Chyum Laika sharin ya ai madung lam ni hpe hkaja yang, Yehowa hpe tsawra ai myit ngang kang wa na re. Dai tsawra myit, matut nna ngang kang nga na matu, shakut ra na re. (1 Petru 2:​3) Na a htani htana asak myit mada lam gaw, Chyum Laika hpe hkaja nna, Karai Kasang hte ni htep hkra galaw ai, n galaw ai, hta madung nga ai.—Yawhan 17:3; Yuda 21 ni hpe hti u.

Karai Kasang hte seng ai machye machyang jat wa yang, na a makam masham mung, ngang kang wa na re. Makam masham gaw, Karai Kasang ra sharawng ai lam lu na matu, karum ya ai. (Hebre 11:​1, 6) Myit malai la nna, na a prat hkrun lam galai shai na matu mung, shadut ya na re.—Kasa 3:​19, 20 hpe hti u.

Masha ni nchye ai hpe nang chye da yang, dai hpe tsun dan mayu ai nrai ni? Kabu gara shiga rai yang, grau nna tsun dan mayu na re. Nang Chyum Laika matut nna hkaja yang, na a makam masham hpe, Chyum Laika hte chye sanglang dan wa na re.—Roma 10:​13-​15 hpe hti u.

Masha law malawng gaw jinghku ni, manang ni hpe, kabu gara shiga tsun dan nna hpang ma ai. Hpaji rawng u. Shanhte a makam masham shut ai ngu n tsun ai sha, Karai Kasang a ga sadi ni hpe tsun dan u. Masha ni gaw, nang tsun ai ga hta, na a tsawra myit hte galaw ai lam hpe, grau nna matsing ai hpe dum nga u.—2 Timohti 2:​24, 25 hpe hti u.

Nang Karai a Mungga hpe hkaja yang, wenyi lam hta galu kaba wa na. Jahtum hta Yehowa hte nang hku hkau ni htep wa nna, shi a kun dinghku masha byin wa na re.—2 Korinhtu 6:​18 hpe hti u.

Karai a Mungga hpe matut nna hkaja yang, na a wenyi lam hta galu kaba wa na re. (Hebre 5:​13, 14) Yehowa Sakse langai ngai hte, Chyum Laika Anhte Hpe Hpa Sharin Ya Ai Kun? ngu ai laika buk hte Chyum Laika hkaja na matu hpyi shawn u. Karai a Mungga hpe grau hkaja yang, nang grau nna ngwi pyaw wa na re.—Shakawn Kungdawn 1:​1-3; 73:​27, 28 hpe hti u.

Kabu gara shiga gaw, ngwi pyaw ai Karai Kasang Yehowa kaw na sa ai. Karai Kasang hpe nawku ai ni hte hku hkau wa yang, shi hte mung hku hkau wa na re. (Hebre 10:​24, 25) Karai Kasang ra sharawng na matu, nang matut nna shakut galaw nga yang, htani htana asak lu la na re. Karai Kasang hte ni htep hkra galaw ai gaw, nang galaw ai lam yawng hta, kaja htum ai lam re.—1 Timohti 1:​11; 6:​19 hpe hti u.