1-3. Petrus okwa mono shike esiku ndyoka, nokwa ningilwa shike uusiku mboka?

PETRUS okwa li ta dhugu owato noonkondo dhe adhihe. Sho a tala kokule kashona, okwa li e wete taku yele. Mbela uuyelele mboka a li e wete kuuzilo oweluwa tali tende? Oontumba dhe dhomapepe nodhombunda odha li tadhi ehama kokudhuga owato uusiku awuhe. Ombepo ndjoka ya li tayi yalalitha omafufu ge oya pindjaleke Efuta lyaGalilea. Omakuthikuthi oga li taga dhenge owato noonkondo nomeya omatalala oga li taga shanukile kuye. Ihe okwa li a tsikile okudhuga.

² Petrus naalongwa ooyakwawo oya li ya thigi Jesus komunkulo oye awike. Esiku ndyoka oya li ya mono Jesus ta palutha oongundu dhaantu omayuvi niikwiila noohi oonshona. Osha ningitha aantu ya kale ya hala okuninga Jesus omukwaniilwa, ihe ka li a hala okukutha ombinga mopolotika. Okwa li wo a tokola okukaleka aalanduli ye kokule nopolotika. Okwa yi ongundu ndjoka ontuku e ta lombwele aalongwa ye ya ye mowato ya tetekele komunkulo gwahandiyaka, manga ta yi kondundu oye awike a ka galikane. —  Mark. 6:35-45; lesha Johannes 6:14-17.

³ Sho aalongwa ye ya tameke okudhuga, omwedhi ogwa li natango pokati kegulu, ihe ngashingeyi ogwa li gu li kuuninginino. Ihe inaya adhika ya dhuga oshinano oshile. Osha li oshidhigu okukala yu uvitathane, omolwombepo ondhigu ndjoka ya li tayi pepe noonkondo nosho wo omakuthikuthi ngoka tagi idhenge muyo ngoka ge shi ningitha ya dhuge nuudhigu. Otashi vulika Petrus a li ti ipula niinima oyindji.

4. Omolwashike oshiwanawa kutse okulandula oshiholelwa shaPetrus?

⁴ Ka li tuu e na oshindji okudhiladhila! Petrus okwa li a tsakanene naJesus Omunasareti oshikando shotango oomvula mbali dha piti. Moomvula  moka omwa li mwa ningwa iiningwanima oyindji. Okwa li i ilongo oshindji, ihe okwa li e na okwiilonga oshindji natango. Okwe tu tulila po oshiholelwa oshiwanawa mokukala a hala okwiilonga oshindji, opo a vule okukondjitha omalimbililo nosho wo uumbanda. Natu tale kutya okwe shi ende ngiini.

5, 6. Onkalamwenyo yaPetrus oya li ya tya ngiini?

⁵ Petrus iha dhimbwa nando esiku a tsakanena naJesus lwotango. Omumwayina, Andreas, okwa li e mu lombwele tango onkundana ombwanawa a ti: “Otse otwa mono Kristus nokutya Omugwayekwa.” Konima yaashoka, onkalamwenyo ye oye ende tayi lunduluka noinayi kala we ngaashi ya li nale. —  Joh. 1:41.

⁶ Petrus okwa li a kala moshilando Kapernaum, sha kala kuumbangalantu womunkulofuta gwetale hali ithanwa Efuta lyaGalilea. Ye naAndreas oya li ookuume kaJakob naJohannes, aana yaSebedeus, mboka ya li aayuli yoohi. Petrus ka li owala a kala pamwe nomukadhi, ihe okwa li wo pamwe nayinamweno nomumwayina Andreas. Opo e ya yambidhidhe, okwa li e na okulonga nuudhiginini iilonga yokuyula oohi, mbyoka tayi pula oonkondo nuunkulungu. Dhiladhila owala kutya oya li haya longo omausiku ogendji ge thike peni, tayu umbile iiyulitho momeya pokati koowato mbali, noku yi nana mo ya kuthe mo oohi ndhoka ya kwata mo. Dhiladhila wo koowili ndhoka ya li haya longo nuudhiginini omutenya, taya hogolola oohi moonkwawo noku dhi landitha nosho wo okuhondja nokwoopaleka oonete.

