1-3. Ano an nakita ni Pedro durante han usa ka makatirigamnan nga adlaw, ngan ano an iya naeksperyensyahan pagkagab-i?

HI Pedro naniguro ha pagbinugsay samtang ginkikinita an sidlit ha este nga kasidsiran han langit ha madulom nga kagab-ihon. Tigaman ba ito nga tikaaga na? An iya likod ngan mga sugbong maul-ol na tungod han maiha nga pagbinugsay. Makusog an hangin ngan dagku an balud ha Dagat han Galilea. Ha dulong han baluto, napusak an mga balud ngan nahuhulos hiya. Kondi nagpadayon hiya ha pagbinugsay.

² Han nakadto pa ha baybayon hi Pedro ngan an iya mga kaupod, ginbayaan nira hi Jesus nga nag-uusahan. Hito nga adlaw, nakita nira hi Jesus nga nagpakaon hin yinukot nga nagugutom nga katawohan pinaagi hin pipira la nga tinapay ngan isda. Tungod hito, nangalimbasog an mga tawo nga himoon nga hadi hi Jesus, kondi diri niya karuyag nga makigbahin ha politika. Ngan karuyag niya tutdoan an iya mga sumurunod nga diri liwat makigbahin hito. Basi makalikay ha mga tawo, ginsugo niya an iya mga disipulo nga sumakay ha baluto ngan kumadto ha kaluyo nga baybayon samtang hiya kumadto ha bukid nga nag-uusahan basi mag-ampo.—Mar. 6:35-45; basaha an Juan 6:14-17.

³ An bulan hitaas pa han nagtikang magbiyahe an mga disipulo; yana tikatunod na ito ha weste pero waray pa hira makahirayo. Tungod han ira paniguro ha pagbinugsay ngan han aringasa han makusog nga hangin ngan balud, posible nga nakukurian hira pag-iristorya. Salit samtang nagbubugsay, posible nga may ginhinunahuna hi Pedro.

4. Kay ano nga maopay nga susbaranan hi Pedro para ha aton?

 ⁴ Damu gud an posible mahunahuna ni Pedro! Sobra duha ka tuig na nga kilala niya hi Jesus nga taga-Nazaret. Damu na an iya hinbaroan, kondi damu pa an iya mahibabaroan. An iya pangalimbasog nga malamposan an mga ulang sugad han pagruhaduha ngan kahadlok nakahimo ha iya nga maopay nga susbaranan para ha aton. Kitaon naton kon kay ano.

5, 6. Ihulagway an kinabuhi ni Pedro hadto?

⁵ Diri gud mahingangalimtan ni Pedro an adlaw nga nakilala niya hi Jesus. An iya bugto nga hi Andres an siyahan nga nagsumat ha iya hini nga sumat: “Hin-agian namon an Mesias.” Pinaagi hito nga mga pulong, nagtikang magbag-o an kinabuhi ni Pedro.—Juan 1:41.

⁶ Hi Pedro naukoy ha Capernaum, usa nga syudad ha baybayon han Dagat han Galilea. Hiya, hi Andres, ngan an mga anak ni Sebedeo nga hira Santiago ngan Juan, magkaupod ha pangisda. Kaupod ni Pedro ha balay diri la an iya asawa kondi pati an iya ugangan ngan an iya bugto nga hi Andres. Iya hira ginsusuportahan pinaagi ha pagpangisda nga nagkikinahanglan hin maduruto nga pagtrabaho, kusog, ngan abilidad. Mahahanduraw naton an mga gab-i han ira duro nga pangalimbasog—an paghulog han mga pukot ha butnga han duha nga baluto ngan an pagbutong hito. Mahahanduraw liwat naton an ira makapoy nga trabaho ha adlaw samtang ira ginlalain-lain an mga isda, ginbabaligya, ginlilimpyohan an pukot ngan ginhuhuktan an mga gisi hito.

