1. Kai keadan si mberatna i bas kegeluhen Petrus?

LA TERLUPAKEN Petrus berngi sanga ia jumpa mata ras Jesus. Idahna nge i bas mata Jesus nari adi Jesus kecewa janah nembeh man bana? La sieteh pastina; enda ngenca si ikataken Pustaka si Badia, ”Itulihken Tuan kempak Petrus.” (Luk. 22:61) Tapi, arah tatapen e, ieteh Petrus maka mekelek kal kesalahen si nggo ibanna. Sadar ia maka nggo ilakokenna kai si inubuatken Jesus, perbahanen si ikatakenna la mungkin pernah ilakokenna eme mersoken Tuan si ikelengina. Getem kal pusuh Petrus, banci saja e me keadan si mberatna si pernah ialamina.

2. Kai si perlu ipelajari Petrus, janah kai gunana sipelajari kisah enda?

² Tapi, labo ertina lanai lit arapen. Erkiteken paguh kal kiniteken Petrus, lit denga kesempatenna robah janah erlajar arah salah sada pelajaren si pentingna i bas Jesus nari, eme pelajaren kerna ngalemi. Kita sekalak-sekalak perlu muat pelajaren si seri, emaka mari siperdiateken uga Petrus erlajar i bas pengalamenna nari.

3, 4. (a) Penungkunen kai si ibereken Petrus man Jesus, janah kai si banci saja lit i bas perukuren Petrus? (b) Uga Jesus ncidahken maka Petrus ipengaruhi perukuren si biasa paksa si e?

³ Kira-kira enem bulan ope si e i Kapernaum, kuta kemulihenna, Petrus ndeheri Jesus janah nungkun, ”O Tuan, piga kali banci kualemi seninangku si ersalah man bangku? Cukup pitu kali?” Banci saja iakap Petrus ia sekalak si menukah ngalemi. Terlebih ka, paksa si e peminpin-peminpin agama ngajarken maka nggo bias ngalemi ngayak telu kali! Jabap Jesus, ’Lang, labo cukup pitu kali, tapi pitu puluh pitu kali.’—Mat. 18:21, 22.

⁴ Kai maksud Jesus? Isuruhna nge gelah ikira janah icatat Petrus kesalahen kalak si deban? Lang; sebalikna alu ngganti angka 7 si ikataken Petrus jadi angka 77, imaksudken Jesus maka la lit batasna i bas ngalemi. (1 Kor. 13:4, 5) Icidahken Jesus maka Petrus nggo ipengaruhi perukuren si la nggit ngalemi janah la erperasan  bagi si biasa paksa si e, tempa-tempa arus erkira lebe maka banci ngalemi. Tapi, ngalemi menurut patoken Dibata ibereken alu simpar.—Oge  1 Johanes 1:7-9.

5. Ndigan kita tuhu-tuhu erlajar kerna ngalemi?

⁵ La itogan Petrus kata-kata Jesus. Tapi, kena nge ku pusuhna pelajaren si ibereken Jesus e? Maun-maun, kita banci tuhu-tuhu erlajar kerna ngalemi sanga sisedari maka kita pe perlu ialemi. Erkiteken si e, mari siikuti mulihi erbage kejadin sope kematen Jesus. I bas paksa-paksa si sulit e, melala kesalahen si iban Petrus si perlu ialemi Tuanna.

6. Uga tanggapen Petrus sanga iusahaken Jesus ngajari rasul-rasulna kerna sifat meteruk ukur, tapi kai si ilakoken Jesus man Petrus?

⁶ Berngi e labo bagi berngi si biasana, e berngi pendungi kegeluhen Jesus i doni. Melala denga ate Jesus iajarkenna man rasul-rasulna, contohna kerna sifat meteruk ukur. Ibereken Jesus usihen alu murihi nahe kalak e, pendahin si biasana ilakoken sekalak budak. Tangtangna, nungkun Petrus ngkai maka bage perbahanen Jesus. Kenca si e, la ia nggit ilayani Jesus. Dungna, ipindona gelah iburihi Jesus labo nahena saja ngenca tapi tan ras takalna pe! Tetap Jesus sabar janah alu tenang ijelaskenna kai erti perbahanenna e.—Joh. 13:1-17.

7, 8. (a) Alu cara kai saja Petrus mulihi nguji kesabaren Jesus? (b) Uga Jesus terus ncidahken kiniulin janah nggit ngalemi?

