TUTO 15
Ki Kabakalañi Hamuswanela Kuzwelapili Kuituta Bibele?
1. Kuzwelapili kuituta Bibele kuka mitusa cwañi?
Kusina kukakanya, litaba za mwa Bibele za matatekelo zelunyakisisize ka bukuswani limisusuelize kulata hahulu Jehova. Lulukela kuzwelapili kutiisa lilato laluna. (1 Pitrosi 2:2) Kuli mubeni sepo ya kufumana bupilo bobusa feli, muswanela kuzwelapili kusutelela ku Mulimu ka kuituta Linzwi lahae.—Mubale Joani 17:3; Juda 21.
Hamunze muzwelapili kuekeza kwa zibo yamina ka za Mulimu, tumelo yamina ikatiya hahulu. Kuba ni tumelo kuka mitusa kutabisa Mulimu. (Maheberu 11:1, 6) Mi kuka mitusa kubaka ni kueza licinceho zende mwa bupilo bwamina.—Mubale Likezo 3:19.
2. Mukona kutusa cwañi babañwi ka zibo yemunani yona ka za Mulimu?
Mwakona kuba ni silikani sesiipitezi ni Jehova
Kusina kukakanya, mukatabela kutaluseza babañwi zemuitutile. Kaufelaa luna lwatabelanga kutaluseza babañwi litaba zende. Hamunze muzwelapili kuituta Bibele, mukaituta momukona kuitusiseza Bibele kutalusa tumelo yamina ku Jehova ni tumelo yamina ka za taba yende.—Mubale Maroma 10:13-15.
Buñata bwa batu bakalanga kutalusa taba yende kwa balikani babona kamba bahabo bona. Mubonise maseme hamueza cwalo. Kufita kubabulelela kuli bulapeli bwabona bufosahalile, mubabulelele za lisepiso za Mulimu. Hape muhupule kuli batu hañata basusuezwanga hahulu ki mikwa yamina ye sishemo kufita litaba zemubulela.—Mubale 2 Timotea 2:24, 25.
3. Mukona kuba ni silikani sesicwañi ni Mulimu?
Kuituta Linzwi la Mulimu kuka mitusa kutiisa silikani samina ni Mulimu. Mi hamulaho wa nako, mukafita fa kuba ni silikani sesiipitezi hahulu ni Jehova. Mwakona mane kuba yomuñwi wa bana ba mwa lubasi lwahae.—Mubale 2 Makorinte 6:18.
4. Ki sika mañi sesika mitusa kueza zwelopili?
Mwakona kuzwelapili kutiisa silikani samina ni Mulimu ka kuzwelapili kuituta Linzwi la Mulimu. (Maheberu 5:13, 14) Mukupe yomuñwi wa Lipaki za Jehova kuituta Bibele ni mina ka kuitusisa buka ya Bibele I Lutañi Luli? Hamuka ituta hahulu Linzwi la Mulimu, mukaba ni bupilo bobunde.—Mubale Samu 1:1-3; 73:27, 28.
Taba yende izwa ku Jehova, yena Mulimu yatabile. Mwakona kusutelela hahulu ku yena ka kuswalisana hahulu ni batu bahae. (Maheberu 10:24, 25) Hamuka zwelapili kuikataza kutabisa Jehova, mukafumana bupilo sakata, bona bupilo bobusa feli. Kaniti mukaeza hande hahulu kusutelela ku Mulimu.—Mubale 1 Timotea 1:11; 6:19.
Hape Mwendi Mwakona Kutabela Litaba Ze
KA ZA LUNA
Ki Kabakalañi ha lu Swanela ku Ituta Bibele?
Bibele i sweli ku alaba lipuzo za butokwa hahulu ze ba sweli ku buza batu ba bañata-ñata mwa lifasi kaufela. Kana mwa tabela ku ba yo muñwi wa batu bao?