7. Petrus okwa lombwelwa shike kombinga yaJesus, nomolwashike onkundana ndjoka ya li tayi nyanyudha?

⁷ Ombiimbeli otayi ti kutya, Andreas okwa li omulongwa gwaJohannes Omuninginithi. Osha yela kutya Petrus okwa li ha pulakene neitulomo enene komahokololo gamumwayina kombinga yetumwalaka lyaJohannes. Esiku limwe Andreas okwa li a mono Johannes tu ulike kuJesus ta ti: “Tala, Onzigona yaKalunga.” Nziya Andreas okwa ningi omulanduli gwaJesus nokwa li a lombwele Petrus onkundana ndjika ombwanawa kutya okwa mona Mesiasa. (Joh. 1:35-40) Konima yokwaavulika kwaantu moshikunino shaEden, oomvula 4 000 lwaampono dha pita, Jehova Kalunga okwa li u uvaneke kutya opwa li tapu ke ya omuntu i ikalekelwa ngoka ta ka pa aantu etegameno lyashili. (Gen. 3:15) Omuntu nguka oye Omuhupithi nenge Mesiasa ngoka a li a monika kuAndreas. Petrus naye okwa li e endelele a ye kuJesus.

8. Edhina ndyoka Jesus a luku Petrus otali ti shike, nomolwashike yamwe ya limbililwa kutya okwe li pelwa shike?

⁸ Petrus okwa li hi ithanwa Simon nenge Simeon. Ihe Jesus okwe mu tala e ta ti: “‘Ongoye Simon yaJohannes; oto ki ithanwa Kefas,’ ndyoka tali ti Petrus.” (Joh. 1:42) Edhina “Kefas” olya kuthwa koshityadhina tashi ti “emanya.” Osha yela kutya oohapu dhaJesus odha li  dhopahunganeko. Okwa li ta hunganeke kutya Petrus ota ka kala a fa emanya, ano a kola, omudhiginini nomwiinekelwa mokati kaalanduli Ye. Mbela Petrus osho a li i itala ko ngawo? Hasho nando. Nokuli naaleshi yokunena yOmavaangeli inaye mu tala ko a fa emanya. Yamwe ohaya ti nokuli kutya Ombiimbeli oya fa tayi ulike kutya okwa li ha tengauka, kee shi omudhiginini nokee na omakankameno.

9. Jehova nOmwana ohaya tala kushike maantu, nomolwashike tu na okwiinekela etaloko lyawo?

⁹ Petrus naye okwa li ha ningi omapuko. Jesus okwa li e ga shi. Ihe Jesus okwa fa He, Jehova, ngoka ha tala aluhe kuuwanawa momuntu. Jesus okwa li a mono kutya Petrus oku na omaukwatya ogendji omawanawa nokwa li a hala oku mu kwathela e ga ulike. Nokunena, Jehova nOmwana ohaya tala komaukwatya getu omawanawa. Otashi vulika tu kale tatu dhiladhila kutya itaya ka mona mo omaukwatya omawanawa mutse. Ihe otwa pumbwa okwiinekela etaloko lyawo nokukala twa hala okudheulwa nokuzulwa ngaashi Petrus. —  Lesha 1 Johannes 3:19, 20.

10. Petrus okwa li a mono shike, ihe okwa li a shuna peni?

¹⁰ Otashi vulika Petrus a li a yi naJesus molweendo lwokuuvitha ndoka lwa ka landula ko. Otashi vulika a li a mono sho Jesus ta longo oshikumithalonga she shotango shokushitukitha omeya omaviinu pohango muKaana. Ihe shoka sha simana noonkondo kuye, etumwalaka ewanawa notali gandja etegameno tali popi kombinga yUukwaniilwa waKalunga ndyoka a li u uvu. Ihe nonando ongaaka, ina tsikila okweenda naJesus. Okwa shuna kongeshefa ye yokuyula oohi. Ihe konima yoomwedhi dhontumba, Petrus okwa li a tsakanene ishewe naJesus. Jesus okwa li e mu hiya a kale tu uvitha pamwe naye ethimbo alihe.

11, 12. (a) Petrus okwa li a longo shike uusiku awuhe, ihe ina pondola sha? (b) Oohapu dhaJesus odha li dha dhiladhilitha Petrus shike?

