REIREI 15
Bukin Tera Bwa Ko Riai n Teimatoa n Reiakina Taekan Iehova?
1. Ko na kanga ni kakabwaiaaki ngkai ko kateimatoa am reirei n te Baibara?
Akea te nanououa bwa e kakorakoraaki am tangira ibukin Iehova, man ana boto n reirei te Baibara aika kabwarabwaraaki. E kainnanoaki karikirakean am tangira ibukin Iehova. (1 Betero 2:2) E boto kantaningaan te maiu are aki toki iroum, ngkana ko teimatoa ni kaania te Atua n arom n reiakina ana Taeka.—Wareka Ioane 17:3; Iuta 21.
E na kakorakoraaki riki am onimaki ngkana e a rikirake am atatai ibukin te Atua. Ko na buokaki n am onimaki bwa ko na kakukureia te Atua. (I-Ebera 11:1, 6) E na kairiko bwa ko na raira nanom ao ni karaoi bitaki aika kakukurei ni maium.—Wareka Mwakuri 3:19.
2. A na kanga ni kakabwaiaaki tabemwaang n am atatai ibukin te Atua?
Ko kona ni karekea te iraorao ae okoro ma Iehova
Ni koauana, ko bae ni kan tibwaa nako te baere ko a tia n reiakinna nakoia tabemwaang, ibukina bwa ti bane ni kukurei n tibwaa te rongorongo ae raoiroi. Ngkai ko teimatoa n reirei n te Baibara, ko na reiakina iai arom ni kabongana te Baibara ni kabwarabwaraa am onimaki ibukin Iehova, ao n taekina te rongorongo ae raoiroi.—Wareka I-Rom 10:13-15.
Angiia aomata, a moana karaoan anne n tibwaa te rongorongo ae raoiroi nakoia raoraoia ao aia koraki. Bwaina te wanawana ni karaoan anne. Taekin ana berita te Atua nakoia, n oneani mwin ae ko na taekinna bwa e kairua aia Aro. Uringnga naba are a anaaki riki nanoia aomata n arom ni bwaina te akoi, nakon riki are ko taekinna.—Wareka 2 Timoteo 2:24, 25.
3. Tera te iraorao ma te Atua ae ko kona ni karekea?
E na rikirake am onimaki ngkana ko reiakina Ana Taeka te Atua. N tokina, ko na karekea te iraorao ae okoro ma Iehova. Ko kona n riki bwa kaain ana utu.—Wareka 2 I-Korinto 6:18.
4. Ko na kanga n teimatoa n rikirake n te onimaki?
Ko kona n rikirake n te onimaki ngkana ko teimatoa n reiakina Ana Taeka te Atua. (I-Ebera 5:13, 14) Tuanga temanna Ana Tia Kakoaua Iehova bwa e na reirei ma ngkoe man te Baibara, ni kabongana te boki ae Tera Ana Reirei ni Koaua te Baibara? Ngkana ko kabatiaa am tai n reiakina Ana Taeka te Atua, ko na kabatiaa iai kimwareireim ni maium.—Wareka Taian Areru 1:1-3; 73:27, 28.
Te rongorongo ae raoiroi boni mairoun Iehova ae te Atua ae kukukurei. Ko kona ni kaaniko ma ngaia ngkana ko bobotaki ma ana aomata. (I-Ebera 10:24, 25) Ngkana ko teimatoa ni kakorakorako ni kakukureia Iehova, ko a uaiakina iai te maiu ni koaua ae te maiu are aki toki. Kaanian te Atua bon te anga ae te kabanea n tamaroa ae ko kona ni karaoia.—Wareka 1 Timoteo 1:11; 6:19.
Ko Bae Naba n Tangira
RONGORONGORA
E Aera Ngkai E Raoiroi te Reirei n te Baibara?—Taamnei ae Bwanin
Iai n te Baibara kaekaan titiraki aika kakawaki ibukin te maiu ibukia aomata aika mirion ma mirion ni kabutaa te aonnaba. Ko kan ataia naba?
