1-3. Kai si nggo idah Petrus i bas wari si penting e, janah kai si ialamina i bas berngina?

IKAYUH Petrus perahuna asa ngasupna janahna natap langit si gelap. Enggo nge mulai teridah sinalsal i arah timur, tanda wari mulai terang? Enggo igejapna mesui gurungna ras barana erkiteken nggo erjam-jam ngkayuh perahu. Angin si rembus ku bukna nggo erban Dano Galilea ergalumbang. Galumbang-galumbang e ngentam perahu, janah kerina daging Petrus pe bernak erkiteken isembur lau si mbergeh. Terus ikayuhna perahuna.

² I bas sada ingan i tepi dano, Petrus ras teman-temanna nggo nadingken Jesus sisada. I bas wari e, idah kalak enda Jesus mere man ribun kalak si melihe alu piga-piga roti ras ikan. Asilna, iusahaken jelma si nterem njadiken Jesus raja, tapi la ia nggit terlibat politik. Ipastikenna ka gelah la lit sura-sura si bage i bas diri ajar-ajarna. Gelah la ipaksa jelma si nterem, isuruhna ajar-ajarna minter nangkih ku perahu ras ngepar ku pantai si deban, sedangken ia sisada nangkih ku deleng guna ertoto.—Mrk. 6:35-45; oge Johanes 6:14-17.

³ Bulan, si nandangi purnama raya, meganjang i datas langit paksa ajar-ajar e berkat; gundari bulan e nusur ku arah barat. Tapi, si nggo idalani kalak enda piga-piga kilometer saja ngenca. Erkiteken latih erdahin ras angin si erdeso bage pe sora galumbang, mesera iakap kalak e ercakap-cakap. Banci saja, Petrus sangana rukur sisada.

4. Engkai maka Petrus patut man usihen?

 ⁴ Melala kal kejadin si banci iukurina! Enggo lebih dua tahun Petrus ikut ras Jesus kalak Nasaret, pasti melala kejadin ialamina. Enggo melala si ipelajarina, tapi melala denga ka si man pelajarenna. Erkiteken nggit erlajar, nggit erjuang ngelawan tantangen bagi perasan mbiar ras la tetap ukur, erban ia patut man usihen. Mari sinen.

5, 6. Kegeluhen si uga si idalani Petrus?

⁵ La terlupaken Petrus wari paksa ia jumpa ras Jesus. Seninana, Andreas, si tangtangna maba berita si erban sengget e, nina, ”Kami enggo jumpa ras Mesias.” Kata-kata e tuhu-tuhu ngubah kegeluhen Petrus.—Joh. 1:41.

⁶ Petrus tading i Kapernaum, kuta i tepi Dano Galilea. Ia ras Andreas bage pe Jakup ras Johanes, anak-anak Sebedeus, ersada i bas usaha penangkapen nurung. Selain ndeharana, si tading sada rumah ras Petrus eme mamina ras Andreas. Selaku nelayan si arus ncukupi keperlun keluargana, pasti perlu ia erbintuas janah cerdik. Ukuri, nelayan-nelayan erbintuas tiap berngi erjam-jam dekahna, ngamburken jala i kelang-kelang dua perahu janah narik tangkapen kai pe i bas dano e nari. Ukuri ka kalak enda mejingkat erdahin i bas ciger wari, milih ras erdaya nurung, mpekena ras mbersihken jala.

7. Kai si ibegi Petrus kerna Jesus, janah ngkai maka penting kal berita e?

⁷ Menurut Pustaka si Badia, Andreas eme ajar-ajar Johanes Peridiken. Pasti semangat kal Petrus megiken laporen seninana kerna berita si ipeseh Johanes. I bas sada wari, Andreas ngidah Johanes nuduhken tanna ku Jesus kalak Nasaret asum ngataken, ”Enda me Anak Biri-biri Dibata.” Mis Andreas jadi pengikut Jesus janah alu ergiah-giah ipebetehkenna man Petrus berita si seh kal pentingna enda: Mesias nggo reh! (Joh. 1:35-40) Kenca pemberontaken i Eden kira-kira 4.000 tahun ope si e, ijanjiken Dibata Jahwe maka reh pagi pribadi si istimewa guna mereken arapen situhu-tuhu man manusia. (Kej. 3:15) Enggo jumpa Andreas ras Juru Selamat, eme Mesias e! Mis ka Petrus njumpai Jesus.

