1-3. Kico tabata tur e cosnan cu Pedro a mira e dia ey, y den ki situacion e tabata e anochi ey?

PEDRO tabata rema cu tur su forsa den e scuridad di marduga. Diripiente el a mira un poco claridad na horizonte. Mainta tabata bay habri porfin? Biento tabata supla duro y Lama di Galilea a bira hopi bruto. Olanan grandi tabata bati contra e parti dilanti di e boto di piscador, y Pedro a keda papa muha. Su schouder cu su lomba tabata haci dolor di rema tanto ora asina. Toch el a sigui rema sin stop.

² Ora Pedro cu su compañeronan a subi lama, nan a laga Hesus su so na canto. E dia ey, nan a mira con Hesus a alimenta miles di hende cu djis un par di pan y algun pisca. E hendenan a keda asina impresiona cu nan a trata di haci Hesus rey, pero e no tabata kier tin nada di haci cu politica. Ademas, e kier a siña su discipelnan tambe pa no mete den politica. Pa scapa di e multitud, Hesus a bisa su discipelnan pa subi den e boto y crusa bay na e otro banda di lama. Mientrastanto, e so a bay den sero pa haci oracion.—Mar. 6:35-45; lesa Juan 6:14-17.

³ Ora e discipelnan a subi e boto bay, luna—cu tabata casi yen—tabata halto den cielo. Pero awor luna tabata baha pocopoco na horizonte. Sinembargo, nan no a yega mucho leu den e mal tempo ey. E esfuerso pa rema den e lama bruto, hunto cu e zonido duro di biento y ola, tabata stroba nan di combersa cu otro. Pues, Pedro lo tabatin tempo pa pensa segun cu e tabata rema.

4. Dicon Pedro ta un magnifico ehempel pa nos imita?

⁴ Anto ta cantidad di cos tabatin pa Pedro pensa ariba! A haci dos aña caba cu e tabata compaña Hesus di Nazaret, y hopi cos a pasa den e dos añanan ey. El a siña hopi cos for di Hesus, pero ainda e tabatin mas pa siña. Y ta e deseo ey di Pedro—di bira un mihor  discipel di Hesus y di supera obstaculo, manera duda y miedo—ta hacie un magnifico ehempel pa nos. Laga nos wak dicon.

5, 6. Ki sorto di bida Pedro a hiba?

⁵ Pedro hamas lo lubida e dia cu el a conoce Hesus. Su ruman homber, Andres, a bin dun’e e noticia asombroso aki: “Nos a haya e Mesias!” Cu e palabranan ey, Pedro su bida a cuminsa cambia y no a bira mescos nunca mas.—Juan 1:41.

⁶ Pedro tabata biba na Capernaum, un stad na costa noord di un lago grandi di awa dushi cu tabata yama Lama di Galilea. E cu Andres tabatin un negoshi di piscamento hunto cu Santiago y Juan, e yiunan di Zebedeo. Pedro tabata biba den cas hunto cu su casa y tambe cu su suegra y Andres. Pa piscadornan por a mantene nan famia, nan mester tabata hombernan trahador, fuerte y ingenioso. Manera nos por imagina, nan tabata traha hopi biaha henter anochi sin sosega. Nan tabata baha nan redanan entre dos boto y despues a hala aden loke e redanan a coy, sea tiki of hopi. Mainta, nan trabou pisa tabata sigui, pasobra e ora ey nan mester a sortia y bende e piscanan, y tambe limpia y drecha nan redanan.

7. Kico Pedro a tende tocante Hesus, y dicon esey tabata un noticia emocionante?

⁷ Bijbel ta bisa nos cu Andres tabata un discipel di Juan Bautista. Casi sigur Pedro tabata scucha cu hopi interes ora Andres tabata papia cu ne tocante e mensahe di Juan. Anto un dia, Andres tabata testigo di algo importante. Juan a mustra riba Hesus di Nazaret y a bisa: “Ata e Lamchi di Dios!” Mesora Andres a bira un siguidor di Hesus y, entusiasma, el a bay conta Pedro e noticia emocionante ey: E Mesias a yega! (Juan 1:35-41) Un 4.000 aña prome, despues di e rebelion den Eden, Jehova Dios a priminti di manda un persona special cu lo a duna humanidad e speransa di haya salbacion. (Gen. 3:15) Y tabata e Salbador ey cu Andres a caba di conoce, e Mesias priminti! Manera Pedro a tende esey, el a bay cu ne p’e tambe topa Hesus.

