‘Oku ‘ikai ha veiveiua, ko e vakai fakalūkufua ko eni ki he ngaahi akonaki tefito ‘a e Tohi Tapú kuó ne fakaivimālohi‘i ho‘o ‘ofa kia Sihová. ‘Oku fiema‘u ki he ‘ofa ko ení ‘a hono fakatupulekina ma‘u pē. (1 Pita 2:2) Ko ho‘o ‘amanaki ki he mo‘ui ta‘engatá ‘oku fakatu‘unga ia pe te ke hokohoko atu ke ‘unu‘unu ofi ki he ‘Otuá ‘aki hono ako ‘ene Folofolá.​—Lau ‘a e Sione 17:3; Sute 21.

‘I ho‘o tupulaki ‘i he ‘ilo ki he ‘Otuá, ‘e hoko ai ho‘o tuí ‘o mālohi ange. ‘E tokoni‘i koe ‘e he tuí ke ke fakahōifua‘i ‘a e ‘Otuá. (Hepelū 11:1, 6) Te ne ue‘i koe ke ke fakatomala pea fai mo e ngaahi liliu ‘aonga ‘i ho‘o founga mo‘uí.​—Lau ‘a e Ngāue 3:19.

‘Oku fakanatula pē, ho‘o loto ke ke vahevahe ki he ni‘ihi kehé ‘a e me‘a kuó ke akó​—‘oku tau fiefia kotoa ‘i hono tala ha ongoongo lelei. ‘I ho‘o hokohoko atu hono ako ‘a e Tohi Tapú, te ke ako ai ki he founga ke ngāue‘aki ai ‘a e Tohi Tapú ke fakamatala‘i‘aki ho‘o tui kia Sihová pea mo e ongoongo leleí.​—Lau ‘a e Loma 10:13-15.

‘Oku kamata ‘a e kakai tokolahi tahá ‘aki hono vahevahe atu ‘a e ongoongo leleí ki he ngaahi kaume‘á pe ngaahi kāingá. Fai fakapotopoto. ‘I he ‘ikai ke pehē ‘oku hala ‘enau lotú, talanoa kiate kinautolu ‘o fekau‘aki mo e ngaahi tala‘ofa ‘a e ‘Otuá. Pehē foki, manatu‘i ‘oku fa‘a maongo ange ki he kakaí ‘a ho‘o ‘ulungaanga leleí ‘i he me‘a ‘okú ke lea‘akí.​—Lau ‘a e 2 Tīmote 2:24, 25.

Ko hono ako ‘a e Folofola ‘a e ‘Otuá te ne tokoni‘i koe ke ke tupu fakalaumālie. Faifai atu pē, ‘e lava ke ke kamata‘i ai ha vaha‘angatae makehe mo Sihova. ‘E lava ke ke hoko mo‘oni ai  ko e me‘a ‘a‘ana ‘i he tu‘unga ko ha mēmipa ‘o hono fāmilí.​—Lau ‘a e 2 Kolinitō 6:18.

‘E lava ke ke laka ki mu‘a fakalaumālie ‘i he hokohoko atu hono ako ‘a e Folofola ‘a e ‘Otuá. (Hepelū 5:13, 14) Kole ki ha taha ‘o e Kau Fakamo‘oni ‘a Sihová ke ne ako Tohi Tapu mo koe ‘o ngāue‘aki ‘a e tohi Ko e Hā ‘Oku Lava ke Ako‘i Mai ‘e he Tohi Tapú? Ko e lahi ange ho‘o ako mei he Folofola ‘a e ‘Otuá ko e lahi ange ia ‘a e lavame‘a ‘e ‘i ai ho‘o mo‘uí.​—Lau ‘a e Saame 1:1-3; 73:27, 28.

Ko e ongoongo leleí ‘oku ha‘u ia meia Sihova, ko e ‘Otua fiefia. ‘E lava ke ke ‘unu‘unu ofi ange kiate ia ‘aki ho‘o ‘unu‘unu ofi ange ki he‘ene kakaí. (Hepelū 10:24, 25) ‘I he hokohoko atu ho‘o ngaahi feinga ke fakahōifua‘i ‘a Sihová, ‘okú ke kakapa atu ai ki he mo‘ui mo‘oní​—‘a e mo‘ui ta‘engatá. Ko e ‘unu‘unu ofi ki he ‘Otuá ‘a e me‘a lelei taha mo‘oni ‘e lava ke ke faí.​—Lau ‘a e 1 Tīmote 1:11; 6:19.