LESONA 15
Aiseā e Tatau ai Ona Faaauau Ona E Aʻoaʻoina Mea e Uiga iā Ieova?
1. E faapefea ona aogā iā te oe le faaauau pea o lau suʻesuʻega faale-Tusi Paia?
E mautinoa, o lenei aotelega o aʻoaʻoga faavae o le Tusi Paia e faamalosia ai lou alofa mo Ieova. E tatau ona tatou galulue ina ia faamalosia pea lenā alofa. (1 Peteru 2:2) E faalagolago lou faamoemoe i le ola e faavavau, i le faaauau ona e mafuta vavalalata atu i le Atua, e ala i le suʻesuʻeina o lana Afioga.—Faitau le Ioane 17:3; Iuta 21.
O le a faamalosia lou faatuatua a o tuputupu aʻe lou iloa e uiga i le Atua. E fesoasoani le faatuatua iā te oe ina ia faafiafia ai o Ia. (Eperu 11:1, 6) O le a uunaʻia ai oe ina ia salamō ma faia ni suiga aogā i le auala e te ola ai.—Faitau le Galuega 3:19.
2. E faapefea i lou iloa o le Atua ona maua ai e isi aogā?
O le tulaga masani lava, e te manaʻo e taʻu atu i isi mea ua e iloa, auā e tatou te fiafia uma lava e faamatala atu ni tala lelei. A o faaauau ona e suʻesuʻeina le Tusi Paia, o le a e iloa ai le auala e faaaogā ai le Tusi Paia, e faamatala atu ai ou talitonuga e uiga iā Ieova ma le tala lelei.—Faitau le Roma 10:13-15.
O le toʻatele o tagata, e muamua lava ona latou faamatala atu le tala lelei i uō ma tauaiga. Ae ia faautauta. Nai lo o le faapea atu e sesē a latou lotu, ia taʻu atu iā i latou folafolaga a le Atua. E lē gata i lea, ia manatua e sili atu ona maofa tagata i o tatou uiga agalelei, nai lo o mea e tatou te fai atu ai.—Faitau le 2 Timoteo 2:24, 25.
3. O le ā le faiā ma le Atua e mafai ona e maua?
O le suʻesuʻeina o le Afioga a le Atua, o le a fesoasoani iā te oe e tuputupu aʻe ai faaleagaga. Mulimuli ane, o le a e maua ai se faiā faapitoa ma Ieova, ma mafai ai ona avea moni oe ma sui o lona aiga.—Faitau le 2 Korinito 6:18.
4. E faapefea ona e agaʻigaʻi pea i luma?
E mafai ona e agaʻigaʻi i luma faaleagaga, pe a faaauau ona e suʻesuʻe i le Afioga a le Atua. (Eperu 5:13, 14) Ia talosaga atu i se tasi o Molimau a Ieova ina ia suʻesuʻe faatasi ma oe le Tusi Paia, e faaaogā ai le tusi O ā Aʻoaʻoga Moni a le Tusi Paia? O le tele lava e te aʻoaʻoina ai le Afioga a le Atua, o le tele foʻi lenā o le taulau manuia o lou olaga.—Faitau le Salamo 1:1-3; 73:27, 28.
O le tala lelei e mai iā Ieova le Atua fiafia. E mafai ona e mafuta vavalalata atu iā te ia, pe afai e te mafuta atu i ona tagata. (Eperu 10:24, 25) O le faaauau ona e faia o taumafaiga ina ia faafiafia Ieova, ua e aapa atu ai i le ola moni, o le ola lea e faavavau. O le mafuta vavalalata atu i le Atua, o le mea sili lava lea e mafai ona e faia.—Faitau le 1 Timoteo 1:11; 6:19.