⁷ La ndekah kenca si e, iulihi Petrus nguji kesabaren Jesus. Mulai ka rasul-rasul e rubati kerna ise si mbelinna i bas kalak enda. Pastilah terlibat Petrus i bas ncidahken kesombongen enda. Aminna pe bage, ipersingeti Jesus kalak enda alu mehuli janah ipujina ka hal-hal mehuli si nggo ilakoken kalak e eme tetap setia man Tuanna. Tapi, ipebetehkenna maka kerina kalak enda kari nadingken ia. Itogan Petrus e alu ngataken maka tetap nge ia ras Jesus aminna pe arus mate. Inubuatken Jesus maka ipersoken Petrus kari ia telu kali i bas berngi e ope denga tekuak manuk dua kali. Labo ngenca itogan Petrus kata-kata Jesus, tapi ikatakenna ka maka lebih setia nge kari ia asangken kerina rasul si deban!—Mat. 26:31-35; Mrk. 14:27-31; Luk. 22:24-28; Joh. 13:36-38.

⁸ Menam nge keri kesabaren Jesus man Petrus? Lang. Sebalikna, i bas masa si sulit e, tetap idarami Jesus hal-hal si mehuli i bas diri rasul-rasulna si la serta. Ietehna maka ikecewaken Petrus nge kari ia, tapi nina Jesus, ”Enggo kutotoken kam Simon, gelah kinitekenndu ola nimpet. Janah adi enggo kam jera, pegegehilah senina-seninandu gelah tetap kinitekenna.” (Luk. 22:32) Jadi, ikataken  Jesus maka tek ia adi Petrus pasti robah janah mulihi ngelayani alu setia. Tuhu-tuhu kal Jesus mehuli janah nggit ngalemi!

9, 10. (a) I bas Peken Getsemane, persinget kai si iperluken Petrus? (b) Kesalahen Petrus ngingetken kita nandangi kai?

⁹ I bas pudi wari, i Peken Getsemane, lebih sekali Petrus perlu ipersingeti. Ipindo Jesus gelah Petrus, Jakup, ras Johanes tetap erjaga-jaga sanga ia ertoto. Gulut kal ukur Jesus janah perlu ia dukungen, tapi piga-piga kali Petrus ras si debanna terpedem. Icidahken Jesus maka ia sepenggejapen janah nggit ngalemi alu ngataken, ”Ukurndu mehuli kap tapi dagingndu kote.”—Mrk. 14:32-41.

¹⁰ La ndekah kenca si e, reh me rombongen kalak si maba obor, pedang ras perpalu. I bas paksa si bage, perlu kalak enda metenget ras bijaksana. Tapi, mis Petrus ngelawan, janah itarikna pedangna jenari itampulna seh retap cuping Malkus, sekalak juak-juak imam si mbelin. Alu tenang ipersingeti Jesus me Petrus, ipepalemna luka e, janah ijelaskenna sada prinsip kerna la banci ngelakoken kekerasen si arus iikutken kerina pengikutna seh asa gundari. (Mat. 26:47-55; Luk. 22:47-51; Joh. 18:10, 11) Melala kesalahen si nggo ilakoken Petrus si perlu ialemi Tuanna. Pengalamen enda arusna ngingetken kita maka ”kerina kita megati erbahan salah”. (Oge Jakup 3:2.) Ise i bas kita nari si la perlu ialemi Dibata tep-tep wari? Tapi, i bas berngi e ka nandangi ilakoken Petrus kesalahen si terkeleken.

11, 12. (a) Uga Petrus ncidahken maka ia la percikcik kenca Jesus itangkap? (b) Uga Petrus gagal ngelakoken kai si nggo ikatakenna man Jesus?

¹¹ Ikataken Jesus man rombongen e maka adi ia kin si idaramina, arus ipelepas kalak e rasul-rasulna lawes. La banci kai pe ilakoken Petrus sanga iiket kalak e Jesus. Kenca si e, kiam me Petrus ras rasul-rasul si debanna.

¹² Petrus ras Johanes ngadi kiam, banci saja i deher rumah bekas Imam si Mbelin Annas, ingan Jesus tangtangna ibaba guna ipereksa. Asum Jesus ibaba jenari, Petrus ras Johanes ngikuti ia tapi ”dauh-dauh nari”. (Mat. 26:58; Joh. 18:12, 13) Petrus labo percikcik. Pasti arus pang ia ngikuti Jesus. Rombongen e maba senjata, janah nggo ilukai Petrus salah sada i bas kalak e nari. Tapi, i jenda la siidah kekelengen si setia i bas diri Petrus bagi si ikatakenna eme nggit mate ras Tuanna adi perlu.—Mrk. 14:31.