7. Ano an hinbatian ni Pedro mahitungod kan Jesus, ngan kay ano nga makalilipay ito nga sumat?

⁷ An Biblia nasiring nga hi Andres disipulo ni Juan nga Parabaptis. Sigurado nga namati hi Pedro ha sumat han iya bugto mahitungod han mensahe ni Juan. Usa ka adlaw, nakita ni Andres nga gintutudlok ni Juan hi Jesus ngan siniring: “Kitaa, an Kordero han Dios!” Hito mismo nga takna, hi Andres nagin sumurunod ni Jesus ngan nagsumat dayon kan Pedro hinin makalilipay nga sumat: Inabot na an Mesias! (Juan 1:35-40) Katapos han pagrebelde ha Eden mga 4,000 ka tuig na an naglabay, nagsaad hi Jehova nga Dios nga may espesyal nga indibiduwal nga maabot ha pagtagana hin tinuod nga paglaom ha katawohan. (Gen. 3:15) Nakilala ni Andres ini nga Paratalwas, an Mesias mismo! Hi Pedro nag-apura liwat basi makilala hi Jesus.

8. Ano an kahulogan han ngaran nga iginhatag ni Jesus kan Pedro, ngan kay ano nga naghunahuna an iba nga diri hiya takos hito?

⁸ Antes hito nga adlaw, kilala hi Pedro ha ngaran nga Simon, o Simeon. Kondi hi Jesus siniring: “ ‘Ikaw hi Simon nga anak ni Juan; tatawagon ka nga Cefas’ (iginhubad nga Pedro).” (Juan 1:42) An “Cefas” nangangahulogan hin “bato.” Matin-aw nga matagnaon an mga pulong ni Jesus. Nakita niya nga hi Pedro magigin sugad hin  bato—marig-on, masasarigan, ngan maopay nga impluwensya ha iya mga sumurunod. Sugad ba liwat hito an pagkita ni Pedro ha iya kalugaringon? Baga hin diri. Bisan an pipira nga magbarasa han Ebanghelyo yana naghuhunahuna nga hi Pedro diri sugad kamasasarigan ngan karig-on han bato. An iba nasiring nga an rekord han Biblia mahitungod ha iya baga hin nagpapakita nga pabag-o-bag-o hiya.

9. Ano an ginkikita ni Jehova ngan han iya Anak ha aton, ngan para ha imo, kay ano nga sadang kita sumarig ha ira nakikita ha aton?

⁹ May mga kaluyahan hi Pedro, ngan maaram hito hi Jesus. Kondi pariho ha iya Amay nga hi Jehova, pirme ginkikita ni Jesus an maopay ha mga tawo. Nakita niya an potensyal ni Pedro, ngan karuyag niya buligan hi Pedro nga makultibar an mag-opay nga kalidad. Ginkikita liwat ni Jehova ngan han iya Anak an maopay ha aton. Bangin diri kita tumoo nga damu an ira makikita nga maopay ha aton. Kondi sadang kita sumarig ha ira ngan pamatud-an nga andam kita magpabansay ngan magpamolde, pariho kan Pedro.—Basaha an 1 Juan 3:19, 20.

10. Ano an bangin nakita ni Pedro ha pag-upod kan Jesus, pero ha ano hiya binalik?

¹⁰ Posible nga inupod dayon hi Pedro kan Jesus ha pagsangyaw. Salit bangin nakita niya an siyahan nga milagro ni Jesus—han ginhimo nga alaksiw an tubig ha kasal ha Kana. Labaw ha ngatanan, nabatian niya an maopay ngan puno hin paglaom nga mensahe ni Jesus mahitungod han Ginhadian han Dios. Bisan pa hito, binaya hiya kan Jesus ngan binalik ha pagpangisda. Kondi paglabay hin pipira ka bulan, nagkita utro hira ni Jesus, ngan hini nga takna ginhangyo hiya nga magin bug-os-panahon nga sumurunod.

11, 12. (a) Ano an nahitabo ha pagpangisda nira Pedro? (b) Samtang namamati kan Jesus, ano nga mga pakiana an posible nahunahuna ni Pedro?

