11 YACHAQANA
Bibliaj yuyaychaykunasnin, ¿imaynatataj yanapawanchej?
1. ¿Imaraykutaj runas yanapata necesitanchej?
Bibliaj yuyaychasqan, ¿imaynasmantá yanapawanchej? (SALMO 36:9).
Jehová Diosqa may yachayniyoj, uj kʼacha Tata jinataj noqanchejmanta llakikun. Noqanchejqa mana sapallanchejmanta kausanapajchu ruwasqa kanchej (Jeremías 10:23). Imaynatachus uj wawa tatanpa yanapanta necesitan, ajinallatataj noqanchejpis Diospa yanapanta necesitanchej (Isaías 48:17, 18). Bibliaj yuyaychaykunasnenqa, Diosmanta uj regalo jina. 2 Timoteo 3:16 leey.
Jehová Diospa kamachiykunasnin, yuyaychaykunasnin ima, sumajta kausanapaj yanapawanchej. Chantapis imaynatachus qhepaman allin imasta japʼinata willawanchej. Pay ruwawasqanchejrayku kamachiykunasninta tukuy sonqo japʼikunanchejta munan. Salmo 19:7, 11; Apocalipsis 4:11 leey.
2. Bibliaj yuyaychasqan, ¿imaspitaj yanapawasunman?
Bibliaj yuyaychaykunasnenqa yanapanchej imatachus Diosninchej ruwananchejta munasqanta reparanapaj. Leyestajrí wakin kutis imatachus ruwanata willawanchej (Deuteronomio 22:8). Chayrayku sumajta entiendenanchej tiyan Diospa leyesninta, yuyaychaykunasninta ima. Ajinamanta allin yuyaywan imatapis ruwanapaj (Proverbios 2:10-12). Bibliaqa kausayninchej Diosmanta uj regalo kasqanta niwanchej. Chayta yachaytaj llankʼaypi, wasipi chayri viajashaspa, imatapis sumajta qhawarikuspa ruwanapaj yanapawanchej. Hechos 17:28 leey.
3. ¿Ima iskay kamachiykunataj aswan jatun?
Jesusqa chaymanta parlarqa. Ñaupaj kajqa rikuchiwanchej Diosta rejsinapaj, munakunapaj, payta servinapaj ima ruwasqa kasqanchejta. Chaytataj yuyarikunapuni tiyan (Proverbios 3:6). Chayta ruwaspaqa, Diospa amigosnin kasun, wiñay kausayta japʼisun, kusisqataj kausakusun. Mateo 22:36-38 leey.
Iskay kaj kamacheyqa, tukuywan allinta kausanapaj yanapawanchej (1 Corintios 13:4-7). Chay yuyaychayta kasukuspataj, runaswan Dios jina kʼachas kasunchej. Mateo 7:12; 22:39, 40 leey.
4. ¿Imaynatá Bibliaj yuyaychasqan yanapawanchej?
Bibliaj yuyaychaykunasnenqa, familiasta munanakunankupaj, ujchasqa kanankupajtaj yanapan (Colosenses 3:12-14). Chantapis qhariwarmi kajkunata yuyaychan wañupunankukama khuska kanankuta, chaytaj familiasta jarkʼan. Génesis 2:24 leey.
Bibliaj yuyaychaykunasninta kasukoyqa llankʼayniyoj, sonqo tiyasqas kanapajpis yanapawanchej. Runasqa trabajadoresta maskʼaspa, sumajta llankʼajkunata, mana suwakojkunata maskʼanku (Proverbios 10:4, 26; Hebreos 13:18). Chantapis Diospa Palabranqa pisi imasllawan kusisqa kanapaj, Diostataj ñaupajman churanapaj yanapawanchej. Mateo 6:24, 25, 33; 1 Timoteo 6:8-10 leey.
Bibliaj yuyaychaykunasnenqa, mana onqonapaj yanapallawanchejtaj (Proverbios 14:30; 22:24, 25). Diosqa Bibliapi niwanchej mana machananchejta. Chayta kasukuytaj onqoykunamanta, accidentesmanta ima jarkʼawanchej (Proverbios 23:20). Chaywanpis Diosqa uj chhikata ujyayta mana juchachanchu (Salmo 104:15; 1 Corintios 6:10). Bibliaqa yuyayninchejta jarkʼanapaj yanapawanchej, jinallataj allinta kausakunapajpis (Salmo 119:97-100). Chay kamachiykunatataj, Jehová Diosta jatunchayta munasqanchejrayku kasukunchej, nitaj allinninchejpaj kasqanraykullachu. Mateo 5:14-16 leey.
