Nnyịn imekere ke se ikpepde ke ekpri n̄wed emi anam fi etetịm ama Jehovah. Inaha ayak ima emi ebịt. (1 Peter 2:2) Edieke oyomde ndidu uwem ke nsinsi, ana afo aka iso asan̄a ekpere Abasi ke ndikpep Ikọ esie.​—Kot John 17:3; Jude 21.

Nte afo akade iso ndikpep n̄kpọ mban̄a Abasi, mbuọtidem fo oyokpon. Mbuọtidem emi ayanam enem Abasi esịt. (Mme Hebrew 11:1, 6) Enye n̄ko ayanam fi akabade esịt onyụn̄ odu uwem emi ọfọnde.​—Kot Utom 3:19.

Edinenem fi nditịn̄ se ekpepde nnọ mme owo sia esinenem kpukpru nnyịn ndibụk eti mbụk. Nte akade iso ndikpep Bible, afo eyekeme ndikama Bible n̄kwọrọ eti mbụk nnyụn̄ nnam mme owo ẹfiọk Jehovah, kpa Abasi emi afo okponode.​—Kot Rome 10:13-15.

Ediwak owo ẹsitọn̄ọ ndibụk eti mbụk emi nnọ mme ufan m̀mê mme iman mmọ. Nam oro ye mbufiọk. Utu ke ndidọhọ ke se mmọ ẹkpepde inenke, kam nam mmọ ẹfiọk se Abasi ọn̄wọn̄ọde. Ti n̄ko ete ke eti uwem fo edinen̄ede itụk mme owo ikan se etịn̄de.​—Kot 2 Timothy 2:24, 25.

Ndikpep Bible ayanam enen̄ede ekpere Abasi. Nte ini akade, afo emekeme ndidi ata ufan Abasi, onyụn̄ esịne ke otu nditọ esie.​—Kot 2 Corinth 6:18.

Se idinamde fi ọkọri ke ifiọk Abasi edi ndika iso n̄kpep Bible. (Mme Hebrew 5:13, 14) Dọhọ Mme Ntiense Jehovah ẹda n̄wed Nso ke Bible Enen̄ede Ekpep? ẹtie ye afo ẹkpep Bible. Nte afo ekpepde Bible, ntre ke edikụt unen ke se anamde.​—Kot Psalm 1:1-3; 73:27, 28.

Jehovah emi edide Abasi inemesịt enyene eti mbụk emi. Se idin̄wamde fi asan̄a ekpere enye edi ndidụk nsan̄a ye ikọt esie. (Mme Hebrew 10:24, 25) Edieke akade iso anam se inemde Jehovah esịt, afo eyetiene odu ata uwem ke ini iso—oro edi, nsinsi uwem. Omokụt do ke idụhe se ifọnde nte ndisan̄a n̄kpere Abasi.​—Kot 1 Timothy 1:11; 6:19.