8. Kai erti gelar si ibereken Jesus man Petrus, janah ngkai lit denga si mpersoalken kerna pilihen gelar e?

⁸ Ope si e, Petrus itandai alu gelar Simon, ntah pe Simeon. Tapi, itatap Jesus ia janah nina, ”’Kam kap si Simon anak Johanes, tapi pagi kam igelari Kepas.’ (Kepas cakap Heber bali ras Petrus i bas cakap Junani.)” (Joh. 1:42) ”Kepas” eme kata benda  umum si ertina ”batu”, ntah pe ”batu karang”. Kemungkinenna, kata-kata Jesus e sada nubuat. Iperdiatekenna maka Petrus pagi bali bagi batu karang si jadi pengaruh si tetap, paguh, janah banci iteki pengikut Kristus si deban. Bage nge pengakapen Petrus kerna dirina? Kemungkinenna lang. Malahen, piga-piga si ngoge Injil gundari enda la ngenehen Petrus selaku pribadi si paguh. Lit si ngatakenca maka bagi si teridah i bas cataten Pustaka, Petrus la tetap pendirinna, monce-once, ras mobah-obah.

9. Kai si idarami Jahwe ras AnakNa, janah menurutndu, ngkai arus siteki caraNa rukur?

⁹ Payo, lit kelemahen Petrus. Banci idah Jesus kelemahenna e. Tapi, bagi Bapana, Jahwe, lalap idarami Jesus kai si mehuli i bas manusia. Iperdiateken Jesus maka melala sifat mehuli si lit i bas Petrus, janah iusahakenna nampati ia mpebelin sifat-sifat e. Idarami Jahwe ras AnakNa hal-hal si mehuli i bas dirinta gundari. Banci saja siakap maka la melala hal si mehuli si banci idatNa i bas dirinta. Tapi, arus kita tek nandangi cara rukur Jahwe ras Jesus janah sicidahken kita nggit iajari ras ibentuk bagi Petrus.—Oge 1 Johanes 3:19, 20.

10. Mbelin kemungkinenna kai si idah Petrus, tapi kai mulihken dahinna?

¹⁰ Mbelin kemungkinenna Petrus ikut i bas piga-piga perdalanen guna erberita si ilakoken Jesus kenca si e. Emaka, banci jadi idahna Jesus erban mukjizatna si pemena, eme ngubah lau jadi anggur i bas kerja erdemu bayu i Kana. Si terpentingen, ibegina berita si luar biasa janah si mereken arapen kerna Kinirajan Dibata si ipeseh Jesus. Aminna pe bage, labo terus Petrus ikut ras Jesus erkiteken mulihken ia jadi nelayan. Tapi, piga-piga bulan kenca si e, jumpa mulihi Petrus ras Jesus, janah gundari iundang Jesus ia gelah igunakenna geluhna lako erberita ras Jesus.

11, 12. (a) Kai si ialami Petrus sanga sada berngin ndarami nurung? (b) Penungkunen kai saja si lit i bas perukuren Petrus sanga megiken Jesus?

¹¹ Enggo sada berngin latih kal iakap Petrus erdahin tapi la lit asilna. Mulih-ulih piga-piga nelayan ngamburken ras narik jalana, tapi sia-sia. Pasti nggo igunaken Petrus kerina pengalamen ras kebeluhenna gelah banci datna nurung, icubakenna i bas erbage ingan ndarami nurung si paksana man. La isangsiken, bagi nterem nelayan si debanna, maun-maun iarapna banci itatapna tembus ku lau si melitek e gelah banci idahna nurung ntah pe isuruhna nurung e masuk ku jalana. Pasti, perukuren si bage erban ia reh kecewana saja. Petrus nangkap nurung labo erkiteken kesenangenna saja tapi guna ncukupi keperlun keluargana.  Dungna, mulihken ia ku pantai alu la maba kai pe. Tapi, jala arus tetap ibersihken. Emaka, paksa Jesus reh ndahi ia, sangana ia erdahin.

¹² Enterem kalak siasak-asaken ngkeleweti Jesus, janah alu tutus megiken pengajarenna. Erkiteken ikeleweti jelma si nterem, nangkih Jesus ku perahu Petrus janah ipindona gelah ikayuh Petrus perahuna sitik terdauhen. Alu sora si jelas terbegi erkiteken ipantulken lau, iajari Jesus kerina kalak e. Tutus kal ate Petrus megikenca, bage ka pe kalak si lit i bas pantai e. La ia ermedu-medu megiken Jesus nuriken tema utama beritana eme Kinirajan Dibata. Tuhu-tuhu sada kinihamaten si mbelin banci nampati Kristus mpebelang berita enda ku kerina negeri! Tapi, masuk akal nge e banci ilakokenna? Uga kerna keperlun kalak e tep-tep wari? Banci saja teringet Petrus mulihi nandangi berngi si mbaru denga idalanina si la lit ulihna.—Luk. 5:1-3.

