Dogbigbapọnna nuplọnmẹ dodonu tọn Biblu tọn ehelẹ ko gọalọna we nado dọnsẹpọ Jehovah dogọ. Hiẹ dona nọ dovivẹnu egbesọegbesọ nado hẹn owanyi he a tindo na ẹn siso deji. (1 Pita 2:2) Hiẹ na hẹn todido ogbẹ̀ madopodo tọn towe go eyin a zindonukọn nado dọnsẹpọ Jiwheyẹwhe gbọn Ohó etọn pinplọn dali.—Hia Johanu 17:3; Juda 21.

Dile hiẹ zindonukọn, yise towe na yin hinhẹn lodo dogọ. Yise wẹ na gọalọna we nado hẹn homẹ Jiwheyẹwhe tọn hùn. (Heblu lẹ 11:1, 6) E na whàn we nado lẹnvọjọ bo basi diọdo dagbe lẹ to gbẹzan towe mẹ.—Hia Owalọ lẹ 3:19.

E họnwun dọ hiẹ na jlo nado má nuhe plọn a te lẹ hẹ mẹdevo lẹ, na mímẹpo wẹ nọ jlo na má wẹndagbe. Dile hiẹ zindonukọn to nupinplọn towe mẹ, hiẹ na yọ́n lehe a na yí Biblu do basi zẹẹmẹ yise towe tọn to Jehovah mẹ podọ to wẹndagbe lọ mẹ do.—Hia Lomunu lẹ 10:13-15.

Suhugan gbẹtọ lẹ tọn nọ bẹ wẹndagbe lọ mimá jẹeji hẹ họntọn kavi hẹnnumẹ yetọn lẹ. Ṣigba, nọ yí zinzin zan. Kakati nado nọ dọna yé dọ sinsẹ̀n yetọn ma yọ́n, nọ dọ opagbe Jiwheyẹwhe tọn lẹ na yé. Sọ flindọ lehe hiẹ jọmẹ hẹ gbẹtọ lẹ do nọ saba yinuwado yé ji hugan nuhe a dọ.—Hia 2 Timoti 2:24, 25.

Biblu pinplọn na gọalọna we nado whẹ́n to gbigbọ-liho. To nukọn mẹ, a sọgan biọ haṣinṣan vonọtaun de mẹ hẹ Jehovah bo na lẹzun hagbẹ whẹndo etọn tọn.—Hia 2 Kọlintinu lẹ 6:18.

Zindonukọn to Biblu pinplọn mẹ. (Heblu lẹ 5:13, 14) Biọ to dopo to Kunnudetọ Jehovah tọn lẹ mẹ si nado plọn Biblu hẹ we gbọn owe Etẹwẹ Biblu Plọn Mí Taun? yiyizan dali. Lehe hiẹ plọnnu sọn Ohó Jiwheyẹwhe tọn mẹ sọ, mọ wẹ hiẹ na tindo kọdetọn dagbe dogọ do niyẹn.—Hia Salmu lẹ 1:1-3; 73:27, 28.

Jehovah, yèdọ Jiwheyẹwhe ayajẹnọ lọ dè wẹ wẹndagbe lọ wá sọn. Hiẹ sọgan dọnsẹpọ ẹ dogọ gbọn dindọnsẹpọ omẹ etọn lẹ dali. (Heblu lẹ 10:24, 25) Eyin hiẹ to vivẹnudo nado hẹn homẹ Jehovah tọn hùn, a na to afọdona ogbẹ̀ nujọnu tọn lọ—enẹ wẹ ogbẹ̀ madopodo. Mọwẹ, onú dagbe hugan he a sọgan wà wẹ nado dọnsẹpọ Jiwheyẹwhe.—Hia 1 Timoti 1:11; 6:19.