Ruhanga owatuhangire natukiza obwenge. Ni Tata oyine rukundo kandi natufaho munonga. Akatuhanga atari kwenda ngu twehabure. (Yeremia 10:23) Ni ahabw’eco, nk’oku omwana ari kwetenga obuhabuzi bw’abazire, nitwe nitwenda obuhabuzi bwa Ruhanga. (Isaaya 48:17, 18) Emisinge ya Bibuli netuha obuhabuzi oburi kuruga ahari Ruhanga.​—Shoma omuri 2 Timoseo 3:16.

Ebiragiro n’emisinge bya Yehova nibitwegesa oku tushemerire kubaho kurungi hati kandi bitwereka oku turi kubasa kubaho ebiro byona. Ruhanga ni we watuhangire; ni ahabw’eco tushemerire kugendera aha buhabuzi bweye wenka.​—Shoma omuri Zaaburi 19:7, 11; Okushuuruurwa 4:11.

Emisinge ya Bibuli ni enyegesa ziri kutuha obuhabuzi omu mbera zona. Ebiragiro byo, nibituha obuhabuzi aha bintu ebigumire. (Eky’Ebiragiro 22:8) Tushemerire kutekateka ge rero tukuratiza buri musinge omu mbera zitari zimwe. (Enfumu 2:10-12) Ecokureberaho, Bibuli neyegesa ku amagara ari ekiconco eki Ruhanga yatuhire. Ogo musinge nigubasa kutuhabura twaba turi aha murimo, omu ka n’aha rugendo. Nigutuma twayerinda kuta amagara gitu omu kabi.​—Shoma omu Zaaburi 100:3.

Yesu akatuha ebiragiro bibiri kandi bikuru. Ec’okubanza nikishoborora ahabw’enki turiho: Kumanya Ruhanga, kumukunda n’okumukorera turi abesigwa. Eco kiragiro c’okubanza kishemerire kutuhabura omu bi turi kusharamu byona. (Enfumu 3:6) Abantu abari korobera eco  kiragiro nikibaretera okushemererwa, baba banywani ba Ruhanga kandi nayija kubaha amagara gatahwaho.​—Shoma omuri Matayo 22:36-38.

Ekiragiro ca kabiri, nikitwereka oku tushemerire kutura ge n’abandi. (1 Abakorinso 13:4-7) Nitubasa kurobera eco kiragiro, turi kutoreza Ruhanga omu kutwariza ge abandi.​—Shoma omuri Matayo 7:12; 22:39, 40.

Emisinge ya Bibuli neyegesa abagizire amaka oku bari kubasa kukundana. (Abakolosai 3:12-14) Nambwenu Ekigambo ca Ruhanga nikirinda amaka, ahabw’okuba nikigamba ku abatasine batashemerire kutana.​—Shoma omu Kutandika 2:24.

Ku turi kukuratiza enyegesa za Bibuli, nitubaho kurungi kandi tugira emitwarize mirungi. Ecokureberaho, abari kuronda abakozi ni baba nibenda abantu abari kukora n’amani kandi abesigwa. (Enfumu 10:4, 26; Abaheburaayo 13:18) Nambwenu, Ekigambo ca Ruhanga nikitwegesa okumarwa na bike ebi twine n’okuta omutima ahari Ruhanga kusinga eby’obutungi.​—Shoma omuri Matayo 6:24, 25, 33; 1 Timoseo 6:8-10.

Kugendera ahari Bibuli nibibasa kurinda amagara gitu. (Enfumu 14:30; 22:24, 25) Ecokureberaho, korobera ekiragiro ca Ruhanga c’okwerinda kusinda nibiturinda endwara n’okutomerana twaba tuvugire. (Enfumu 23:20) Yehova natwikiririza kunywa aha marwa, konka make. (Zaaburi 104:15; 1 Abakorinso 6:10) Emisinge ya Bibuli etwinire omugasho ahabw’okuba netwegesa kwerinda omu bi turi kukora n’ebi turi kutekerezaho. (Zaaburi 119:97-100) Konka, Abakristo tibari korobera ebiragiro bya Ruhanga bari kwenda kusha amagoba gabo. Nibabyorobera bari kwenda kuha Yehova ekitinisa.​—Shoma omuri Matayo 5:14-16.