Kwakubula nangwa kuzhinaukatu ne, kufunda Baibolo kwimulengela kutemwa bingi Yehoba. Twafwainwa kwibikako pa kuba’mba buno butemwe butwajijile. (1 Petelo 2:2) Bumi bwa myaka ne myaka bwaimena pa kutwajijila kufwenya kwipi ne Lesa kupichila mu kufunda Mambo anji.—Tangai Yoano 17:3; Yuda 21.

Lwitabilo lwenu lukakoselako inge mwatwajijila kufunda pe Lesa. Lwitabilo lukemukwasha kutokesha Lesa ku muchima. (Bahebelu 11:1, 6) Lukemulengela kulapila ne kupimpula byubilo byenu.—Tangai Byubilo 3:19.

Mukakebeshanga kubulako bakwenu byo mubena kufunda. Bonsetu tumvwa bingi bulongo kubulako bakwetu mambo awama. Inge mwatwajijila kufunda Baibolo, mukayuka byakwingijisha Baibolo pa kulumbulwila bakwenu mambo awama ne byo mwaitabilamo pe Yehoba.—Tangai Loma 10:13-15.

Bantu bavula batendeka kwisamba pa mambo awama na balunda nabo ne balongo babo. Yukai mwakwambila. Mu kifulo kya kwibabula’mba bupopweshi bwabo bwa bubela, babulai milaye ya Lesa. Kabiji yukai’mba byubilo byetu byawama bifika bantu bavula pa muchima kukila ne byo twamba.—Tangai 2 Timoti 2:24, 25.

Kufunda Mambo a Lesa kukemulengela kuyuka byavula pe Lesa. Popo mwakonsha kwikala na bulunda bwawama ne Yehoba.  Mwakonsha ne kwikala ba mu kisemi kyanji.—Tangai 2 Kolinda 6:18.

Mwakonsha kukomenako mu kuyuka Lesa inge mwatwajijila kufunda Mambo a Lesa. (Bahebelu 5:13, 14) Ambilai Kamonyi wa kwa Yehoba emufunjishenga Baibolo mu buku wa Nanchi Baibolo Kine Ufunjisha’mba Ka? Kufunda Mambo a Lesa kukemulengela kwikala bulongo.—Tangai Salamo 1:1-3; 73:27, 28.

Ano mambo awama afuma kwi Yehoba Lesa wa lusekelo. Mwakonsha kufwenya kwipi ne aye inge ke mupwanañane na bantu banji. (Bahebelu 10:24, 25) Byo mwibikako kutokesha Yehoba ku muchima, mubena kukanamina bumi bwa kine, bumi bwa myaka ne myaka. Kufwenya kwipi ne Lesa kyo kintu kyakilamo kunema kyo mwafwainwa kuba mu bwikalo bwenu.—Tangai 1 Timoti 1:11; 6:19.