I cya biin-biin ney, kulongw myand ya mu Bibl i kukashish lukat lwiibuh bwa Yehowah. Bikaam ney utungunuk ni kukashish lukat oolw. (1 Pyeel 2:2) Bwiibuh kufweej habwiih ni Mawej ni kuhet buumy bwa mwendelel, udy ni bwa kutungunuk ni kulongw Diiy dindiy.​—Bal Jah 17:3; Yuud 21.

Wuw muvudij Kumanyik kwiibuh kwa Mawej, diitabij diibuh diiyiiy kukasakan. Diitabij diiyiiy kukukwanjok bwa kusangaj Mawej. (Ebreh 11:1, 6) Diiyiiy kukukwanjok bwiibuh kwiikunying ni kwaalabul mucim ni kulek myand yibiih.​—Bal Myand yilongel 3:19.

I cya biin-biin ney, ukaakaam kwambilok baat bakwaabw myand yiwukaady mulongw, bwaal tut boos tudyaakal bakat kwiisamb ni baat bakwaabw myand yilengel yitudyaakal tuhet. Wuw utungunuk ni kulongw Bibl, wiiyiiy kumanyik mwa kulong nend mudimw bwa kujingunwiin baat myand ya Yehowah yiwudy mwiitabij ni misah yilengel yidyey naay bwiitut.​—Bal Rom 10:13-15.

Baat bavul badyaakal batang kudiil balund naabw eeny balel baababw misah yilengel. Ikal ni bukalang. Hamut iibuh kwiibambil ney, citendeleel cyaababw i cya makos, ibambil myand yilengel yidy Mawej mwiitulay. Waavuluk ney, misang yivul baat badyaakal balond myand yilengel yituloolong hamut ha myand yituleeleeb.​—Bal 2 Timoteh 2:24, 25.

Kulongw Diiy dya Mawej kwiiyiiy kukukwanjok bwiibuh kukasakan mu nyum. Wiiyiiy kudy bulund bwiibwiin bweeh ni Yehowah. Kuunyim, wiiyiiy kutweel mu cisak cya baan bindiy.​—Bal 2 Korent 6:18.

Wuw mutungunuk ni kulongw Bibl, udy mwa kukashish bulund bwiibuh ni Mawej. (Ebreh 5:13, 14) Kaam Temw a Yehowah bwiibuh kulongw nend Bibl ni mukand wa Mmalu kayi adi Bible utulongesha? Wuw mutungunuk ni kulongw bikasakan myand ya Mawej, wiiyiiy kuhet musangal muvul mu kushikat kwiibuh.​—Bal Musambw 1:1-3; 73:27, 28.

Misah yilengel yaalaalukil kudy Yehowah, Mawej a musangal. Udy mwa kufweej ha bwiih ni Mawej teng wuw utweel mu bisangil bya batemw ba Yehowah. (Ebreh 10:24, 25) Wuw mutungunuk ni kwiikashishomw bwa kusangaj Yehowah, wiiyiiy kuhet buumy bwa biin-biin, buumy bwa mwendelel. Kufweej habwiih ni Mawej es i bwaal bulengel bwiibwiin bweeh buwudy mwa kulong!​—Bal 1 Timoteh 1:11; 6:19.