8. Kico e nomber cu Hesus a duna Pedro a nifica, y dicon awe tin hende cu ta cuestiona e nomber ey?

⁸ Te cu e dia ey, Pedro tabata conoci como Simon, of Simeon. Pero ora Hesus a mir’e, el a bis’e: “‘Abo ta Simon, yiu di Juan; lo bo ser yama Cefas’ (cu traduci ta nifica: ‘Pedro’).” (Juan 1:42) E nomber “Cefas” a nifica “piedra” of “baranca.” Aparentemente e palabranan di Hesus tabata profetico. El a mira di antemano cu Pedro lo a bira manera un baranca: un homber firme y confiabel cu lo a yuda stabilisa e congregacion cristian. Pero Pedro tambe a mira su mes asina? Probablemente cu no. De echo, awe tin hende cu, despues di lesa  e Evangelionan, ta haya cu Pedro no tabata un persona stabiel y confiabel manera un baranca. Tin ta hasta bisa cu loke Bijbel ta revela di su caracter ta duna e impresion di un persona instabil, insigur y indeciso.

9. Riba kico Jehova y su Yiu ta concentra, y dicon bo ta pensa cu nos mester confia nan punto di bista?

⁹ Claro cu Hesus tabata bon na altura di Pedro su defectonan. Pero Hesus, mescos cu su Tata, Jehova, semper a concentra riba e bon cu tin den hende. Hesus a mira cu Pedro tabatin hopi potencial, y el a trata di yud’e sigui desaroya e bon cualidadnan ey. Awe tambe Jehova y su Yiu ta concentra riba e bon cu tin den nos. Kisas nos mes ta duda cu nan lo haya algo bon den nos. Pero nos tin cu confia nan punto di bista y demostra, mescos cu Pedro, cu nos ta dispuesto pa laga nan siña nos y forma nos.—Lesa 1 Juan 3:19, 20.

10. Pedro tabata probablemente testigo di kico, pero toch el a bay bek na haci kico?

¹⁰ Despues di a topa Hesus, Pedro probablemente a compañ’e durante un parti di su campaña di predica. Pues, kisas el a mira Hesus haci su prome milager: el a cambia awa den biña na un fiesta di casamento na Cana. Pero mas importante ainda, Pedro a tende for di boca di Hesus e maraviyoso mensahe tocante e Reino di Dios. A pesar di tur e cosnan maraviyoso aki cu el a tende y mira, Pedro no a sigui biaha cu Hesus pero a bay bek na su negoshi di piscamento. Pero algun luna despues, Pedro a bolbe topa Hesus, y e biaha aki Hesus a duna Pedro un invitacion special: dedica su mes full-time na e predicacion.

11, 12. (a) Con a bay cu Pedro su piscamento e anochi ey? (b) Kico Pedro probablemente tabata pensa segun cu el a scucha Hesus?

¹¹ Pedro a caba di pasa un mal anochi di trabou. E cu e otro piscadornan a pasa henter anochi ta baha nan redanan, pero cada biaha cu nan a hala nan aden, e redanan tabata bashi. Siguramente Pedro a uza tur su experencia y creatividad pa haya sa unda e piscanan tabata come, y probablemente el a purba varios zona di e lago. Sin duda, mescos cu otro piscador, lo tabatin biaha cu el a desea di por a wak door di e awa troebel pa haya sa unda e scolnan di pisca tabata of di un manera of otro, obliga e piscanan di drenta den su reda. Claro cu e tipo di pensamentonan ey lo a desanim’e mas. Pedro no tabata pisca pa placer; e tabatin un famia pa cria. Al final, el a bay canto bek man bashi. Pero toch e mester a limpia e redanan. Hesus a bin net ora e tabata haci esey.

¹² Tabatin un multitud di hende rond di Hesus, y nan tabata ansioso pa tende tur loke e tabatin di bisa. Como cu e hendenan tabata  preta riba Hesus, el a subi den e boto di Pedro y pidie pa hala un poco for di canto. Hesus a siña e multitud for di den e boto, ya cu su stem tabata zona mas cla riba awa. Pedro a scucha cu atencion, mescos cu e hendenan na canto. E no tabata cansa di tende Hesus papia tocante e tema principal di su predicacion: e Reino di Dios. Mare e por a yuda Cristo plama e mensahe di speransa aki den henter e pais. Esta un gran privilegio esey lo tabata! Pero esey tabata realistico? Di kico su famia lo a biba? Kisas Pedro a bolbe corda riba e anochi cu el a caba di pasa sin coy nada.—Luc. 5:1-3.

13, 14. Ki milager Hesus a haci pa Pedro, y con Pedro a reacciona?