13. Kai cara si patut guna ngikuti Kristus?

¹³ Bagi Petrus, nterem kalak gundari icubakenna ngikuti Kristus ”dauh-dauh nari” gelah ula lit si mperdiatekenca. Tapi, bagi si isuratken Petrus i bas pudi wari, sada ngenca cara si patut guna  ngikuti Kristus eme alu ngerembakken diri ras ia janah ”ngikutken kerina dalanna” (Terjemahan Dunia Baru, [NW]), ngikutken usihenna i bas kai pe, la soal kai akibatna.—Oge 1 Petrus 2:21.

14. Kai si ilakoken Petrus i bas berngi Jesus iadili?

¹⁴ Alu metenget, iikuti Petrus rombongen e janah dungna seh i gerbang salah sada rumah si mewahna i Jerusalem eme rumah Kayapas, imam si mbelin si erkuasa dingen bayak. Rumah-rumah si bage biasana ikeleweti kesain si mbelang, janah i lebe-lebena lit gerbang. Petrus seh i gerbang tapi la ipediat masuk. Johanes, si nandai imam si mbelin janah nggo lit i bas, reh janah ipindona penjaga gerbang gelah ipediatna Petrus masuk. Banci saja, Petrus la tetap ras Johanes, la ka iusahakenna masuk ku rumah guna nemani Tuanna. Tetap ia i kesain, i ja budak-budak ras pelayan paksana cudu i deher api i bas berngi si mbergeh e, janahna mperdiateken saksi-saksi palsu pegancih-gancih masuk ku ruang pengadilen guna nuduh Jesus.—Mrk. 14:54-57; Joh. 18:15, 16, 18.

15, 16. Jelasken uga nubuat Jesus igenepi kerna Petrus si telu kali mersoken Jesus.

¹⁵ Erkiteken iterangi api unggun, diberu si nggo mpediat Petrus masuk i gerbang banci mperdiateken ia alu lebih jelas. Itandai diberu e ia. Nina janahna nuduh, ”Kam pe megati kap ras Jesus kalak Galilea ah.” Erkiteken sengget, ipersoken Petrus maka itandaina Jesus, ntah pe ikatakenna maka la iangkaina kai si ikataken diberu e. Lawes ia ku deher gerbang, iusahakenna gelah la iperdiateken kalak, tapi diberu si deban mperdiateken ia janah ngataken hal si seri, ”Ia kap teman Jesus kalak Nasaret e.” Petrus ersumpah, ”La kutandai pe ia!” (Mat. 26:69-72; Mrk. 14:66-68) Banci jadi, kenca ipersokenna Jesus si peduakaliken enda me maka ibegi Petrus tekuak manuk, tapi la ku je perhatinna, alu bage la ingetna nubuat si ikataken Jesus piga-piga jam ope si e.

¹⁶ La ndekah kenca si e, iusahaken Petrus denga gelah la iperdiateken kalak. Tapi, piga-piga kalak si cinder i kesain reh ndeheri ia. Salah sada i bas kalak e kade-kade Malkus denga, juak-juak si ilukai Petrus. Nina man Petrus, ”Ma kam kin si kuidah ras ia asum i bas peken e?” Perlu iakap Petrus erban kalak e tek adi kalak e salah. Erkiteken si e, ersumpah ia alu ngataken maka nggit ia mate adi ia erbual. Enda me si petelukaliken Petrus mersoken Jesus. Kenca ibelaskenna kata-kata e, mis terbegi tekuak manuk, tekuak si peduaken si ibegi Petrus berngi e.—Joh. 18:26, 27; Mrk. 14:71, 72.

17, 18. (a) Uga tanggapen Petrus sanga isedarina maka nggo kecewa kal ibanna Tuanna? (b) Kai si banci saja iukuri Petrus?

¹⁷ Sanga ndarat Jesus ku teras, jumpa mata ia ras Petrus bagi si nggo ituriken. Mis Petrus sadar maka nggo mekelek kal salahna,  ibanna Tuanna kecewa. Itadingken Petrus kesain e, getem kal pusuhna. Erdalan ia nuju ku kota, iterangi sinalsal bulan purnama si nandangi bene. Teridah iluh i bas matana. Dungna mambur me iluhna e. Getem kal pusuhna janah tangis kal ia terkesi-kesi.—Mrk. 14:72; Luk. 22:61, 62.

¹⁸ Sanga isedari sekalak jelma uga mekelekna kesalahenna, menukah kal ia erpengakap maka dosana e seh belinna janah lanai banci ialemi. Banci jadi e ka si iukuri Petrus. Payo nge lanai banci ia ialemi?