¹¹ Han naglabay nga gab-i, nakakapanluya gud an pagpangisda nira Pedro. Pauroutro nga ginhulog nira an mga pukot, kondi waray hira nadakop. Sigurado nga ginbuhat ni Pedro an tanan basi makadakop, ginsarihan pa ngani an iba nga dapit diin posible nga damu an isda. Pariho ha damu nga parapangisda, bangin naghingyap hiya nga makita an ilarom han masirom nga katubigan basi hibaroan kon hain an damu nga isda o nga mapasulod unta an mga isda ha pukot. Kondi an paghunahuna hito makakadugang la han iya panluya. Para ha iya, an pagpangisda diri pagpahalibway, ito an iya pangabuhi. Ha kataposan, binalik hiya ha baybayon nga waray dakop. Pero kinahanglan pa gihapon limpyohan an mga pukot. Salit sagipo hiya han dinaop hi Jesus.

¹² Napapalibotan hi Jesus han mga tawo nga karuyag gud mamati ha iya. Tungod hito, sinakay hiya ha baluto ni Pedro ngan naghangyo nga ipahirayo ito hin gutiay ha baybayon. Han klaro na an iya tingog  tikang ha baluto, nagtutdo hiya. Atentibo nga namati hi Pedro, pati an mga tawo ha baybayon. Waray gud hiya mauyam ha pagpinamati samtang iginsasaysay ni Jesus an nangunguna nga tema han iya pagsangyaw—an Ginhadian han Dios. Daku gud nga pribilehiyo an pagbulig kan Kristo ha pagpasamwak hini nga mensahe han paglaom ha bug-os nga tuna! Kondi praktikal ba ito ha iya bahin? Paonan-o niya masusuportahan an iya pamilya? Bangin nahunahuna utro ni Pedro an nahitabo han naglabay nga gab-i diin waray hira dakop.—Luc. 5:1-3.

13, 14. Ano nga milagro an ginhimo ni Jesus para kan Pedro, ngan ano an reaksyon ni Pedro?

¹³ Katapos magtutdo ni Jesus, iya ginsidngan hi Pedro: “Dad-a ha hilarom an baluto, ngan ihulog an iyo mga pukot basi makadakop.” Nagruhaduha gud hi Pedro. Hiya nagsiring: “Magturutdo, ha bug-os nga gab-i nangalimbasog kami kondi waray kami nadakop, pero tungod han imo ginsiring, ihuhulog ko an mga pukot.” Ginlimpyohan pa la ni Pedro an mga pukot. Baga hin iginpapakita han iya ginsiring nga diri na niya ito karuyag ihulog—labi na hito nga takna nga diri na panahon han pangisda. Bisan pa hito, sinugot hiya, posible nga iya ginsinyasan an iya mga kaupod ha ikaduha nga baluto nga sundan hira.—Luc. 5:4, 5.

¹⁴ Samtang ginbubutong an pukot, inabat ni Pedro nga mabug-at ito. Diri hiya makatoo salit naniguro hiya pagbutong, ngan waray pag-iha nakita niya an damu hinduro nga isda nga nagkikisikisi ha pukot! Natatarantar nga ginsinyasan niya an iya mga kaupod ha ikaduha nga baluto nga bumulig. Pero nakita nira nga diri makakarga han usa la nga baluto an ira dakop salit ginpuno pa nira an ikaduha nga baluto. Kondi damu pa nga isda an nahibilin ngan an mga baluto nagtikang lumunod. Diri gud makatoo hi Pedro ha nahitabo. Nakakita na hiya hadto hin milagro ni Kristo, kondi yana, ini nga milagro para mismo ha iya. Napasulod ni Jesus an mga isda ha pukot! Nahadlok hi Pedro, salit linuhod hiya ngan nagsiring: “Ginoo, diri ako takos humirani ha imo, kay makasasala ako nga tawo.” Para ha iya, diri hiya takos makig-upod ha Usa nga may awtoridad ha paggamit han gahum han Dios ha sugad nga mga paagi.—Basaha an Lucas 5:6-9.

