GIHEVBULO 15
Khu ginani u yedego gu simama?
1. U nga phasega kharini khu gu simama gu hevbula Bhibhiliya?
Gu mwalo gukanakana nya gu khethu sihevbudzo sesi nya Bhibhiliya hi si wonego si tiyiside lihaladzo lago khu Jehovha. Lihaladzo leli la gu vbweta gu khala khu gu haguledwa. (1 Pedro 2:2) Gutumba gwago nya gu vbanye kala gupindruga gu na tadzisega wa gu simama gu hidzimeya ga Nungungulu khu gu hevbula Lito laye. — Hevbula Johane 17:3; Judha 21.
Guti gwago Nungungulu ga gu simama gu engedzeya, gukhodwa gwago gu na tiya ngudzu. Gukhodwa gu na gu phasa gu tsakisa Nungungulu. (Vahebheru 11:1, 6) Gu na gu kutsedzeya gu dzi sola u bwe u vbindrugedza mavbanyelo yago gasi u phasega. — Hevbula Mithumo 3:19.
2. Guti gwago Nungungulu gu na phasa kharini vambe?
U ngu kodza gu gira wupari nya guhathege ni Jehovha
Uwe khu wabune u na dzipwa na u gu kutsega gu bhuleya vambe esi u hevbulago kholu hatshavbo hi ngu tsaka khu gu bhula khu mahungu nya yadi. Tepo u simamago gu hevbula Bhibhiliya, u nati ndziya nya gu yi thumise gasi gu tshamuseya gukhodwa gwago khu Jehovha ni mahungu nya yadi. — Hevbula Varoma 10:13-15.
Vathu nya vangi va gu pheya khu gu bhuleya dzipari ni valongo mahungu nya yadi. Ganeya khu gurula. Vbavbandze nya gu va embeye gu khuwe tshetshe yawe khya malipha, ganeya khu situmbiso sa Nungungulu. Gambe dundruga gu khuwe tepo nya yingi vathu va gu tsakiswa khu wuwadi wago guvbindra esi u ganeyago. — Hevbula 2 Thimoti 2:24, 25.
3. Wupari muni u na wu manago ni Nungungulu?
Gu hevbula Lito la Nungungulu gu na gu phasa gu dandra liphuvboni. Khu guhegisa, u na mana wupari nya guhathege ni Jehovha. Khu lisine u na lumba Nungungulu kha nga givbango nya ndranga yaye. — Hevbula 2 Vakorinto 6:18.
4. Khu yevbi ndziya nya gu simame gu dandra liphuvboni?
Ndziya nya gu dandre u hongola mbeli liphuvboni khu gu simama gu hevbula Lito la Nungungulu. (Vahebheru 5:13, 14) Lomba mweyo nya Dzifakazi dza Jehovha gasi yi hevbula nago Bhibhiliya khu gu thumisa livru Ginani hi hevbudzwago khu Bhibhiliya? Wa gu simama gu hevbula u hongola mbeli, u na dugeleya guvbanyani gwago. — Hevbula Ndzimo 1:1-3; 73:27, 28.
Mahungu nya yadi ma guta khu ga Jehovha, Nungungulu nya gutsake. U na hidzimeya gwaye khu gu hidzimeya ga vathu vaye. (Vahebheru 10:24, 25) Khu gu simama gu dzi garadzeya gu tsakisa Jehovha, u na mana guvbanya nya lisine — guvbanya nya gupindruge. Khu lisine, gu hidzimeya ga Nungungulu gilo nya gyadi gu vbindra satshavbo u kodzago gu gira. — Hevbula 1 Thimoti 1:11, Tradução do Novo Mundo; 6:19.
You May Also Like
KHETHU VAMANI
Khu ginani hi hevbulago Bhibhiliya?
Bhibhiliya yi ngu ninga mihlamulo nya siwudziso nya lisima nya womi ga dzimiliyoni nya vathu mafuni gwatshavbo. U ngu tsakeya gu khala moyo wawe?
