Asingabati kutsi letimfundziso teliBhayibheli letisisekelo tilutfutfukisile lutsandvo lwakho ngaJehova. Lolutsandvo kudzingeka uchubeke usebentela kutsi luhlale lucinile. (1 Phetro 2:2) Kute uhlale unalelitsemba lekuphila lokuphakadze kufanele uchubeke usondzela kuNkulunkulu ngekutsi utadishe liVi lakhe.​—Fundza Johane 17:3; Juda 21.

Njengobe lwati lwakho ngaNkulunkulu lukhula, nekukholwa kwakho kutawucina. Kukholwa kutakusita kutsi ujabulise Nkulunkulu. (Hebheru 11:1, 6) Kutakwenta kutsi uphendvuke futsi wente lushintjo endleleni yakho yekuphila.​—Fundza Imisebenti 3:19.

Kutatentakalela kutsi ufune kutjela labanye ngaloko lokufundzako, njengobe vele sonkhe sikujabulela kutjela labanye tindzaba letimnandzi. Njengobe uchubeka nekufundza liBhayibheli, utawufundza nendlela yekulisebentisa kahle kute uchazele labanye ngekukholwa kwakho kuJehova nasetindzabeni letimnandzi.​—Fundza Roma 10:13-15.

Bantfu labanyenti bacala kushumayela ngetindzaba letimnandzi etihlotjeni tabo nakubangani babo. Kufanele usebentise kuhlakanipha nawutawenta njalo. Kunekumane nje ubatjele kutsi inkholo yabo ayikalungi, kufanele ubatjele ngetetsembiso taNkulunkulu. Khumbula futsi nekutsi imvamisa bantfu bajatjuliswa tento takho temusa kunaloko lokushoko.​—Fundza 2 Thimothi 2:24, 25.

Kufundza liVi laNkulunkulu kutawenta buhlobo bakho naJehova bukhule. Ngekuhamba kwesikhatsi, lobuhlobo bakho butawuba ngulobukhetseke kakhulu! Ecinisweni, utawuba yinceku yakhe futsi ujabulele nekuba lilunga lemndeni wakhe.​—Fundza 2 Khorinte 6:18.

Buhlobo bakho naNkulunkulu butawutfutfuka nawuchubeka nekutadisha liVi laNkulunkulu. (Hebheru 5:13, 14) Cela lomunye waboFakazi BaJehova kutsi akufundzele liBhayibheli asebentisa incwadzi letsi Lifundzisani Mbambambamba LiBhayibheli? Nawusolo uchubeka nekufundza liVi laNkulunkulu, nendlela yakho yekuphila itawuchubeka iphumelela.​—Fundza Tihlabelelo 1:1-3; 73:27, 28.

LiBhayibheli licuketse “tindzaba letimnandzi taNkulunkulu lojabulako.” (1 Thimothi 1:11, NW) Ungakwati kusondzela kuye ngekutsi ube sedvutane nebantfu bakhe. (Hebheru 10:24, 25) Ngekuchubeka wenta imetamo yekufuna kumjabulisa, utawube ukhombisa kutsi unesifiso sekutfola kuphila lokunguko sibili—kuphila lokuphakadze. Kusondzela kuNkulunkulu, kukuphela kwentfo lencono kakhulu longayenta.​—Fundza 1 Thimothi 6:19.