15. Paonan-o gintutdoan ni Jesus hi Pedro nga waray basihan an iya mga pagruhaduha ngan kahadlok?

¹⁵ Hi Jesus may pagkabuotan nga nagsiring: “Ayaw na kahadlok. Tikang yana mangingisda ka hin buhi nga mga tawo.” (Luc. 5:10, 11) Diri na ini panahon para mahadlok o magruhaduha. Waray basihan  an pagruhaduha ni Pedro kon masusuportahan ba niya an iya pamilya; waray liwat basihan an iya kahadlok mahitungod han iya mga sayop o pagkadiri-takos. Hi Jesus may-ada daku nga buruhaton nga makakaapekto ha katawohan. Nag-aalagad hiya ha Dios nga ‘nagpapasaylo hin damu gud.’ (Isa. 55:7) Diri sadang magruhaduha hi Pedro kay hi Jehova magtatagana han pisikal ngan espirituwal nga panginahanglan niya ngan han iya pamilya.—Mat. 6:33.

16. Ano an ginhimo nira Pedro, Santiago, ngan Juan ha imbitasyon ni Jesus, ngan kay ano nga ito an gimaopayi nga desisyon nga ira ginhimo?

¹⁶ Sinugot dayon hi Pedro, pariho kanda Santiago ngan Juan. “Iginbalik nira ha baybayon an mga baluto, ngan ginbayaan an ngatanan ngan sinunod ha iya.” (Luc. 5:11) Hini nga paagi, iginpakita ni Pedro an pagtoo kan Jesus ngan ha Usa nga nagsugo ha iya. Ito an gimaopayi nga desisyon nga iya ginhimo. An mga Kristiano yana nga  nangangalimbasog paglampos han ira pagruhaduha ngan kahadlok basi makag-alagad ha Dios nagpapakita liwat hin pagtoo. Diri gud kawang an sugad nga pagsarig kan Jehova.—Sal. 22:4, 5.

17. Ano nga mga hitabo ha duha ka tuig tikang han makilala ni Pedro hi Jesus an posible niya nahunahuna?

¹⁷ Mga duha ka tuig katapos makilala hi Jesus, nagbinugsay hi Pedro ha Dagat han Galilea ha mahangin nga kagab-ihon, sugad han gin-unabi ha tinikangan hini nga kapitulo. Syempre diri naton mahibabaroan an iya ginhuhunahuna. Damu an posible niya mahunahuna! Pananglitan, gintambal ni Jesus an iya ugangan. Nagpahayag hi Jesus han Sermon ha Bukid. Pinaagi han katutdoan ngan mga milagro, pauroutro nga iginpakita ni Jesus nga hiya an Usa nga Pinili ni Jehova, an Mesias. Samtang nalabay an mga bulan, sigurado nga hinay-hinay nga naibanan an kahadlok ngan pagruhaduha ni Pedro. Ginpili pa ngani hiya ni Jesus nga magin usa han 12 nga apostol! Pero kinahanglan pa gihapon hiya mangalimbasog nga maatohan an kahadlok ngan pagruhaduha.

18, 19. (a) Ihulagway an nakita ni Pedro ha Dagat han Galilea. (b) Ano an baton ni Jesus ha hangyo ni Pedro?

¹⁸ Durante han ikaupat nga bahin han pagbantay hito nga gab-i—mga alas tres han kaagahon tubtob ha pagsirang han adlaw—tigda nga inundang hi Pedro ha pagbinugsay ngan liningkod hin tadong. Ha unhan, may nagkikiwa! Mga balud la ba ito nga nasasanagan han bulan? Diri, kay natindog ito. Usa ito nga tawo! Oo, tawo nga naglalakat ha bawbaw han dagat, ngan baga hin tidaop ito ha ira! Nahadlok hira ngan naghunahuna nga usa ito nga urusahon nga bisyon. An tawo nagsiring: “Magmaisugon kamo! Ako ini, ayaw kamo kahadlok.” Hi Jesus ito nga tawo!—Mat. 14:25-28.

