Nosc Criator ie plu sapient de nëus. Ël ie n Pere che nes à gën y che se nteressea de nëus. Ël nes à nia crià per vester ndependënc da d’ël (Geremia 10:23, NM). Sciche n mut à de bujën de vester avisà dai genitores, nsci ons duc de bujën de vester avisei da Die (Isaia 48:17, 18, NM). Chësc ie puscibl tres i prinzips dla Bibia che ie n don de Die. (Lijëde 2 Timótee 3:16.)

I cumandamënc y i prinzips de Iehova nes nsënia la miëura maniera de viver y nes lascia speré te n daunì etern. Davia che Die nes à crià, iel zënzauter drët ti mustré recunescënza se lascian avisé da si nseniamënc. (Lijëde Salm 19:8, 12 [19:7, 11, NM]; Revelazion 4:11.)

I prinzips dla Bibia ie auriteies fundamenteles. Al incontra, vel i cumandamënc per situazions spezifiches (Deuteronome 22:8, NM). Per capì co mëter n droa n prinzip te na cërta situazion messons pensé do plu avisa (Proverbs 2:10-12, NM). Per ejëmpl, la Bibia nsënia che la vita ie n don de Die. Chësc prinzip fundamentel po’ nes judé a tò mesures de segurëza sun l lëur, te cësa y sun streda. (Lijëde Salm 100:3.)

Gejù ova metù l azënt sun doi prinzips de mascima mpurtanza. L prim auza ora l senificat dla vita: cunëscer y amé Die, y l servì cun fedeltà. Duta la dezijions che tulon, dassëssa tenì cont de chësc prinzip (Proverbs 3:6, NM). Chëi che l tën ite de cuer, po’  avëi n’amezizia cun Die, gran legrëza y la vita eterna. (Lijëde Mateo 22:36-38.)

L segondo prinzip po’ nes judé a avëi liams pazifics cun i autri (1 Corìntesc 13:4-7). Chëi che mët n droa chësc prinzip, se sforza de traté la persones sciche Die les trata. (Lijëde Mateo 7:12; 22:39, 40.)

I prinzips dla Bibia nsënia ala families co vester liedes dal amor (Colossésc 3:12-14). La Parola de Die straverda la families ti nsenian nce n auter prinzip mpurtant: l matrimone ie n liam che dura per for. (Lijëde Genesis 2:24.)

Viver aldò di prinzips dla Bibia nes straverda sibe dal pont de ududa materiel che emozionel. Per ejëmpl, chëi che dà da lëur, tol su plu gën persones che viv aldò di prinzips biblics de unestà y lezitënza (Proverbs 10:4, 26, NM; Ebrei 13:18). La Parola de Die nes nsënia nce de vester cuntënc cun chël che on de bujën per viver y de cunscidré l’amezizia cun Die de majer valor di scioldi y de nosc avëi. (Lijëde Mateo 6:24, 25, 33; 1 Timótee 6:8-10.)

Mëter n droa i prinzips dla Parola de Die fej na bona fazion sun nosta sanità (Proverbs 14:30, NM; 22:24, 25, NM). Per ejëmpl, la lege de Die contra la meladurvanza dl alcol nes straverda da malaties y da desgrazies sun streda (Romans 13:13). Iehova permët de bever buandes alcoliches, ma cun mesura (Salm 104:15; 1 Corìntesc 6:10). I prinzips dla Bibia ie per nosc bën ajache i nes nsënia a mëter verda nia mé a nosta azions ma nce a nosc pensieres (Salm 119:97-100). I drë cristians respetea la normes de Die nia mé per si bën, ma dantaldut per ti rënder unëur a Iehova. (Lijëde Mateo 5:14-16.)