19. Kai si pasti igejapken Petrus erkiteken kesalahenna, tapi janari sieteh adi la ia putus asa?

¹⁹ Mesera mbayangkenca uga getemna pusuh Petrus sanga pultak matawari. Janah ercedana atena sanga idahna kai si terjadi seterusna man Jesus. Pasti isak-isakkenna dirina sanga mate Jesus i bas karabenna kenca erjam-jam isiksa! Pastilah ceda kal ate Petrus nginget mulihi uga ia nggo ikut nambahi ceda ate Tuanna i bas wari e, si kepeken wari pendungi kegeluhen Jesus selaku manusia. Aminna pe getem kal pusuhna, la Petrus putus asa. Sieteh kerna si e erkiteken mulihi ia ersada ras senina-seninana si deban. (Luk. 24:33) Pastilah erkadiola kerina rasul enda erkiteken perbahanenna i bas berngi e, emaka siapul-apulen me ia.

20. Kai si banci sipelajari arah perbahanen Petrus sanga ibanna salah sada keputusen si bijaksana?

²⁰ I jenda, siidah iban Petrus salah sada keputusen si seh kal bijaksanana. Adi iusahaken sekalak juak-juak Dibata asa ngasupna guna robah, Dibata banci ngalemi ia, aminna pe mekelek kal kesalahenna e. (Oge Kuan-kuanen 24:16.) Icidahken Petrus kiniteken situhu-tuhu alu ersada mulihi ras senina-seninana aminna pe getem kal pusuhna. Banci saja reh ukur sekalak jelma nerapken bana sisada sanga kitik kal ukurna ntah pe sanga erkadiola, tapi enda bahaya. (Kua. 18:1) Tindaken si mehulina eme tetap rembak ras turang senina sada kiniteken janah ndatken mulihi gegeh secara rohani.—Heb. 10:24, 25.

21. Erkiteken ersada ras senina-seninana sada kiniteken, berita kai si ibegi Petrus?

²¹ Erkiteken ersada ia ras senina-seninana sada kiniteken, banci ibegi Petrus berita si erbanca ia sengget eme mayat Jesus lanai lit bas kuburen. Kiam Petrus ras Johanes ku kuburen Jesus janah  penutupna nggo imeteraiken ntah pe isegel. Johanes si banci saja ngudan asangken ia, leben seh. Idahna kuburen nggo talang, sangsi ia masuk. Petrus la bage. Aminna pe kesah-kesahen denga, minter ia masuk ku bas kuburen. Kepeken nggo kosong!—Joh. 20:3-9.

22. Kai si erbanca bene kerina perasan sangsi ras ceda ate i bas diri Petrus?

²² Tek nge Petrus maka Jesus nggo ipekeke? Tangtangna lang, aminna pe piga-piga diberu si setia mere laporen maka malekat-malekat nggo ncidahken diri man kalak e guna mpebetehken maka Jesus nggo keke. (Luk. 23:55–24:11) Tapi, ope denga keri wari e, lanai lit perasan sangsi ras ceda ate i bas diri Petrus. Jesus nggo nggeluh, gundari jadi mahluk roh si mbisa! Icidahkenna dirina man kerina rasulna. Tapi si pemena, icidahkenna dirina man Petrus. I bas wari e, menurut rasul-rasul, ”Tuhu-tuhu Tuan enggo nggeluh mulihken! Enggo icidahkenna bana man Simon.” (Luk. 24:34) Bage ka pe, i bas pudi wari isuratken rasul Paulus maka i bas wari si istimewa e Jesus ”enggo encidahken dirina man Petrus, jenari man rasul si sepuluh dua kalak”. (1 Kor. 15:5) Simon eme gelar Petrus si deban. Icidahken Jesus dirina man bana i bas wari e, banci saja sanga Petrus sisada.

23. Engkai kalak Kristen gundari si ndabuh ku bas dosa perlu ingetna pengalamen Petrus?

²³ I bas Pustaka, la icatat penjelasen kerna perjumpan mulihi si erban ate megogo enda. Jesus ras Petrus ngenca metehsa. Si banci sibayangken eme uga megogona ate Petrus sanga idahna Tuan si ikelengina e nggeluh mulihi janah idatna kesempaten nuriken ceda atena ras pertobatenna. Si iarapkenna kal i bas wari e eme gelah ialemi. La isangsiken, ialemi Jesus ia alu simpar. Kalak Kristen gundari, si ndabuh ku bas dosa, perlu ingetna pengalamen Petrus enda. Ula pernah siakap maka lanai banci kita ialemi Dibata. Jesus alu serta ngusih Bapana, si ”simpar pengalemi dosa i bas Ia”.—Jes. 55:7.

