Nanjary teanao Jehovah lafa nianaranao baka amy Baiboly ao ty mikasiky azy. Mila ampitomboa avao fitiava azy io. (1 Petera 2:2) Laha tohizanao avao ty fianaranao Baiboly, le ho velo tsy misy farany noho hifandramby soa amy Ndranahary iha.—Vakio Jaona 17:3; Joda 21.

Lafa mitombo ty raha hainao mikasiky Ndranahary, le hana finoa matanjaky iha. Ho falifaly aminao koa Jehovah. (Hebreo 11:1, 6) Finoa io koa ro hahavy anao hiova, ka hiala amy ty raha raty nataonao taloha.—Vakio Asan’ny Apostoly 3:19.

Mahafalifaly ty mivola vaovao soa. Ho teanao koa ty hivola aminolo ty raha nianaranao. Laha mianatsy Baiboly avao iha, le hahay mampiasa Baiboly sady hahay manazava ty finoanao mikasiky Jehovah.—Vakio Romanina 10:13-15.

Afaky manomboky miresaky vaovao soa io amy ty nama na ty longonao iha. Ka avy le mivola amin-drozy iha hoe diso ty fivavahany, fa volano aminy ty raha ampitamany Ndranahary. Manaova soa fanahy aminy koa satria zay ro mety hahavy azy haneky ty raha marina volaninao.—Vakio 2 Timoty 2:24, 25.

Laha mianatsy Baiboly avao iha, le hifankariny marè amy Ndranahary. Afaky mifandramby soa amy Jehovah iha. Afaky hanjary ho anany koa iha.—Vakio 2 Korintianina 6:18.

Tohizo avao ty fianaranao Baiboly, le hitombo ty finoanao. (Hebreo 5:13, 14) Soa laha tohizanao amy boky Ino ty Azonao Ianara amy Baiboly Ao?, ndraiky raha zay. Laha mianatsy Safà Ndranahary io avao iha, le hihasoa ty fiainanao.—Vakio Salamo 1:1-3; 73:27, 28.

Ndranahary falifaly Jehovah, baka aminy ty vaovao soa. Afaky hana finoa mantanjaky koa iha laha mivory miaraky amy ty vahoakiny. (Hebreo 10:24, 25) Tohizo avao ty ezaky anovinao hampifalia Jehovah, soa ho azonao ty fiaina, tsy ino raha zay fa ty ho velo tsy misy farany. Tsy misy raha soa mandilatsy ty hoe mifandramby soa amy Jehovah.—Vakio 1 Timoty 1:11; 6:19.