Ovyo wa kushonga mumbapira yino vya pameka shihoro shoye kwaJehova. Ghuna hepa kutwikira kupameka shihoro osho. (1 Petrus 2:2) Ntjene ghuna shana kukawana monyo wanaruntje, ghuna hepa kutwikira kupameka uholi ghoye naKarunga pakukushonga Nkango dendi.​—Varura Johannes 17:3; Juda 21.

Ntjene ngau twikire kukushonga kuhamena Karunga, lipuro lyoye ngali pama. Lipuro ngali ku vatera ghu hafite Karunga. (Heberi 11:1, 6) Ntani lipuro ngali kuvatera ghu kushighure nakutura po marunduruko muliparu lyoye.​—Varura Virughana 3:19.

Natuvantje kwa shana kutantera ko vapeke vininke ovyo twa yuva. Ntjene ngau twikire kukushonga Bibeli, ngau yiva kufatwilira vapeke kuhamena Jehova nambudi yayiwa.​—Varura Varoma 10:13-15.

Shingi shavantu kutameka kutantera ko mbudi yayiwa vakaliro navaunyavo. Ngoli, virughane nandunge. Kapishi ghushwaure lipuliro lyavaunyoye, ngoli va tantere ko matwenyedero ghaKarunga. Una hepa kuyiva ashi, vantu kuvakoka nkalito yetu yayiwa kupitakana ovyo twa va tanteranga.​—Varura 2 Timotheus 2:24, 25.

Kukushonga Nkango daKarunga ngavi ku vatera ghu mu yive nawa. Makura uholi ghoye naJehova ngau pama. Ntani ngau hama kulipata lyendi.​—Varura 2 Kolinte 6:18.

Pakutwikira kukushonga Nkango daKarunga. (Heberi 5:13, 14) Pura umwe waMbangi daJehova a kushonge Bibeli pakurughanita mbapira, Yisinke azi rongo Bibeli? Ntjene ngau kutura mo ngudu mukukushonga Nkango daKarunga, ngau wana ruhafo muliparu.​—Varura Pisalme 1:1-3; 73:27, 28.

Mbudi yayiwa kwatunda kwaJehova, Karunga waruhafo. Ntjene ngau hamene kumbunga yendi, nga kara muholi ghoye. (Heberi 10:24, 25) Likuturomo lyoye ngali hafita Jehova, makura ngau yenda mundjira yakutwara kumonyo wanaruntje. Uholi naKarunga kuna kara shininke shamulyo po ngudu.​—Varura 1 Timotheus 1:11; 6:19.