¹³ Ora Hesus a caba di papia, el a bisa Pedro: “Hala bay afo caminda ta hundo y tira boso redanan pa coy poco pisca.” Pedro tabatin su dudanan y a contest’e: “Maestro, henter anochi nos a traha duro sin coy nada, ma como cu bo ta pidi mi, lo mi tira e redanan.” Pedro a caba di laba su redanan. Sin duda, e ultimo cos cu lo e kier a haci tabata di bolbe baha e redanan den awa, anto specialmente e ora ey cu no tabata ora cu pisca ta come! Di tur manera, el a haci loke Hesus a bis’e y probablemente a haci seña cu su compañeronan den e otro boto pa nan siguie.—Luc. 5:4, 5.

¹⁴ Ora Pedro a cuminsa hala e redanan aden, el a sinti un peso inespera. Sorprendi, el a hala mas duro y a mira masha hopi pisca mes den e redanan! Mesora el a haci seña cu e piscadornan den e otro boto pa bin yuda nan. Esakinan a bin, y nan a ripara cu un boto so no por a carga tur e piscanan. Nan a yena tur e dos botonan, pero tabatin asina tanto pisca, cu e peso a pone e botonan cuminsa sink. Pedro no por a kere su wowonan. El a yega di mira na ocasionnan anterior cuanto poder Cristo tabatin, pero e milager aki a beneficia e personalmente. Ata aki un homber cu por a hasta pone e piscanan drenta den reda! Miedo a podera di Pedro. El a cay na rudia dilanti di Hesus y a bis’e: “Bay for di mi, Señor, pasobra mi ta un homber pecador.” Ta bisto cu Pedro no a considera su mes digno di ta hunto cu e persona cu tabatin autoridad pa uza e poder di Dios na un manera asina maraviyoso.—Lesa Lucas 5:6-9.

15. Con Hesus a siña Pedro cu e no tabatin motibo pa duda ni sinti miedo?

¹⁵ Pero Hesus a bis’e bondadosamente: “No tene miedo mas. Di awor padilanti lo bo pisca hende.” (Luc. 5:10) Esaki no tabata momento pa e duda ni sinti miedo, pasobra Hesus tabata invitando e pa participa den un obra unico, un sirbishi cu lo a cambia futuro di humanidad. Pedro no tabatin motibo pa duda si e por a cria su famia,  si e tabata suficiente capaz pa predica of pa motibo di su propio fayonan. E tabata sirbi un Dios cu ta “pordona abundantemente.” (Isa. 55:7) Jehova lo a satisface Pedro su necesidadnan, tanto den sentido fisico como spiritual.—Mat. 6:33.

16. Con Pedro, Santiago y Juan a reacciona riba e invitacion di Hesus, y dicon esey tabata e mihor decision cu nan por a tuma?

¹⁶ Pedro a acepta e invitacion di biaha, y Santiago cu Juan tambe a haci mescos. “Nan a trece nan botonan bek na tera, y nan a laga tur cos y siguie.” (Luc. 5:11) Di e manera ey Pedro a demostra cu e tabatin fe den Hesus y den Esun cu a mand’e. Esey tabata e mihor decision cu e por a tuma. Den nos tempo, e cristiannan cu ta supera nan duda y miedo pa sirbi Dios ta demostra e mesun tipo di fe. Nan por ta sigur cu nunca Jehova lo no laga nan na caya.—Sal. 22:4, 5.

17. Menciona algun cos cu Pedro a pasa aden durante e dos añanan cu el a compaña Hesus.

¹⁷ Tabata un dos aña despues cu Pedro a conoce Hesus cu el a hay’e den e situacion menciona na principio di e capitulo aki. Tabata anochi, y biento tabata supla hopi duro riba Lama di Galilea. Pedro tabata rema cu tur su forsa. Naturalmente nos no sa riba kico precies e tabata pensa, ya cu el a pasa den asina tanto cos cu Hesus. Por ehempel, Hesus a cura su suegra. El a duna e Sermon Riba Sero. El a demostra bes tras bes pa medio di su siñansa y obranan poderoso cu e tabata e Scogi di Jehova, e Mesias. Durante e periodo cu a pasa, Pedro a traha riba algun aspecto di su personalidad y a mehora; el a siña domina su tendencia di entrega na duda y miedo. Hesus a hasta scog’e pa ta un di e 12 apostelnan! Pero manera nos lo bay mira awor, ainda Pedro no a gana e lucha contra miedo y duda.

18, 19. (a) Describi kico Pedro a mira riba Lama di Galilea. (b) Con Hesus a cumpli cu Pedro su peticion?

