Bibliapita yachakunqëkiqa Jehoväta kuyanëkipaqmi yanapashurqunki. Tsënö kaptimpis, pëta kuyanëkipaqmi más kallpachakunëki (1 Pedru 2:2). Mana wanushpa kawanëkipaqqa Jehoväman más witinëkim precisan y tsëpaqqa Bibliata estudianqëkim yanapashunki.​—Lei Juan 17:3 y Judas 21.

Diospita más yachakunqëkim yanapashunki markäkïniki o yärakuyniki más fuerteyänampaq y tsëwanmi Diosta más kushitsinki (Hebreus 11:1, 6). Jina yanapashunkim arrepentikunëkipaq y cawënikichö imëka mana allikunatapis dejarinëkipaq.​—Lei Hechos 3:19.

Yachakunqëkitaqa wakinkunatapis musyaratsita munankimanchi, llapantsiktam gustamantsik alli willakïta musyatsikïqa. Bibliapita más yachakunqëkim yanapashunki Bibliata alli utilizänëkipaq, Jehoväpita parlanëkipaq y alli willakïkunatapis yachatsikunëkipaq.​—Lei Romanos 10:13-15.

Wakinkunaqa kastankunata y amïgonkunatam parlapar qallëkuyan. Religionnin mana alli kanqantaqa ama nitsu, sinöqa kuyëpa y respëtowan yachatsi Dios awnikunqankunata. Pero parlanqëkipitapis más alliqa kanqa portakïnikim.​—Lei 2 Timoteu 2:24, 25.

Bibliata más estudianqëkiqa Jehoväpa kaqchö más poqunëkipaqmi yanapashunki, y pëwan alli amigo këtam  puëdenki. Diospa familian cuentam tikrarinki.​—Lei 2 Corintios 6:18.

Diospa Palabrampita yachakïta ama dejëtsu (Hebreus 5:13, 14). Mañakï Jehoväpa testïgonkuna Rasumpëpaqa, ¿imatataq Biblia yachatsikun? librowan yachatsiyäshunëkipaq. Más yachakurqa kushishqam kanki.​—Lei Salmo 1:1-3 y 73:27, 28.

Yarpë, alli willakïkunaqa Jehoväpitam shamun, pëqa kushishqa Diosmi y pëman wititaqa puëdenki sirweqninkunawan juntakarllam (Hebreus 10:24, 25). Jehoväpa munënin rurëta procuarqa, mana wanushpa kawakïtam chaskinki. Imëkapitapis más alliqa kanqa Diosman witinqëkim.​—Lei 1 Timoteu 1:11 y 6:19.