13, 14. Mukjizat kai si iban Jesus man Petrus, janah kai tanggapen Petrus?

¹³ Kenca dung Jesus ngerana, nina man Petrus, ”Baba perahundu tertengahen ku ingan si mbages. Amburkenlah jalandu guna nangkap nurung.” Alu sangsi, ngaloi Petrus, ”O Guru, sada berngi enda latih kal akap kami erdahin, kai pe la lit dat kami! Tapi adi kam kal nuruhsa banci kuamburken jala e.” Edenga kal ibersihken Petrus jalana. Pasti, la atena mpesusur jala e mulihi, terlebih ka gundari sangana nurung la ndarami nakan! Aminna pe bage, patuh ia, kemungkinen janahna mereken tanda man teman-teman i perahu si peduaken gelah ngikutken ia.—Luk. 5:4, 5.

¹⁴ Mulai itarik Petrus jalana, janah alu la iarapna mberat kal jala e. Alu la tek, itarikna tergegehen, janah la ndekah kenca si e, banci idahna melala kal nurung kateper i bas jalana! Mis ikiapina teman-temanna si lit i bas perahu si deban gelah reh nampati. Kepeken, sada perahu saja la siat. Isina duana perahu e, tapi nurung e mbuesa, emaka perahu-perahu e pe menam gedap. Jengang kal Petrus. Pernah idahna kuasa Kristus erdahin, tapi kemungkinenna mukjizat enda itujuken man bana! Cuba ukuri, dilaki enda pe banci erban nurung masuk ku jala! Mulai Petrus mbiar. Erjimpuh ia janah nina, ”O Tuan, laweslah kam i bas aku nari! Aku kalak perdosa kap!” La iakapna patut ia rembak ras Pribadi si ngasup nggunaken kuasa Dibata.—Oge Lukas 5:6-9.

15. Uga Jesus ngajari Petrus maka la lit alasen la tetap ukurna janah mbiar?

 ¹⁵ Alu mehuli ikataken Jesus, ”Ola kam mbiar, mulai genduari nari kam jadi penjala jelma.” (Luk. 5:10, 11) Enda labo waktuna la tetap ukur ntah pe mbiar. La lit alasen Petrus la tetap ukurna kerna pendahinna tep-tep wari bagi nangkap nurung, janah kebiarenna kerna kesalahen ras kekurangenna pe la lit alasenna. Arus ilakoken Jesus pendahin si mbelin, sada pelayanen si nandangi ngubah sejarah. Jesus ngelayani Dibata si ”simpar pengalemi dosa i bas Ia”. (Jes. 55:7) Pasti isikapken Jahwe keperlun Petrus, jasmani bage pe rohani.—Mat. 6:33.

16. Uga tanggapen Petrus, Jakup, ras Johanes nandangi undangen Jesus, janah ngkai e keputusen si mehulina?

¹⁶ Mis itanggapi Petrus, Jakup, ras Johanes. ”Kenca ikayuhna  perahu e ku tepi, emaka itadingkenna me e kerina, jenari ikutkenna Jesus.” (Luk. 5:11) Petrus tek man Jesus bage pe man Pribadi si ngutus Jesus. Enda me keputusen si mehulina i bas geluhna. Gundari enda, kalak Kristen si erjuang ngelawan perasan mbiar ras sangsi guna ngelayani Dibata pe ncidahken kiniteken. Kalak si ernalem man Jahwe la banci kecewa.—Msm. 22:5, 6.

17. Kai saja si nggo ialami Petrus i bas dua tahun kenca ia jumpa ras Jesus?

¹⁷ Kira-kira dua tahun kenca jumpa ras Jesus, Petrus sangana ngkayuh perahuna i Dano Galilea bagi si nggo ituriken. Berngi e, meter kal angin. Pasti la banci sieteh kenangen kai si lit i bas ukurna. Seh kal buena! Enggo ipepalem Jesus mami Petrus. Enggo ipesehna Khotbah i Deleng. Mulih-ulih, arah ajaren ras pendahinna si dem alu kuasa, nggo icidahkenna maka ia Mesias, Kalak si Ipilih Jahwe. Erbulan-bulan kenca si e, kelemahen Petrus bagi menukah mbiar ras la tetap ukur, pasti nggo erkurangna. Janah nggo ipilih Jesus ka Petrus jadi salah sada rasulna! Tapi, kentisik nari ieteh Petrus maka lenga banci tuhu-tuhu ilawanna ukurna si la tetap bage pe perasan mbiar.

18, 19. (a) Turiken kai si idah Petrus i Dano Galilea. (b) Kai si ilakoken Jesus nandangi pemindon Petrus?