¹¹ Petrus okwa adhika owala opo a mana okulonga iilonga mbyoka iidhigu uusiku awuhe, ihe ina pondola sha. Aayuli yoohi oya li taya umbile oonete dhawo mefuta, ihe inaya yula sha. Otashi vulika Petrus a li a longitha uunongo we awuhe, ta kambadhala okuumbila onete pomahala gi ili nogi ili a mone mpoka tadhi lile, opo a vule oku dhi yula. Otashi vulika omathimbo gamwe a li ha kala a hala ando a kale e wete kohi yomeya a mone mpoka ongundu yoohi yi li nenge a hala e dhi ningithe dhi ye monete ye. Ihe ngele okwa kala ta dhiladhila ngaaka otashi ke mu uvitha owala nayi. Petrus ka li ta yulu oohi i inyanyudhe, ihe okwa li te shi ningi a paluthe aanegumbo lye. Hugunina okwa tula pomunkulofuta kee na nando ohi yimwe. Okwa li e na okwoopaleka oonete. Sho Jesus e ya po osho a adhika ta ningi.

¹² Aantu oyendji oya li ya ngundumanena Jesus ya pulakena oohapu dhe. Molwaashoka opwa li aantu oyendji, okwa lombwele Petrus a humithe owato momeya. Okwa tameke okulonga aantu newi lya yela  nawa. Petrus okwa li ta pulakene neitulomo ngaashi aantu mboka ye li komunkulofuta. Kasha li hashi mu lolodha okuuva Jesus ta popi kombinga yetumwalaka lya simana lyUukwaniilwa waKalunga. Kasha li tuu tashi ka kala uuthembahenda uunene kuye okukwathela Kristus a taandelithe etumwalaka lyetegameno moshilongo ashihe! Ihe ota ka vula ngaa oku shi ninga? Ota ka palutha ngiini aanegumbo lye? Otashi vulika a li a dhiladhila kunkene a li a longo uusiku awuhe, ihe ina kwata sha. —  Luk. 5:1-3.

13, 14. Oshikumithalonga shini Jesus a li a longele Petrus, na Petrus okwa li i inyenge ngiini?

¹³ Sho Jesus a mana okupopya, okwa li a lombwele Petrus a ti: “Dhugila owato lwopuule, ne mu umbile iiyulitho yeni momeya, mu tameke okuyula.” Petrus okwa li e shi limbililwa noonkondo. Okwa ti kuJesus: “Muhongi, otwi ihepeke uusiku auhe nokulonga, ihe inatu kwata nando osha. Ihe ngashingeyi iiyulitho otandi yi umbile mo molwelombwelo lyoye.” Petrus okwa adhika opo a mana okuyoga oonete. Osha li tashi monika mokupopya kwe kutya ka li a hala oku dhi umbila mo ishewe, unene tuu ngashingeyi sho oohi itaadhi li we. Otashi vulika a li a lapa aayuli ooyakwawo mboka ye li mowato ontiyali ye mu landule. —  Luk. 5:4, 5.

¹⁴ Petrus opo owala e yi umbile mo, okwa li nale u uvite sho ya dhigupala. Nonkumwe onene, okwa hili noonkondo dhe adhihe nokwa li a mono oohi odhindjidhindji tadhi wilauka monete. Okwe endelele a lombwele aalumentu yomowato ontiyali ye ye ye mu kwathele. Manga taye ya, oya mono kutya oohi ndhoka itadhi gwana mowato yimwe ayike. Odhu udha oowato adhihe mbali, ihe oowato odha tameke okuningina, molwaashoka odha li odhindji noonkondo. Petrus okwa li a kumwa noonkondo. Okwa li nale a mona Kristus ta longo iikumithalonga, ihe oshikumithalonga shika osha li she mu etele uuwanawa naanegumbo lye. Mepingathano naPetrus, Jesus okwa li e na oonkondo dhokuningitha oohi dhi ye moonete. Petrus okwa kwatwa kuumbanda. Okwa tsu oongolo e ta ti: “Omuwa, za po pungame, oshoka ngame omulumentu omulunde!” Mbela ota ka vula ngaa okukala a gwana okweendathana nomuntu ngoka a pewa oonkondo kuKalunga e dhi longithe momukalo gwa tya ngaaka? —  Lesha Lukas 5:6-9.

