Baibel ena hahediba hereva badadia haida be hari oi diba dainai, Iehova oi lalokau henia. Unai lalokau oi hagoadaia noho totona gau haida oi karaia be namo. (1 Petero 2:2) Hanaihanai Dirava ena Hereva oi stadilaia bona Dirava ena turana ai oi lao, unai ese dala do ia kehoa mauri hanaihanai oi abia totona.—Ioane 17:3; Iuda 21 duahia.

Dirava dibaia karana oi habadaia neganai, emu abidadama do ia goada. Abidadama ese oi do ia durua, Dirava oi hamoalea totona. (Heberu 11:1, 6) Emu abidadama dainai emu dika amo do oi helalo-kerehai, bona emu mauri dalana do oi haidaua o hamaoromaoroa.—Kara 3:19 duahia.

Reana do oi ura, oi dibaia gaudia be ma haida dekenai oi hadibaia—vaia, ita ura sivarai namona ita herevalaia, ani? Baibel oi stadilaia hanaihanai neganai, Baibel gaukaralaia dalana do oi manadalaia. Anina be, Iehova abidadama henia karana bona sivarai namona be Baibel amo ma haida dekenai do oi hadibaia.—Roma 10:13-15 duahia.

Momo ese sivarai namona be turadia o varavara dekenai idia harorolaia guna, reana oi danu be unai bamona oi karaia diba. To, heai idia havaraia haroro herevadia oi gwauraia lasi. Namo lasi ta oi hamaoroa, ia be dubu kererena ia lao, to namona be ia dekenai Dirava ena gwauhamata sivaraidia sibona oi harorolaia. Laloatao danu, taunimanima be emu hereva bona kara namodia dainai, Baibel ena hereva momokani idia abia dae diba.—2 Timoteo 2:24, 25 duahia.

Baibel stadilaia hanaihanai karana amo, emu abidadama Iehova dekenai be do ia goada ia lao. Gabeai, guriguri amo emu mauri be Iehova dekenai oi gwauhamatalaia, bena ia oi badinaia.  Unai bamona oi karaia neganai, oi be Iehova ena natuna ai oi lao diba.—2 Korinto 6:18 duahia.

Baibel oi stadilaia hanaihanai neganai, maoro bona kerere edia idau oi dibaia. (Heberu 5:13, 14) Iehova ena Witnes ta oi noia, oi ia durua totona. Ia ese buka ladana, Baibel be Dahaka Ia Hadibaia? amo oi do ia durua, Baibel ena anina oi lalopararalaia totona. Baibel amo gau momo oi dibaia neganai, emu mauri do ia namo.—Salamo 1:1-3; 73:27, 28 duahia.

Sivarai namona be Iehova, moale Diravana, ena amo idia mai dainai, Iena turana ai oi lao be gau badana. Unai bamona oi karaia dalana be inai: Iena orea taudia oi bamoa. (Heberu 10:24, 25) Hanaihanai Iehova hamoalea karadia oi goadalaia, unai amo oi hahedinaraia, oi ura mauri korikorina, mauri hanaihanai unai, oi abia. Unai hahenamo oi abia totona, Dirava ena turana ai oi lao be gau badana.—1 Timoteo 1:11; 6:19 duahia.