¹⁸ Diripiente, Pedro a stop di rema durante e di cuater warda di anochi (di 3 or di marduga pa 6 or di mainta). El a mira algo move leu aya riba e olanan. El a stop di rema y a sinta stret. Lo tabata e refleho di luna riba e scuma di e olanan? No, el a parce mas bien algo solido y recht cu tabata move na un manera constante. Tabata un hende! Imagina bo, un hende tabata cana riba lama! Ora e figura a yega cerca, el a haci comosifuera e tabata bay pasa nan voorbij. E discipelnan tabata morto spanta y a kere cu tabata un sorto di vision. Pero e hende a bisa nan: “Keda trankil! Ta ami; no tene miedo.” Tabata Hesus!—Mat. 14:25-27.

¹⁹ Anto Pedro a contest’e: “Señor, si ta abo, laga mi cana riba awa bin cerca bo.” (Mat. 14:28) Su prome reaccion a demostra curashi. Entusiasma cu e milager unico aki, Pedro mes kier a experencia Hesus su poder milagroso pa asina fortalece su fe mas ainda. Bondadosamente, Hesus a bis’e bin. Pedro a baha for di e boto y para riba e lama yen di ola. Purba di imagina bo mes con el a sintie. Para riba awa, el a sinti superficie firme bou di su pia mientras cu el a cana bay den direccion di Hesus. Na prome instante, lo e mester a keda asombra, pero poco despues un otro sintimento a podera di dje.—Lesa Mateo 14:29.

20. (a) Kico a kita Pedro su atencion, y cu ki consecuencia? (b) Ki les Hesus a enfatisa pa Pedro?

²⁰ Hesus a reacciona riba e fe cu Pedro tabatin den dje y a uza e poder di Jehova pa laga Pedro cana riba e olanan bruto. Pedro tabatin cu mantene su bista fiha riba Hesus; pero su atencion a kita. Bijbel ta bisa: “Ora el a wak e tormenta, el a haya miedo.”  Pedro a cuminsa wak e lama bruto y e olanan cu tabata bati contra e boto, y el a drenta panico. Probablemente el a imagina con e ta sink den e lago y hoga. Den un frega di wowo, miedo a hoga su fe. E homber cu Hesus a yama Baranca, pasobra e tabatin e potencial di ta un persona stabiel, a cuminsa sink manera un baranca pa motibo cu su fe a tambalia. Pedro por a landa bon, pero toch el a cuminsa grita: “Señor, salba mi!” Mesora Hesus a coy Pedro tene na su man y a sac’e pon’e para riba awa. Anto eynan para, riba e superficie di lama, el a enfatisa e les importante aki pa Pedro: “Homber di poco fe, pakico bo a cuminsa duda?”—Mat. 14:30, 31.

21. Dicon duda ta peligroso, y con nos por lucha contra dje?

²¹ Esta un les valioso! “Cuminsa duda” ta hopi peligroso, pasobra duda por tin un influencia potente y destructivo. E por debilita nos fe gradualmente y pone nos sink of hoga den sentido spiritual. Pesey nos mester ta determina pa lucha contra miedo y duda. Con? Nos tin cu keda concentra riba e cosnan corecto, cosnan positivo. Si nos ta concentra riba loke ta duna nos miedo, loke ta desanima nos of loke ta hala nos for di Jehova y su Yiu, nos dudanan lo crece. Si nos ta mantene nos bista fiha riba Jehova y su Yiu—es decir, riba loke nan a haci, ta haciendo y lo haci pa hende cu ta stima nan—nos lo siña domina cualkier duda cu lo por debilita nos fe.

22. Dicon ta bale la pena imita e fe di Pedro?

²² Ora Pedro a subi den e boto tras di Hesus, el a ripara cu e tormenta a baha. Un silencio a reina riba Lama di Galilea. Tanto Pedro como e otro discipelnan a declara: “Di berdad bo ta Yiu di Dios.” (Mat. 14:33) Segun cu e prome rayonan di solo tabata sali riba e lago despues di e experencia impactante aki, Pedro lo mester tabata hopi agradecido. El a siña confia mas den Jehova y Hesus y a pone su miedo y dudanan un banda. Ta berdad cu ainda tabata falta hopi p’e bira e baranca cu Hesus a papia di dje. Pero e tabata determina pa sigui haci su best, pa sigui crece. Abo awor? Bo ta determina pa sigui e ehempel di Pedro y lucha contra bo miedo y dudanan? Lo bo ripara cu ta bale la pena imita e fe di Pedro.