15. Ongiini Jesus a li a longo Petrus kutya ina pumbwa okukala a limbililwa nokukala a tila?

¹⁵ Jesus okwe mu lombwele nombili a ti: “Ino tila, okuza ngashingeyi oto ningi omuyuli gwaantu.” (Luk. 5:10, 11) Ndika kali shi ethimbo lyokukala wa limbililwa nenge wa tila. Petrus okwa li owala a  pumbwa okugandja eitulomo kiilonga yokuuvitha mbyoka ya simana pehala lyokukala a limbililwa kutya ota ka vula ngiini okusila aanegumbo lye oshimpwiyu nenge ngele okwa gwana ngaa okulonga iilonga yokuuvitha. Jesus okwa li e na oshilonga oshinene, uukalele mboka tawu ka lundulula onakuyiwa yaantu. Okwa li ha longele Kalunga ngoka ‘te ke tu kuthila po.’ (Jes. 55:7) Jehova okwa li ta ka sila oshimpwiyu oompumbwe dhe dhopambepo nodhopalutu. —  Mat. 6:33.

16. Petrus, Jakob naJohannes oya li yi inyenge ngiini kehiyo lyaJesus, nomolwashike etokolo ndyoka ya li ya ningi lya li ewanawa noonkondo?

¹⁶ Petrus okwa vulika nziya, nosho wo Jakob naJohannes. “Oyo oya dhugile oowato dhawo komunkulo noya thigi po iinima ayihe e taa landula Jesus.” (Luk. 5:11) Kungeyi Petrus oku ulike kutya okwiitaala muJesus nosho wo mwaangoka a tuma Jesus. Okwa li a ningi etokolo ewanawa dhingi. Kunena Aakriste mboka haya sindi uumbanda noihaya  kala ya limbililwa sho taya longele Kalunga otayu ulike kutya oye na eitaalo. Jehova oha sile aluhe oshimpwiyu mboka ye mu inekela. —  Eps. 22:4, 5.

17. Iimoniwa yini Petrus a li ta vulu okudhimbulukwa ya ningwa muule woomvula mbali ndhoka a kala naJesus?

¹⁷ Uusiku mbwiyaka sho Petrus a li ta dhugu owato moshikungulu mEfuta lyaGalilea, ngaashi sha popiwa petameko lyontopolwa ndjika, opwa adhika pwa pita konyala oomvula mbali konima sho Petrus a tsakanene naJesus. Odhoshili kutya katu shi shoka a li ta dhiladhila uusiku mboka. Opwa li pu na iinima oyindji mbyoka a li ta vulu okukala ta dhiladhila kuyo. Jesus okwa li a aludha yinamweno yaPetrus nokwa li wo a ningi Euvitho lyokOndundu. Poompito odhindji, okupitila meuvitho lye nomiilongankondo ye okwa li u ulike kutya oye Omuhogololwa gwaJehova nenge Mesiasa. Sho oomwedhi dhe ende tadhi piti po okwa li i ilongo okupangela uumbanda we negamo lye lyokukala a limbililwa. Jesus okwa li nokuli e mu hogolola a ninge gumwe gwomaayapostoli ye 12. Ihe nonando ongaaka, okwa li te ke shi mona konima kutya ka li a sinda thiluthilu uumbanda we nosho wo egamo lye lyokukala a limbililwa.

18, 19. (a) Hokolola shoka Petrus a mono mEfuta lyaGalilea. (b) Jesus okwa ti ngiini sho Petrus e mu pula e ye kuye?

¹⁸ Lwopondatu yuusiku, ombaadhilila Petrus okwa li e etha po okudhuga e ta kuutumba u ukilila. Okwa li e wete sha tashi inyenge kombanda yomeya. Mbela omakuthikuthi ngoka taga minikilwa kuuyelele womwedhi tagi inyenge? Hasho nando, oshoka kasha li tashi inyenge ngaashi ekuthikuthi, osha li sha fa shu ukilila. Sho e shi tala nawa okwa mono kutya nani omuntu te ende kombanda yomeya. Sho omuntu ngoka e ya popepi, okwa li a fa te ya pitilile. Aalongwa oya li ya tila, taya dhiladhila kutya oshiluli. Omuntu ngoka okwa popi a ti: “Ikoleleni, inamu tila, ongame.” Omuntu ngoka nani oJesus. —  Mat. 14:25-28.

