15 УРУОК
Тугу ситиспиппитигэр тоҕо тохтоон хаалыа суохтаахпытый?
1. Биибилийэни салгыы үөрэтэр тоҕо улахан суолталааҕый?
Бу Биибилийэ сүрүн үөрэхтэрин кылгас ырытыыта эһиги Иеговаҕа тапталгытын бөҕөргөппүт буолуохтаах. Тапталы мэлдьи сайыннара туруохха наада (1 Петр 2:2). Эһиги Таҥара туһунан салгыы билэ уонна кини Тылын үөрэтэ турар буоллаххытына, бараммат олоххо тиксэр кыахтаныаххыт. (Иоанн 17:3; Иуда 21 ааҕыҥ.)
Эһиги Таҥара туһунан төһөнөн элбэҕи билиэххит да, соччонон итэҕэлгит бөҕөргүө. Итэҕэл Таҥара санаатын табарга көмөлөһүө (Еврейдэргэ 11:1, 6). Итэҕэлгит эһиги аньыыларгытын билинэн кэмсинэргэ уонна олоххутугар сөптөөх уларыйыылары оҥорорго көмөлөһүө. (Апостоллар 3:19 ааҕыҥ.)
2. Эһиги Таҥара туһунан билиигит атыттарга хайдах көмө буолуон сөбүй?
Иеговаҕа кини доҕоро буолуоххун баҕарарыҥ туһунан кэпсээ
Биллэн турар, эһиги тугу билбиккитин атыттарга кэпсиэххитин баҕарыаххыт, тоҕо диэтэххэ биһиги бары үчүгэй сонуну үллэстэри сөбүлүүбүт. Таҥара туһунан салгыы билэн истэххит аайы туохха итэҕэйэргитин Биибилийэ көмөтүнэн быһаарарга үөрэниэххит. (Римляннарга 10:13—15 ааҕыҥ.)
Үгүстэр бастаан үтүө сураҕы доҕотторугар уонна аймахтарыгар кэпсииллэр. Дьону кытта сымнаҕастык кэпсэтиҥ. Атыттарга кинилэр итэҕэллэрэ сыыһа диэн этимэҥ. Ол оннугар кинилэргэ Таҥара тугу эрэннэрэрин туһунан кэпсээҥ. Ону таһынан, эһиги хайдах быһыыланаргыт хайа да тыллардааҕар ордук дьайыан сөптөөҕүн туһунан умнумаҥ. (2 Тимофейга 2:24, 25 ааҕыҥ.)
3. Биибилийэни үөрэтэргит эһиги Таҥараны кытта сыһыаҥҥытыгар хайдах дьайыаҕай?
Таҥара Тылын үөрэтэргит эһиэхэ духуобунай өттүнэн улаатаргытыгар көмөлөһүөҕэ. Сотору кэминэн эһиги Иегованы кытта ураты сыһыаны сайыннарыаххытын сөп. Эһиги оннооҕор кини дьиэ кэргэнигэр кыттыһыаххытын сөп. (2 Коринфяннарга 6:18 ааҕыҥ.)
4. Эһиги кырдьык суолугар салгыы хардыылары оҥороргутугар туох көмөлөһүөҕэй?
Эһиги духуобунай өттүнэн улаатыаххытын баҕарар буоллаххытына, тугу ситиспиккитигэр тохтоомоҥ (Еврейдэргэ 5:13, 14). Иегова Туоһуларыттан «Чему нас учит Библия» диэн кинигэнэн эһигини кытта Биибилийэ үөрэтиитин ыыталларыгар көрдөһүҥ. Таҥара Тылыттан төһөнөн элбэҕи билиэххит да, соччонон эһиги олоххут үтүө түгэннэрдээх уонна ордук суолталаах буолуоҕа. (Саалтыыр 1:1—3; 72:27, 28 ааҕыҥ.)
Үчүгэй сонун дьоллоох Таҥараттан, Иеговаттан, кэлэр. Эһиги Таҥара норуотугар холбостоххутуна, киниэхэ чугас буолуоххут (Еврейдэргэ 10:24, 25). Иегованы үтүө дьыалаларгытынан үөрдэн эһиги дьиҥнээх, ол эбэтэр бараммат, олоххо чугаһыыгыт. Таҥараны кытта доҕордоһуугутун бөҕөргөтүҥ. Бу киһиэхэ туохтааҕар да сыаналаах буолар! (1 Тимофейга 1:11; 6:19 ааҕыҥ.)
Эһигини интэриэһиргэтиэн сөп
БИҺИГИ ТУСПУТУНАН
Биибилийэни үөрэтэр тоҕо нааданый?
Биибилийэ аан дойду үрдүнэн мөлүйүөнүнэн дьоҥҥо олоххо үөскүүр сүрүн ыйытыыларга эппиэти буларга көмөлөһөр. Бу кинигэ эһиэхэ эмиэ көмөлөһөрүгэр баҕарыа этигит дуо?
