ایہدے وچ کوئی شک نئیں کہ پاک کلام دیاں کجھ بنیادی سچائیاں سکھ کے یہوواہ لئی تواڈا پیار ودھ گیا اے۔‏ پر ایس پیار نوں برقرار رکھن لئی توانوں محنت کرن دی لوڑ اے۔‏ (‏1-‏پطرس 2:‏2‏)‏ ہمیشاں دی زندگی پاؤن لئی ضروری اے کہ تُسی خدا دے کلام وچوں سکھ کے اوہدے نال اپنا رشتہ مضبوط کر دے رہوو۔‏​—‏یوحنا 17:‏3؛‏ یہوداہ 21 نوں پڑھو۔‏

جیویں جیویں خدا بارے تواڈا علم ودھے گا،‏ اونویں اونویں تواڈا ایمان مضبوط ہوندا جاوے گا۔‏ ایس طرحاں تُسی خدا نوں خوش کرن دے قابل ہووو گے۔‏ (‏عبرانیوں 11:‏1،‏ 6‏)‏ مضبوط ایمان توانوں توبہ کرن تے اپنی زندگی وچ ضروری تبدیلیاں کرن لئی وی مدد دوے گا۔‏​—‏اعمال 3:‏19 نوں پڑھو۔‏

کیہہ ایہہ سچ نئیں کہ جدوں تُسی کوئی خوشی دی گل سُن دے او تے دُوجیاں نوں دسے بنا نئیں رہ سکدے۔‏ ایسے طرحاں تُسی پاک کلام دی خوشخبری دُوجیاں نوں ضرور سنانا چاہوو گے۔‏ جے تُسی بائبل سٹڈی جاری رکھو گے تے تُسی پاک کلام دے حوالے دے کے سکھاؤن دے قابل بن جاؤ گے۔‏ ایس طرحاں تُسی خدا اُتے اپنے ایمان تے خوشخبری بارے دُوسریاں نوں اعتماد نال دس سکو گے۔‏​—‏رومیوں 10:‏13-‏15 نوں پڑھو۔‏

جے تُسی چاہو تے شروع وچ تُسی اپنے رشتے داراں یاں دوستاں نوں خوشخبری دا پیغام دے سکدے او۔‏ پر اوہناں نال بڑے دھیان نال گل بات کرو۔‏ اوہناں دے ایمان اُتے نکتہ چینی کرن دی بجائے اوہناں نوں خدا دے وعدیاں بارے دسو۔‏ ایہہ وی یاد رکھو کہ ساڈیاں گلاں نالوں ساڈا چال چلن اوہناں تے زیادہ اثر کرے گا۔‏​—‏2-‏تیمُتھیُس 2:‏24،‏ 25 نوں پڑھو۔‏

خدا دے پاک کلام وچوں سکھن نال تُسی اوہدے نزدیک ہوندے جاؤ گے۔‏ ایہناں ای نئیں سگوں تُسی خدا دے خاندان دا  حصہ وی بن سکدے او۔‏ ذرا سوچو کہ یہوواہ نال ایہو جیہا خاص رشتہ جوڑنا کِنّاں وَڈّا شرف اے۔‏​—‏2-‏کُرنتھیوں 6:‏18 نوں پڑھو۔‏

خدا بارے سکھدے رہن نال تُسی اوہدے کلام دے اصولاں تے چلنا سکھو گے۔‏ (‏عبرانیوں 5:‏13،‏ 14‏)‏ تُسی کسے یہوواہ دے گواہ توں مدد لے سکدے او کہ اوہ توانوں کتاب ”‏پاک صحائف کی تعلیم حاصل کریں‏“‏ وچوں بائبل سٹڈی کورس کرائے۔‏ تُسی جِناں زیادہ خدا بارے سکھو گے،‏ اوناں ای تواڈی زندگی خوشیاں نال بھر جاوے گی۔‏​—‏زبور 1:‏1-‏3؛‏ 73:‏27،‏ 28 نوں پڑھو۔‏

خوشخبری خوش دل خدا یہوواہ وَلّوں اے۔‏ خدا نال مضبوط رشتہ جوڑن لئی ضروری اے کہ تُسی اوہدے لوکاں نال دوستی کرو تے اوہناں نال مِل کے عبادت کرو۔‏ (‏عبرانیوں 10:‏24،‏ 25‏)‏ ہمیشاں دی زندگی وَل قدم ودھان لئی یہوواہ خدا نوں خوش کرن دی کوشش کردے رہوو۔‏ جی ہاں،‏ ساڈے لئی خدا دے نزدیک جان توں ودھ ہور کیہہ ہو سکدا اے۔‏​—‏1-‏تیمُتھیُس 1:‏11؛‏ 6:‏19 نوں پڑھو۔‏