24, 25. (a) Turiken kai si terjadi i bas berngi sanga Petrus ndarami nurung i Dano Galilea. (b) Kai tanggapen Petrus sanga iban Jesus mukjizat pepagina?

²⁴ Isuruh Jesus rasul-rasulna lawes ku Galilea, ingan kalak enda banci jumpa mulihi. Sanga seh i je, lawes Petrus nangkap nurung ku Dano Galilea. Lit piga-piga kalak ras ia. Sekali nari, Petrus i dano ingan ia nggo nggunaken melala waktuna sanga ia nguda. Sora perahu erderik, sora galumbang, ras jala si kasar lanai asing iakapna. La lit kai pe idat kalak enda i bas berngi e.—Mat. 26:32; Joh. 21:1-3.

²⁵ Tapi, nandangi erpagi-pagi, lit sekalak si ngerana alu sora si megang i bas pantai nari janah isuruhna kalak e ngamburken jalana  ku ingan si deban. Ilakoken kalak e janah idatna nurung kegalangen, lit 153 buena! Dungna, ieteh Petrus ise si ngerana e. Lompat ia bas perahu nari janah erlangi ku pantai. Sanga i pantai, iidangken Jesus nurung si itutung i bas arang man teman-temanna si setia. Tapi buen iberekenna perhatinna man Petrus.—Joh. 21:4-14.

26, 27. (a) Kesempaten kai si telu kali ibereken Jesus man Petrus? (b) Bukti kai si ibereken Jesus maka tuhu-tuhu ia nggo ngalemi Petrus?

²⁶ Nungkun Jesus man Petrus payo nge ikelengina Tuanna ”lebihen asangken si enda” (NW), banci saja janahna nuduhken  tanna ku nurung si mbue e. * I bas pusuh Petrus, belinen nge kekelengenna nandangi pendahinna nangkap nurung asangken kekelengenna man Jesus? Bali bagi Petrus nggo mersoken Tuanna telu kali, gundari ibere Jesus ia telu kesempaten guna mbuktiken kekelengenna i lebe-lebe teman-temanna. Asum itanggapi Petrus, ipebetehken Jesus carana ncidahken kekelengen e: alu mpelebe pelayanen i babo kerinana janah mere man ras mpermakani rarasen biri-biri Kristus, eme pengikut-pengikutna si setia.—Luk. 22:32; Joh. 21:15-17.

²⁷ Jadi, ipetetap Jesus ukur Petrus maka ia erguna denga man bana bage pe man Bapana. Ilakoken Petrus kari tanggung jabap si penting i runggun i bas pengawasen Kristus. Tuhu-tuhu bukti si jelas maka Jesus nggo ngalemi ia! Pastilah perkuah ate Jesus e kena kal ku pusuh Petrus, janah terus iingetna.

28. Uga Petrus nggeluh sentudu ras gelarna?

²⁸ Ertahun-tahun dekahna, setia Petrus ndalanken tugasna. Ipegegehina senina-seninana, bagi si iperentahken Jesus i bas berngi ope kematenna. Alu mehuli dingen sabar, Petrus mere man ras mpermakani pengikut-pengikut Kristus. Dilaki si gelarna Simon enda nggo nggeluh sentudu ras gelar si ibereken Jesus man bana eme Petrus, ntah pe Batu Karang, alu jadi pengaruh si tetap, paguh, janah banci iteki runggun. Melala bukti kerna si enda lit i bas dua suratna si mpebelin pusuh, surat pribadi si itulis Petrus si jadi buku-buku si meherga i bas Pustaka. Selain si e, surat-suratna pe ncidahken maka la pernah ilupaken Petrus pelajaren si idatna i bas Jesus nari kerna ngalemi.—Oge 1 Petrus 3:8, 9; 4:8.

29. Uga kita banci ngusih kiniteken Petrus ras perkuah ate Tuanna?

²⁹ Mbera kita pe banci muat pelajaren si seri. Tiap wari nge sipindo gelah ialemi Dibata melala kesalahenta? Sialoken nge pengalemen e janah tek nge kita nandangi kuasana si banci mbersihken kita? Janah, sialemi ka nge kalak si ersalah man banta? Adi silakoken e, siusih kiniteken Petrus ras perkuah ate Tuanna.