1. Petrusip misigisaasa ajor­ner­paar­taat suusimasin­naava?

PETRUSIP im­min­nut qiviar­ner­tik puiun­ngisaan­nar­paa. Jiisusip pakatser­pasin­nera as­suarin­nip­pasin­neraluun­niit isaatigut Petrusip takusin­naavaa? Taman­na qulak­keerlugu oqaatigisin­naan­ngilar­put, Biibilimi al­las­simaan­nar­poq ‘Naalak­kap Petrusi qiviaraa’. (Luk 22:61) Im­min­nut qiviaramik Petrusip ajor­tuliungaarsimal­luni paasivaa. Miserratigin­nin­ngisaan­nar­niarluni oqar­nikuugaluarluni Jiisusip siulit­tuineratorluin­naq iliorluni – Naalak­kaminik asasaminik miserratigin­nil­luni – paasivaa. Petrusi aatsaat taama ajor­tigisumik misigisaqar­poq.

2. Petrusip suna ilik­kar­tariaqar­paa, taan­nalu pil­lugu oqalut­tuaq qanoq iluaqutigisin­naavar­put?

² Petrusili suli neriuutis­saqar­poq. Up­perluar­tuugami ajor­tuliaminik aaq­qiisin­naal­lunilu Jiisusip ilin­niar­titsis­sutaasa pingaar­ner­paar­taasa ilaan­nik maleruaanis­sani – isumak­keerfigin­nit­taler­nis­sani – suli ilik­karsin­naavaa. Uagut­taaq taman­na aam­ma ilik­kar­tariaqaratsigu Petrusip isumak­keerfigin­nit­tar­nis­saq qanoq ilik­kar­neraa sam­meriar­tigu.

3, 4. (a) Petrusip Jiisusi qanoq aperaa, Petrusilu qanoq eq­qarsarunar­pa? (b) Petrusip taamani isigin­nit­taatsimit nalingin­naasumit sun­ner­neqarsimanera Jiisusip qanoq ersersip­paa?

³ Qaam­matit arfinil­lit mis­siliorlugit tamatuma sior­nagut Petrusip il­loqarfim­mi najuk­kamini, Kaper­naumimi, Jiisusi or­nip­paa aperalugulu: “Naalagaq, qatan­ngutiga uan­nut ajor­tulior­tar­toq qas­seriarlugu isumak­keerfigis­savara? Arfineq-marloriarlugu al­laat?” Petrusi isumaqarunar­poq kamagit­tar­tuul­luni. Taamanimi up­perisarsior­nik­kut siut­tut naaper­torlugit pingasoriaan­narluni isumak­keerfigin­nit­toqarsin­naavoq. Jiisusil­li ima akivaa: “Arfineq-marloriaan­nar­nagu, kisian­ni 77-eriarlugu al­laat.” – Matt 18:21, 22.

⁴ Petrusip ajor­tuliorfigineqar­nerminik kisitseq­qis­saar­tar­nis­saa Jiisusip pivaa? Naamik, Petrusip arfineq-marluk eq­qaasai  77-in­ngor­tin­nerisigut asan­nin­nerup isumak­keerfigin­nin­nermut tun­ngatil­lugu kil­liliisan­ngin­nera ersersip­paa. (1 Kor 13:4, 5) Petrusip taamani isigin­nit­taatsimit nalingin­naasumit sun­ner­neqarsimanera, inun­nik naak­kit­taatsunik isumak­keerfigin­nik­kusun­ngitsunil­lu ilaarsinera, Jiisusip ersersip­paa. Guutimil­li ilaarserusut­tut al­lanik isumak­keerfigin­nit­tuar­tariaqar­put. – 1 Johannesi 1:7-9 atuakkit.

5. Qaquguk­kut isumak­keerfigin­nin­neq pil­lugu ilik­kagaqar­nerusar­pugut?

⁵ Petrusip Jiisusi as­sor­tulin­ngilaa. Jiisusil­li ilin­niar­titsis­sutaa uum­mam­miuliup­paa? Ilaan­nik­kut al­lanit isumak­keerfigineqar­nis­samik qanoq pisariaqar­titsitigaluta paasigaangatsigu isumak­keerfigin­nin­neq pil­lugu ilik­kagaqar­nerusar­pugut. Taamaat­tumik Jiisusip toqunera sioq­qul­lugu pisut sam­meriar­tigit. Nalunaaqut­tap-akun­nerini taak­kunani Petrusi ajor­tulioqat­taar­poq Naalak­kaminil­lu isumak­keerfigineqar­tariaqarluni.