¹⁹ Hi Pedro siniring: “Ginoo, kon ikaw ito, palakta ako ngada ha imo ha bawbaw han tubig.” Ha tinikangan, nagpakita hiya hin kaisog. Tungod han kahipausa, karuyag niya maeksperyensyahan mismo an milagro ni Jesus basi maparig-on pa an iya pagtoo. Mahigugmaon nga ginpadaop hiya ni Jesus. Salit hinaw-as hiya ha baluto ngan kinadto ha dagat. Handurawa an inabat ni Pedro samtang natindog hiya ha bawbaw han tubig nga baga hin may matig-a nga gintatamakan. Sigurado nga nahipapausa hiya samtang nalakat pahirani kan Jesus. Kondi waray pag-iha, inabat hiya hin kahadlok.—Basaha an Mateo 14:29.

20. (a) Kay ano nga waray makapokus hi Pedro, ngan ano an resulta? (b) Ano nga leksyon an ginpabug-atan ni Jesus kan Pedro?

²⁰ Kinahanglan ipokus ni Pedro an iya atensyon kan Jesus. Hi Jesus an nagpapahinabo nga makalakat hiya ha bawbaw han tubig pinaagi han gahum ni Jehova. Pero mahihimo la ito kon padayon hiya nga magpapakita hin pagtoo kan Jesus. Kondi waray makapokus hi  Pedro. Aton mababasa: “Nahadlok hi Pedro tungod han makusog nga subasko.” Nakita niya an mga balud nga napusak ha baluto salit nahadlok hiya. Bangin nahanduraw niya an iya kalugaringon nga nalulunod. Samtang nagtitikaduro an iya kahadlok, nagtitikaluya an iya pagtoo. An tawo nga ginngaranan hin Bato tungod han iya pagin marig-on nagtikang lumunod pariho hin bato tungod kay nagluya an iya pagtoo. Maopay hiya lumangoy, kondi hito nga takna waray hiya sumarig ha iya abilidad. Hiya nagsinggit: “Ginoo, talwasa ako!” Ginkaptan hiya ni Jesus ngan ginbutong. Katapos, samtang nakada ha bawbaw han tubig, ginpabug-atan ni Jesus kan Pedro inin importante nga leksyon: “Kagutiay han imo pagtoo. Kay ano nga nagruruhaduha ka?”—Mat. 14:30, 31.

21. Kay ano nga nakakadaot an pagruhaduha, ngan paonan-o naton ito maaatohan?

²¹ “Nagruruhaduha”—haom gud ito nga pulong kan Pedro! An pagruhaduha nakakadaot gud. Kon magpaapekto kita hito, mahimo magluya an aton pagtoo ngan madaot an aton relasyon ha Dios. Kinahanglan atohan naton ito! Paonan-o? Pinaagi ha pagpokus ha husto nga mga butang. Kon pirme naton huhunahunaon an mga butang nga nahahadlokan naton, nakakapaluya ha aton, ngan nakakaulang ha aton pag-alagad kan Jehova ngan ha iya Anak, magduduro la an aton pagruhaduha. Pero kon ipupokus naton an aton atensyon kan Jehova ngan ha iya Anak, ha ira mga ginbuhat, ginbubuhat, ngan pagbubuhaton para ha mga nahigugma ha ira, maaatohan naton an pagruhaduha.

22. Kay ano nga takos subaron an pagtoo ni Pedro?

²² Samtang nasunod hi Pedro kan Jesus ha baluto, nakita niya nga nagtikawara an makusog nga hangin. Nagin kalmado an Dagat han Galilea. Hi Pedro ngan an iya mga igkasi-disipulo nagsiring: “Ikaw gud an Anak han Dios.” (Mat. 14:33) Samtang nasanag na an kahayag han kaagahon, sigurado nga nagin mapasalamaton gud hi Pedro. Hinbaroan niya nga diri hiya sadang magpadaog ha kahadlok ngan pagruhaduha. Oo, damu pa an iya kinahanglan bag-uhon basi hiya magin Kristiano nga may sugad-bato nga mga kalidad sugad han igintagna ni Jesus. Kondi determinado hiya nga padayon nga mangalimbasog ngan mag-uswag. May-ada ka ba liwat sugad nga determinasyon? Kon oo, magpapahimulos ka kon susubaron mo an pagtoo ni Pedro.