Lai Siangtho thugil na sinte, le-etkik lecin Jehovah tung na itna hong kip ding hi. Tua itna na pattah suak ding a kul hi. (1 Peter 2:2) Nang ii tawntung nuntak lametna pen Lai Siangtho sin a, Pasian tawh na kinaih semsem na’ng na hanciamna tawh kisai hi.—Johan 17:3; Jude 21 na sim in.

Pasian na theihna a khantoh mah bangin na upna zong hong khauh ding hi. Upna in Pasian lungsim tawh na kituak na’ng hong huh ding hi. (Hebru 11:1, 6) Tua bannah na nuntaak dan zong kisiikin hong kikhelsak ding hi.—Sawltak 3:19 na sim in.

Natheihsa thute midangte kiang gen nuam ding hi teh. A lungdamhuai thu ahih leh kigen nuam hi. Lai Siangtho na sinsuak kawmin Jehovah leh a lungdamhuai thu tawh kisai na upnate na gen ciangin Lai Siangtho bangci zatding cih thei ding hi teh.—Rom 10:13-15 na sim in.

Mi a tamzawin a kinaipihte, a lawmte kiang a lungdamhuai thu gen kipan uh hi. A upnate uh khial hi, ci-in gen ken la, pilvang takin Pasian’ ciamsa thute bek na gen in. Na theih ding khatah, na thu gente sangin migi-a na gamtatdante na enzaw uh, cih na phawk in.—2 Timoti 2:24, 25 na sim in.

Lai Siangtho na sinna in Pasian tawh hong kinaisak zaw ding hi. A zomah Jehovah tawh kilawmtaakna na ngah ding hi. Pasian’ innkuanpih dingin ama’ neihsa na hi ding hi.—2 Korin 6:18 na sim in.

Lai Siangtho sinsuak le cin Pasian thu ah khangto suak ding hi teh. (Hebru 5:13, 14) Lai Siangtho In Bang Hong Sinsak A Hiam? cih laibu tawh sinkhawm dingin Jehovah Tecite khat na ngen in. Pasian’ Kammal thei semsem le cin lawh cing semsem ding hi teh.—Late 1:1-3; 73:27, 28 na sim in.

A lungdamhuai thu pen a lungdam Pasian Jehovah kiangpan hongpai hi. Pasian a bia mite tawh na kilawmta le teh, Pasian tawh kinaih zaw ding hi teh. (Hebru 10:24, 25) A lungsim tawh kituakin na hanciam suak leh tawntung nuntakna na ngah ding hi. Pasian tawh kinaih ding na bawlna pen na sep khempeuh lakpan a hoihpen a sem na hi hi.—1 Timoti 1:11; 6:19 na sim in.