RÄ NTHEKE 15
¿Por hanja xä ñho gi sigi gi pädi nuꞌu̱ yä hogä noya bi ehe de Äjuä?
1. ¿Te mä ñho ma gi hñäni mu̱ gi sigi gi nxadi rä Mäkä Tꞌofo?
Ha nunä he̱ꞌmi ya gä nxadi nuꞌu̱ yä ntꞌudi mähyoni gi pädi de rä Mäkä Tꞌofo. ¿Hänge mäjuäni ge gatꞌho näꞌä xkä pädi xä maxꞌäꞌi pa xä te näꞌä ri mhäte po rä Zi Dada Jeoba? Nunä mhäte ꞌñenä nꞌa planta näꞌä mähyoni gä xitpäbihu̱ rä dehe pa dä te (1 Pedro 2:2). Pa gi hñäni näꞌä te pa nzäntho, mähyoni gi sigi gi kuatꞌi Äjuä po mäde de gi nxadi rä Mäkä Tꞌofo. Hñeti Juan 17:3 ꞌne Judas 21.
Mu̱ gi sigi gi japi dä te näꞌä ri mfädi de Äjuä, ri jamfri po geꞌä ꞌnehe mänꞌa ma dä te, ꞌne geꞌä ma dä maxꞌäꞌi pa gi pe̱fi nuꞌu̱ yä tꞌo̱tꞌe di ho Äjuä (Hebreos 11:1, 6). Nunä jamfri, ꞌnehe ma dä jakägihu̱ gä yobrihu̱ de mä tsꞌokihu̱ ꞌne gä paati mä mꞌu̱ihu̱. Hñeti Hechos 3:19.
2. ¿Hanja dä za gi fatsꞌi märꞌa ko näꞌä mfädi gi pe̱ꞌtsi de Äjuä?
Nuꞌi dä za gi pe̱ꞌtsi nꞌa rä hogä ntsitsꞌi ko rä Zi Dada Jeoba
Gatꞌho di hohu̱ gä o̱dehu̱ yä hogä noya. ¿Gi hohmä gi xipi märꞌa yä jäꞌi nuꞌu̱ yä hogä noya xkä pädi? Mu̱ gi sigi gi nxadi rä Noya Äjuä, nuꞌi ma gi pädi gi hñä rä Mäkä Tꞌofo pa gi ꞌñudi de Jeoba ꞌne de nuꞌu̱ yä hogä noya pe̱ꞌtsi pa gatꞌho yä jäꞌi. Hñeti Romanos 10:13-15.
Nuꞌmu̱ di o̱dehu̱ yä hogä noya, ¿hänge mꞌe̱tꞌo di ne gä xipäbihu̱ mä familia ꞌne mä parientehu̱? Pa geꞌä, mähyoni gi xipäbi ko rä tꞌekꞌei ꞌne rä mhäte. Ogi xipäbi ge hingä geꞌä pe̱fi yä relijion, mänꞌa xä ñho gi xipäbi de nuꞌu̱ yä promesa pe̱ꞌtsi Äjuä pa yä jäꞌi. ꞌNehe, beni ge yä jäꞌi mänꞌa handi näꞌä mä mꞌu̱ihu̱ di pe̱ꞌtsihu̱ ke näꞌä di xipäbihu̱. Hñeti 2 Timoteo 2:24, 25.
3. ¿Asta hängu dä za gi ntsitsꞌiui Äjuä?
Mu̱ gi sigi gi nxadi rä Mäkä Tꞌofo, mänꞌa ma gi pädi hanja gi pe̱fi nuꞌu̱ yä tsꞌofo ꞌne yä mhända Äjuä. ꞌNe xti thogi yä pa, Jeoba ma dä za dä hyantꞌäꞌi ngu nꞌa rä amigo. Nuꞌi dä za gi ku̱tꞌi ha näꞌä rä familia pe̱ꞌtsi. Hñeti 2 Corintios 6:18.
4. ¿Te ma dä maxꞌäꞌi pa gi sigi gi pädi hanja gi pe̱fi nuꞌu̱ yä tsꞌofo ꞌne yä mhända Äjuä?
Pa dä te ri mhäte po Jeoba, mähyoni gi sigi gi nxadi rä Mäkä Tꞌofo (Hebreos 5:13, 14). Yꞌapäbi nuꞌu̱ yä testigo rä Jeoba ge dä maxꞌäꞌi gi nxadi rä Mäkä Tꞌofo ko näꞌä mfistꞌofo ¿Te xa mäjuäni udi rä Mäkä Tꞌofo? Mu̱ gi sigi gi pädi de Äjuä, ma gi hyandi ge mänꞌa ma gi pe̱ꞌtsi nꞌa rä mꞌu̱i ko rä johya. Hñeti Salmo 1:1-3 ꞌne 73:27, 28.
Nuꞌu̱ yä hogä noya bi ehe de Jeoba, ngeꞌä nuni nꞌa Zi Dada de gä johya (1 Timoteo 1:11, NM). ¿Gi beni ge Äjuä pe̱ꞌtsi nꞌa rä hnini? Nuꞌi dä za gi kuatꞌi Äjuä mu̱ gi kuatꞌi näꞌä rä hnini (Hebreos 10:24, 25). Mu̱ gi sigi gi yꞌo̱tꞌe ntsꞌe̱di po gi pe̱fi näꞌä di ho Jeoba, ma dä za gi hñäni näꞌä xa mäjuäni rä te: nꞌa rä te pa nzäntho. Mu̱ gi kuatꞌi Äjuä, ¡ma gi da ngue̱nda ge gehnä ꞌñuu mänꞌa xä ñho pa gi yꞌo! Hñeti 1 Timoteo 6:19, NM.
Puede que también le interese
PÄDI TOꞌOGIHE
¿Por hanja mähyoni gä nxadihu̱ rä Mäkä Tꞌofo? (xo̱ge rä bideo)
Rä Mäkä Tꞌofo fatsꞌi yä miyontho yä jäꞌi dä dimbäbi yä mpengi nuꞌu̱ yä däta ntꞌani xä dupäbi yä mu̱i. Xi nuꞌi, ¿gi hohmä gi timbäbi yä mpengi nuꞌu̱ yä ntꞌaniꞌu̱?
