Mulengi wesu ulaa busongo kwiinda ndiswe. Mbuli ndeende siluyando ulaandaba andiswe. Alubo tii akali makanze aakwe kuti tulyeendelezye. (Jeremiya 10:23) Mbuli mwana mbwayanda busolozi bwabazyaali, aswebo tuyanda busolozi buzwa kuli Leza. (Isaya 48:17, 18) Milawo iijanika muBbaibbele ilatusolweda, alimwi ncipego cizwa kuli Leza.​—Bala 2 Timoteo 3:16.

Milawo azyeelelo zyaJehova zitwiisya inzila yakupona kabotu kwalino alimwi mbotukonzya kujana zilongezyo zitamani mubuumi bwakunembo. Tweelede kuswiilila milawo yaLeza camoyo woonse nkambo nguwe wakatulenga.​—Bala Intembauzyo 19:7, 11; Ciyubunuzyo 4:11.

Zimwi njiisyo zyamuBbaibbele zitutondezya eezyo zyayanda Leza kuti tuzicite muzyiimo zisiyene-siyene. Imwi milawo ibeleka muzyiimo zyaambwa cilaantanganana. (Deuteronomo 22:8) Tweelede kubelesya maanu esu akuyeeya ikuti tubone mbwiibeleka milawo muzyiimo zisiyene-siyene. (Tusimpi 2:10-12) Mucikozyanyo, iBbaibbele liyiisya kuti buumi ncipo cizwa kuli Leza. Aaka kasimpe kalatugwasya kumulimu, kun’anda, alimwi mukweenda. Eezi zipa kuti tulikwabilile.​—Bala Incito 17:28.

Jesu wakaambula atalaa milawo yobilwe iyandikana loko. Wakutaanguna utondezya makanze mubuumi bwabantu  aayo akuti tuzibe Leza, tumuyande, alimwi tumukombe mukusyomeka. Mulawo ooyu tweelede kuubelesya notusala zyakucita cindi coonse. (Tusimpi 3:6) Aabo babelesya malailile aayo balaba beenzuma ba Leza, balajana kubotelwa kwacoonzyo alimwi bayoojana buumi butamani.​—Bala Matayo 22:36-38.

Mulawo wabili utugwasya kubaa luumuno mukubelekelaamwi abamwi. (1 baKorinto 13:4-7) Kubelesya malailile aaya kuswaanizya kutobelezya nzila Leza njaajatayo bantu.​—Bala Matayo 7:12; 22:39, 40.

Milawo iili muBbaibbele iyiisya mpuli mbozikonzya kubelekelaamwi caluyando. (baKolose 3:12-14) Alubo iJwi lyaLeza likwabilila mpuli kwiinda mukwiisya kamwi kasimpe kagwasya kakuti bantu bakwetene tabeelede kulekana.​—Bala Matalikilo 2:24.

Ikuti twatobela injiisyo zyamuBbaibbele, zilakonzya kutukwabilila munzila njitubonaa njiyo zintu ziyandikana mubuumi alimwi ambotulimvwa. Mucikozyanyo basikubelekelwa bayanda bantu bapona kweelanaa malailile azwa muBbaibbele aakusyomeka alimwi aakusungwaala. (Tusimpi 10:4, 26; baHebrayo 13:18) Alubo iJwi lyaLeza litwiisya kuti tube bakkutisikana azintu ziyandikana mubuumi alimwi tubikile maanu kapati kubweenzuma bwesu aLeza kwiinda zintu nzyotuyanda.​—Bala Matayo 6:24, 25, 33; 1 Timoteo 6:8-10.

Kubelesya malailile aazwa muBbaibbele kulabukwabilila buumi bwesu. (Tusimpi 14:30; 22:24, 25) Mucikozyanyo, kuswiilila mulawo waLeza atalaa kukolwa kulatukwabilila mumalwazi ajaya alimwi muntenda. (Tusimpi 23:20) Jehova ulazumizya kuti bantu kabanywa bukande cakutayindilizya. (Intembauzyo 104:15; 1 baKorinto 6:10) Malailile aLeza alatugwasya kuti tube ameendelo alikabotu. (Intembauzyo 119:97-100) Pesi banaKristo bacoonzyo tabaswiilili malailile aLeza ikuti bagwasyigwe mbabo abalikke. Bacita oobu kuti balemeke Jehova.​—Bala Matayo 5:14-16.