¹⁸ Paksa tekuak manuk, ntah pe kira-kira antara jam 3.00 erpagi-pagi ras matawari pultak, rempet Petrus ngadi ngkayuh perahuna janah pajek perkundulna. I jah, i balik galumbang, lit si erkemuit! Semburen galumbang si mantulken sinalsal bulan nge e? Labo, erkiteken awih e la mugur-ugur ngikutken galumbang, janah pajek. Kepeken e jelma! Ue, jelma, janah ia sangana erdalan i babo lau! Kenca reh deherna, tempa-tempa ilewatina atena kalak e. Erkiteken seh kal biarna, iakap ajar-ajar e ia begu. Nina jelma e ndai, ”Tetapkenlah ukurndu! Aku kap enda, ola kam mbiar!” Kepeken ia Jesus!—Mat. 14:25-28.

¹⁹ Jabap Petrus, ”O Tuan, adi kam kin e, suruhlah aku erdalan i babo lau ndahi kam.” Tanggapenna si meter e ncidahken ia kalak si perpang. Jengang ia ngidah mukjizat si luar biasa enda, emaka gelah reh paguhna kinitekenna, igejapkenna atena mukjizat e. Alu mehuli, isuruh Jesus ia reh. Nusur Petrus i bas perahuna nari ku babo lau si ergalumbang. Banci siukuri uga perasan Petrus paksa piher iperjakna lau e janah cinder ia i je. Pasti jengang kal ia janahna erdalan ndeheri Jesus. Tapi, lit perasan si deban si nandangi ngkuasai ia.—Oge Matius 14:29.

20. (a) Engkai maka lanai bulat ukur Petrus man Jesus, janah kai akibatna? (b) Pelajaren kai si ibereken Jesus man Petrus?

 ²⁰ Perlu tetap bulat ukur Petrus man Jesus. Alu nggunaken kuasa Jahwe, Jesus si erban Petrus banci tetap erdalan i babo lau. Janah, ilakokenna e erkiteken tanggapenna nandangi kiniteken Petrus man bana. Tapi, mulai Petrus erdua ukur. Sioge, ”Asum igejapna meter angin, mbiar ia.” Idah Petrus uga galumbang ngentam perahu ras nemburken lau bage pe ugup. Enda erbanca mulai ia mbiar. Banci saja iakapna ia nggo gedap i dano e. Asum ia mbiar, reh kurangna kinitekenna. Dilaki si igelari Batu Karang erkiteken lit kiningasupenna guna jadi paguh e mulai gedap bagi batu erkiteken monce kinitekenna. Petrus sekalak si beluh erlangi, tapi gundari la iandalkenna kengasupenna e. Serko ia, ”O Tuan sampati aku!” Itangkap Jesus tanna janah itarikna. Kenca si e, asum i babo lau denga, ijelaskenna pelajaren si penting enda man Petrus, ”O kam si kurang kiniteken, ngkai maka la tetap ukurndu?”—Mat. 14:30, 31.

21. Engkai maka bahaya adi la tetap ukurta, janah uga kita banci ngelawansa?

²¹ ’La tetap ukur’, kata-kata si seh kal cocokna! La tetap ukur tuhu-tuhu banci ncedai. Adi terus la tetap ukurta, kinitekenta banci reh lemahna janah dungna bene. Arus silawan e asa ngasupta! Carana? Alu tetap sijaga perukuren si benar. Adi terus siukuri kai si erbanca kita mbiar, si erbanca kitik ukurta, si erbanca lanai bulat ukurta man Jahwe bage pe man AnakNa, enda banci erban lanai tetap ukurta. Adi bulat ukurta man kai si nggo, si paksana, ras si nandangi ilakoken Jahwe ras AnakNa kempak kalak si ngkelengi Ia, kinitekenta la banci erkurangna erkiteken la tetap ukur.

22. Engkai patut iusih kiniteken Petrus?

²² Asum iikutken Petrus mulihken Jesus ku perahu, angin si meter e ngadi. Dano Galilea mulai tenang. Nina Petrus ras ajar-ajar si debanna, ”Tuhu-tuhu me kam Anak Dibata!” (Mat. 14:33) Sanga mulai pultak matawari i dano e, pusuh Petrus pasti dem alu pengataken bujur. Ilawanna perasan mbiar ras la tetap ukur. Payo, melala denga perubahen si arus ibanna ope denga jadi kalak Kristen si paguh bagi batu karang, bagi si idah Jesus i bas dirina. Tapi, ertekad ia terus ncubakenca, gelah terus reh paguhna. Bage ka nge tekadndu? Pasti kam setuju kiniteken Petrus tuhu-tuhu patut iusih.