15 YACHAQANA
¿Imaraykutaj Bibliamanta yachakunallaykipuni tiyan?
1. ¿Imaraykú Bibliamanta yachakunallaykipuni kanman?
Kaykama yachakusqaykeqa, Jehová Diosta astawan munakunaykipaj yanapasorqachá. Chaywanpis payta astawan munakunaykipaj kallpachakullaypuni (1 Pedro 2:2). Diospa qayllallanpipuni kanki chayqa wiñay kausayta japʼiyta atinki. Chayrayku Diospa Palabranta estudiakullaypuni. Juan 17:3; Judas 21 leey.
Diosmanta astawan yachakojtiykeqa, creeyniyki wiñanqa, paytataj kusichiyta munanki (Hebreos 11:1, 6). Chaytaj juchasniykimanta pesachikunaykipaj, kausayniykita cambianaykipaj ima yanapasonqa. Hechos 3:19 leey.
2. ¿Imaynatá wajkunata yanapawaj?
Tukuypis wajkunaman sumaj willaykunata willariyta munanchej. Chayrayku qanpis ichá Bibliamanta yachakusqaykita wajkunaman willariyta munanki. Bibliamanta yachakullankipuni chayqa, sumaj willaykunata runasman willariyta atinki. Romanos 10:13-15 leey.
Ichapis familiaykiman chayri amigosniykiman willariwaj imastachus yachakushasqaykimanta. Chaywanpis ama sonqonkuta nanachinaykipaj jinachu parlay. Pantasqa religionpi kasqankuta ninaykimantaqa, Diospa munayninmanta kʼachallamanta parlariy. Runaqa imaynatachus kausakusqanchejta astawan qhawanku. 2 Timoteo 2:24, 25 leey.
3. Bibliamanta yachakuspa, ¿imastá tariwaj?
Diosta yupaychaypi ñaupariyta atinki, Jehová Diosmantaj astawan qayllaykunki. Arí, Diospa familianmanta kayta atinki. 2 Corintios 6:18 leey.
4. Ñauparinallaykipajpuni, ¿imatá ruwawaj?
Bibliamanta yachakullaypuni (Hebreos 5:13, 14). Chaypajtaj Jehovaj testigosninta, ¿Imastá Biblia yachachiwanchej? librowan yachachisunankuta niy. Bibliamanta astawan yachakuspaqa, aswan kusisqa kausakunki. Salmo 1:1-3; 73:27, 28 leey.
Sumaj willaykunaqa kusikuyniyoj Diosninchej Jehovamanta jamun. Payman astawan qayllaykunapajtaj payta yupaychajkunawan khuska tantakuna tiyan (Hebreos 10:24, 25). Diospa munayninta tukuy sonqo ruwaspataj, wiñay kausayta japʼisunchej. Arí, Diosman qayllaykoyqa, ¡may sumajpuni! 1 Timoteo 1:11; 6:19 leey.