Bibliamanda ashatalla yachajushpapash Jehová Diosta juyai callarishcanguimi. Shinapash chai juyai tucurichunga na saquinachu cangui (1 Pedro 2:2). Bibliamanda yachajushpa, Diospa amigo cashpallami na huañushpa causai ushangui. Juan 17:3; Judas 21, liipangui.

Bibliamanda ashtahuan yachajujpica quiquinba fe ashtahuan shinlliyajpimi Diosta cushichingui (Hebreos 11:​1, 6). Feta charishpami juchacunamanda arripintirishpa aliguta causanata mascangui. Hechos 3:19, liipangui.

Ali noticiacunata uyashpaca shujcunaman parlangapami munanchi. Shinallatami Bibliamanda yachajushcataca tucuicunaman parlangapaj munana cangui. Bibliamanda ashtahuan yachajushpami Diosmanda parlangapaj, pai imata ruranata yachachingapaca Bibliata imashina utilizanata yachajungui. Romanos 10:​13-15, liipangui.

Callaripica quiquinba familiacunaman, amigocunamanmi ali shimicunahuan parlana cangui. Quiquingunapa crishcacunaca nalichu can ninapa randica, Jehová Diospa ali villaigucunatami yachachina cangui. Ama cunganguichu. Quiquin aliguta causajujta ricushpami shujcunapash Diosmanda yachajungapaj munanga. 2 Timoteo 2:​24, 25, liipangui.

Bibliamanda yachajushpami espiritualmente ñaupajman  catishpa Diospa amigo tucungui. Shinallata Diospa huahuashnami tucungui. 2 Corintios 6:​18, liipangui.

Bibliata yachajunataca na saquinachu cangui (Hebreos 5:​13, 14). Testigo de Jehovacunatami nina cangui ¿Imatata Bibliaca yachachin? librohuan Bibliamanda yachachihuai nishpa. Diosmanda ali yachajushpaca ninanda cushijushpami causangui. Salmo 1:​1-3; 73:​27, 28, liipangui.

Bibliaca cushilla Diosmanda ali villaigucunatami charin (1 Timoteo 1:​11, NM ). Jehovaman ashtahuan quimiringapaca paita ali sirvijcunahuanmi tandanajuna cangui (Hebreos 10:​24, 25). Diospa munaita rurashpaca para siempremi causangui. Shinaca, Diospa amigo canami ashtahuan ali can. 1 Timoteo 6:​19, liipangui.