Ka lukatikisu ko vo malongi mama ma Nkand’a Nzambi masiamisi zola kwaku muna Yave. Ofwete kwamanana sia ngolo za siamisa zola kwaku. (1 Petelo 2:2) Muna vwa moyo a mvu ya mvu divavanga vo wakwamanana finama Nzambi muna longokanga Diambu diandi.—Tanga Yoane 17:3; Yuda 21.

Avo zayi waku muna Nzambi uwokele, lukwikilu lwaku mpe lukumama. Lukwikilu lukusadisa mu yangidika Nzambi. (Ayibere 11:1, 6) Lukwikilu lukufila mu vilukw’e ntima yo vanga nsobani zilenda tomesa zingu kiaku.—Tanga Mavangu 3:19.

Ka lukatikisu ko vo una y’etima dia zayisa kw’akaka mana olongokanga. Yeto awonso tukalanga ye kiese kia zayisa nsangu zambote. Ekolo okwamanananga longoka Nkand’a Nzambi, ozaya una lenda sadila Nkand’a Nzambi mu sasila lukwikilu lwaku muna Yave yo muna nsangu zambote.—Tanga Roma 10:13-15.

Ayingi beyantikilanga samun’e nsangu zambote kw’akundi ye yitu yau. Kansi ofwete kala ye ndekwa. Vana fulu kia kubavovesa vo dibundu diau dialuvunu, ubazayisa e nsilu mia Nzambi. Sungamena mpe vo edi beluta yangalelanga o wantu i nkal’aku yambote ke mana ovovanga ko.—Tanga 2 Timoteo 2:24, 25.

O longoka Nkand’a Nzambi dikusadisa mu zikuka muna mwanda. Ediadi dilenda kusadisa mu kala ye ngwizani ambote yo Yave. Olenda kituka se mosi muna wan’andi.—Tanga 2 Korinto 6:18.

Muna zikuka muna mwanda, ofwete kwamanana longoka Diambu dia Nzambi. (Ayibere 5:13, 14) Lomba kwa mosi muna Mbangi za Yave kalongokanga yaku Nkand’a Nzambi muna sadila Adieyi Nkand’a Nzambi Ulenda Kutulonga? Avo olongokele mayingi muna Diambu dia Nzambi, okala ye kiese kiayingi muna zingu.—Tanga Nkunga 1:1-3; 73:27, 28.

E nsangu zambote kwa Yave wa Nzambi a kiese zitukanga. Olenda finama Nzambi muna lungananga ye nkangu andi. (Ayibere 10:24, 25) Muna kwamanana sia e ngolo za yangidika Yave, osolola zingu kiasikila, i sia vo, moyo a mvu ya mvu. Kieleka, o finama Nzambi i diambu disundidi o mfunu olenda vanga.—Tanga 1 Timoteo 1:11; 6:19.