¹⁹ Petrus okwe mu yamukula a ti: “Omuwa, ngele ongoye, lombwela ndje, ndi ye kungoye tandi ende kombanda yomeya.” Tango Petrus okwa li i inyenge nomukumo. Okwa li a nyanyudhwa koshikumithalonga shoka shi ikalekelwa nokwa li a hala okukoleka eitaalo lye ishewe. Okwa li a hala okukutha ombinga moshikumithalonga shoka. Jesus okwa li e mu lombwele e ye kuye. Petrus okwa londoloka mo mowato e ta yi mefuta ndyoka lya pindjala. Dhiladhila owala kutya okwa li u uvite ngiini sho a mono oompadhi dhe itaadhi ningine e ta thikama kombanda yomeya. Otashi vulika a li a kumwa noonkondo sho te ende u uka kuJesus. Ihe okwa ningilwa sha ishewe. —  Lesha Mateus 14:29.

20. (a) Oshe ende ngiini Petrus kaa gandje we eitulomo kuJesus, noshizemo osha li shini? (b) Jesus okwa li a longo Petrus oshiilongomwa shini?

²⁰ Petrus okwa li a pumbwa okugandja eitulomo lye kuJesus. Jesus ngoka a li ta longitha oonkondo dhaJehova oye a li ta kwathele Petrus e  ende kombanda yefuta lya pindjala. Jesus okwa li ta kwathele Petrus shi ikolelela keitaalo ndyoka li li muPetrus. Ihe Petrus okwa piyaganekwa kusha. Ombiimbeli otayi ti: “Sho a mono ombepo yoshikungulu, okwa haluka.” Petrus okwa tameke okutala komakuthikuthi ngoka taga dhenge owato e ta tila. Otashi vulika a li e wete a ningina nale mefuta e ta sile mo. Sho a kwatwa unene kuumbanda, okwa tameke okukanitha eitaalo. Omulumentu ngoka hi ithanwa emanya molwaashoka okwa li ta ka kala e na eitaalo lya kola, okwa tameke okuningina omolwokwaaneitaalo kwe. Petrus okwa li e shi okuyoga, ihe ngashingeyi ka li ta vulu oku shi ninga. Okwi igidha a ti: “Omuwa, hupitha ndje!” Jesus okwe mu kwata moshikaha e te mu hili mo. Manga ye li natango kombanda yomeya Jesus okwa li a longo Petrus oshinima sha simana, sho a ti: “Omwiitaali ngoye omunkundi, omolwashike wa limbililwa?” —  Mat. 14:30, 31.

21. Omolwashike sha nika oshiponga okukala twa limbililwa, nongiini tatu vulu oku shi kondjitha?

²¹ Uutumbulilo “wa limbililwa,” inawu eleka tuu! Omalimbililo otaga vulu okupiyaganeka omuntu. Ngele otwi igandja kugo otaga vulu okunkundipaleka eitaalo lyetu nokuteya po uupambepo wetu. Otu na oku ga kondjitha. Ngiini mbela? Omokugandja eitulomo kiinima mbyoka ya simana. Ngele otwa kala tu na uumbanda, twa teka omukumo notatu gamuka ko kuJehova nokOmwana, otatu ki iyadha twa limbililwa unene. Ngele otwa kala tatu gandja eitulomo kuJehova nokOmwana, kwaashoka ya ninga, taya ningi naashoka taya ka ningila mboka ye ya hole, otatu ka vula okupangela egamo lyokukala twa limbililwa.

22. Omolwashike eitaalo lyaPetrus lya gwana okuholelwa?

²² Manga Petrus a landula Jesus u uka mowato, okwa mono sho oshikungulu tashi loto. Efuta lyaGalilea olya mwena thilu. Petrus okwa popi pamwe naalongwa ooyakwawo a ti: “Oshili ongoye Omuna gwaKalunga.” (Mat. 14:33) Sho etango tali piti handiyaka yefuta, Petrus otashi vulika a li e na olupandu. Okwa li i ilongo okukala kee na uumbanda nokee na egamo lyokukala a limbililwa. Okwa li e na okuninga omalunduluko ogendji manga inaa ninga Omukriste e na eitaalo lya kola ngaashi Jesus e shi hunganeke. Ihe okwa li a tokola okukala ta ningi oonkambadhala nokukoka pambepo. Mbela nangoye owa ninga etokolo lya tya ngaaka? Oto ka mona kutya eitaalo lyaPetrus olya gwana okuholelwa.