Bibliapa yachachikuyninkunamanta yachamusqaykikunam Jehová Diosta astawan kuyanaykipaq yanapasurqanki. Chay kuyakuyniki astawan kananpaqmi hinalla kallpanchakunayki (1 Pedro 2:2). Wiñay kawsaypi suyakuyniyoq kanaykipaq hinaspa Diosmanta mana karunchakunaykipaqqa paypa Palabrantam hinalla estudianayki. Leey Juan 17:3; Judas 21.

Diosmanta astawan yachaspam iñiynikipi takyanki, chayna iñiyniyoq kaspaqa paypa agradonpaqmi kawsanki (Hebreos 11:​1, 6). Chay iñiyninchikmi kallpanchawanchik huchanchikmanta wanakuspa vidanchikta cambianapaq. Leey Hechos 3:19.

Munachkankichá yachasqaykikunamanta hukkunamanpas willakuyta, llapanchikmi munanchik allin noticiamanta willakuytaqa. Yachasqaykiman hinam Bibliawan yanapachikuspa Jehová Diosmanta allin noticiakunata willakuyta atinki. Leey Romanos 10:​13-15.

Wakinqa chay yachasqankumantam qallariypiqa familiankuman otaq amistadninkuman willanku. Ichaqa sumaqllatam willana. Pantaypi kasqankumanta rimanaykimantaqa Diospa promesankunamanta willay. Rimasqaykimantaqa imayna kasqaykim aswan allinqa. Leey 2 Timoteo 2:​24, 25.

Biblia estudiasqaykim yanapasunki iñiynikipi astawan ñawparinaykipaq chaynataq Diospa kuyasqan amistadnin kanaykipaqpas. Payqa familianta hinam qawasunki. Leey 2 Corintios 6:​18.

Diospa Palabranta hinalla estudiay (Hebreos 5:​13, 14). Jehová Diospa testigonta niy ¿Imamantam bibliaqa yachachiwanchik?? librowan Diosmanta yachachisunaykipaq. Paymanta astawan yachaspaqa kusisqam kawsakunki. Leey Salmo 1:​1-3; 73:​27, 28.

Kusisqa Diosmantam allin noticiakunaqa, paymanmi astawan asuykunki Testigonkunawan huñunakuspaqa (Hebreos 10:​24, 25). Diospa munayninta ruranaykipaq kallpanchakuspaqa chaskinkim wiñaypaq cheqap kawsayta. Allinnikipaqmi Diosman asuykuynikiqa. Leey 1 Timoteo 1:​11; 6:​19.