da Txizimu ti na ku vhuna ti to u kula ngu didhawa da moya. Ngu magwito u nga va ni wuxaka wo sawuleka ngutu ni Jehovha. Ngu ditshuri u nga va txiro txa mwaya wakwe.—Gonda 2 Vakorinto 6:18.
4. U nga ya masoni u kula ngu nzila yihi ngu didhawa da moya?
U nga kula ngu didhawa da moya ngu kuya masoni u gonda Dipswi da Txizimu. (Vahebheru 5:13, 14) Kombela mmwane wa Tifakazi ta Jehovha ti to e gonda ni nawe diBhibhele ngu ku thumisa dibhuku a di di ku khene Bhiblia yi nga hi gondisa txani? Ku nga ti u txiya u txi gonda to tala ka Dipswi da Txizimu ti na ku tsimbilela kwati ka wutomi wako.—Gonda Masalmo 1:1-3; 73:27, 28.
Mahungu a manene ma huma ka Jehovha, Txizimu txi txi nga tsaka. Awe u nga tshuketa kwakwe ngu ku ti tshanganisa ni vathu vakwe. (Vahebheru 10:24, 25) Ngu kuya masoni u ti karatela ku tsakisa Jehovha, u nava u txi ti karatela ku mana wutomi wa ditshuri i ku wutomi wo mbi guma. Ku tshuketa ka Txizimu i mhaka ya lisima ngutu ayi u fanelako ku yi maha.—Gonda 1 Timoti 1:11; 6:19.
Ti nga maha si kutsakisa
ZIVA TATHU
Ngu ku txani hi txi gonda diBhibhele?
DiBhibhele di ningela tixamulo ta siwotiso sa lisima ka wutomi ka timilioni ta vathu ka madhawa otshe a mafuni. Ina wa ti tsakela kuva mmwane wa vona?
