MATAUPU 15
Kaia e ‵Tau o Tumau Koe i te Tauloto e Uiga ki te Atua?
1. Ka aoga pefea ki a koe tou tumau i te sukesuke ki te Tusi Tapu?
E seai se fakalotolotolua, me ne fakamalosi aka tou alofa ki a Ieova ne te fakamatalaga toetoe o akoakoga fakavae i te Tusi Tapu. E ‵tau eiloa o fakamalosi aka faeloa a te alofa tenei. (1 Petelu 2:2) A tou fakamoemoega ki te ola se-gata-mai e fakalagolago ki tou tumau i te fakapilipili atu ki te Atua e auala i te sukesuke ki tena Muna.—Faitau te Ioane 17:3; Iuta 21.
I te taimi e gasolo aka ei tou iloa e uiga ki te Atua, ka gasolo aka foki o malosi tou fakatuanaki. Ka fesoasoani atu te fakatuanaki ke fakafiafia ne koe te Atua. (Epelu 11:1, 6) Ka fakamalosi aka ei koe ke salamō kae fai a ‵fuliga aoga ki tou olaga.—Faitau te Galuega 3:19.
2. E aoga pefea ki nisi tino a mea ko iloa ne koe e uiga ki te Atua?
E mafai o maua ne koe se fesokotakiga fakapito mo Ieova
E masani eiloa o fia fakaasi atu ne koe ki nisi tino a mea ne tauloto ne koe—e ma‵nako katoa eiloa tatou o takutaku atu te tala ‵lei. I te taimi e tumau ei koe i te sukesuke ki te Tusi Tapu, ka tauloto ne koe a te auala e fakaaoga ei te Tusi Tapu ke fakamatala atu tou fakatuanaki ki a Ieova mo te tala ‵lei.—Faitau te Loma 10:13-15.
E kamata eiloa a te tokoukega o tino mai i te taku atu o te tala ‵lei ki taugasoa io me ko kāiga. Ke ata faipati atu. I lō te fai atu me e ‵se te lotou lotu, ke fakaasi atu ki a latou a fuafuaga a te Atua. Ke masaua foki me e masani o fia‵fia atu a tino ki au faifaiga atafai i lō au pati e fai atu.—Faitau te 2 Timoteo 2:24, 25.
3. Se a te fesokotakiga mo te Atua e mafai o maua ne koe?
A te sukesuke ki te Muna a te Atua ka fesoasoani atu ke gasolo aka tou malosi i te feitu faka-te-agaga. Fakamuli loa, e mafai o maua ne koe se fesokotakiga fakapito mo Ieova. E mafai eiloa o fai koe mo fai se tokotasi i tena kāiga.—Faitau te 2 Kolinito 6:18.
4. E mafai pefea o tumau koe i te gasolosolo atu ki mua?
E mafai o gasolo atu faeloa koe ki mua i te feitu faka-te-agaga mai i te tumau i te sukesuke ki te Muna a te Atua. (Epelu 5:13, 14) Ke fakamolemole atu ki se tokotasi o Molimau a Ieova ke suke‵suke fakatasi koulua ki te Tusi Tapu mai i te fakaaogaga o te tusi ko te Ne a Mea e Akoako ‵Tonu Mai i te Tusi Tapu? Ko te uke o mea e tauloto ne koe mai te Muna a te Atua, ko te momea aka foki o te manuia o tou olaga.—Faitau te Salamo 1:1-3; 73:27, 28.
E māfua mai eiloa te tala ‵lei mai i a Ieova, te Atua fiafia. E mafai o momea aka tou pili atu ki a ia mai i te fakapilipili atu ki ana tino. (Epelu 10:24, 25) Mai te tumau i au taumafaiga ke fakafiafia atu ki a Ieova, e kausaki atu eiloa koe ki te ola tonu—ko te ola se-gata-mai. A te fakapilipili atu ki te Atua ko te ‵toe mea ‵lei eiloa e mafai ne koe o fai.—Faitau te 1 Timoteo 1:11; 6:19.
You May Also Like
MATOU
Kaia e ‵Tau ei o Sukesuke ki te Tusi Tapu?
E tuku mai i te Tusi Tapu a tali ki toe fesili tāua i te olaga mō te fia miliona o tino i te lalolagi kātoa. E a, e manako koe ke aofia i a latou konā?