6. Jiisusip apustilini maniguun­nermik ilin­niar­tim­magit Petrusi sua, Jiisusil­li qanoq pivaa?

⁶ Un­nuk taan­na, Jiisusip nunarsuarmi inuuf­figisaa kingul­leq, pingaaruteqarluin­nar­poq. Jiisusip apustilini arlalin­nik, soorlu maniguun­nermik, suli ilin­niar­tik­kusup­pai. Jiisusi ajoqersuk­kami isigaan­nik asat­tuinermigut, kif­fat nikanar­ner­paat sulias­saan­nik isumagin­nin­nermigut, maniguun­nermik maligas­siuivoq. Siul­lermik Petrusip Jiisusi isik­kaminik asat­tuiniar­nersoq aperaa. Taava isik­kaminik asat­tueq­qun­ngilaa. Naggataatigul­li isik­kami saniatigut as­sam­minik niaq­quminil­lu Jiisusi asat­tueq­quaa! Jiisusip kamaatiler­nagu eq­qis­sisimal­luni iliuutsimi pingaaruteqas­susianik isumaanil­lu nas­suiaap­paa. – Joh 13:1-17.

7, 8. (a) Jiisusip kamagit­tar­nera Petrusip qanoq misileq­qip­paa? (b) Jiisusip inus­siar­nersuunini isumak­keerfigin­nit­tar­ninilu qanoq ersersit­tuar­pai?

⁷ Tamatuma kingunin­ngua Jiisusip kamagit­tar­nera Petrusip misileq­qip­paa. Apustilit kina arlar­tik an­nerunersoq oq­qas­sutigiler­paat, inut­tul­lu makitaneq pis­sutigalugu pisumi kan­ngunar­tumi tamatumani Petrusip oq­qateqataanera qular­nan­ngilaq. Jiisusil­li inus­siar­nersumik naq­qip­pai al­laal­lu iliuuserisimasaat, Naalak­kamin­nut ilumoorfigin­nin­nerat, pil­lugu nersualaarlugit. Tamarmil­li im­minik qimatsiumaar­nerat siulit­tuutigaa. Petrusi akil­luni oqar­poq Jiisusi toqumut al­laat najorusul­lugu. Jiisusil­li oqarfigaa kuk­kukooq angutiviaq marloriarluni qarlor­tin­nagu pingasoriarluni miserratigis­sagaani. Petrusip Jiisusi akerliliin­nar­nagu apustilinit al­lanit aalajaan­nerunerminik ersersitsiumaar­nini oqarataarutigaa! – Matt 26:31-35; Mark 14:27-31; Luk 22:24-28; Joh 13:36-38.

⁸ Jiisusip Petrusi kamaatiler­paa? Erloqingaaraluarluni Jiisusip  apustilimi naam­mal­luin­nan­ngitsut pis­susii nuan­nersut isiginiar­neruai. Petrusip miserratigis­sagaani nalun­ngik­kaluarlugu ima oqarfigaa: “Qin­nup­pak­kit up­persutsit soraaq­qunagu. Qaqugulu saak­kuit qatan­ngutitit nakus­satsik­kigit.” (Luk 22:32) Petrusip ajor­tuliani peq­qis­simis­sutigis­sagaa Guutimul­lu aalajaal­luni kif­far­toq­qiler­nis­saa qularinagu Jiisusip taamaalil­luni ersersip­paa. Inus­siar­nersuunermut isumak­keerfigin­nin­nermul­lu tun­ngatil­lugu maligas­saal­luangaarami, ilaa?

9, 10. (a) Sooq naatsiivim­mi Getsemanemi Petrusi naq­qin­neqar­tariaqar­pa? (b) Petrusip kuk­kus­sutai sumik eq­qaasitsis­sutigaavut?

⁹ Kingusin­nerusuk­kut naatsiivim­mi Getsemanemi Petrusi ataasiaan­nar­nani naq­qin­neqar­tariaqar­poq. Jiisusip qinunermini Petrusi, Jaaku Johan­nesilu eq­qumaq­quai. Jiisusip an­nilaangangaarluni tapersersor­neqar­tariaqar­nerani Petrusi ilaalu sinileqat­taar­put. Jiisusip misigin­neqatigin­nil­luni isumak­keerfigin­nil­lunilu ima oqarfigai: “Anersaaq kajumik­kaluar­poq, uinil­li qajan­nar­poq.” – Mark 14:32-41.

¹⁰ Tamatuma kingunin­ngua inupiluit nanerualisarlutik, panalisarlutik anaatalisarlutil­lu tikium­mata naliliisin­naas­suseqarlutik mianersorlutil­lu iliuuseqar­tariaqar­put. Petrusil­li isumaal­liorluni panani amoriarlugu Malkusip, palasiunerup kif­faata, niaquata tungaanut panariarami taan­na siutaar­paa. Jiisusip eq­qis­sisimal­luni Petrusi naq­qeriarlugu nakuusin­ngin­nis­samik najoq­qutas­siaq ajoqersugaasa ul­loq man­na tikil­lugu maleruagaat nas­suiar­paa. (Mat­t 26:47-55; Luk 22:47-51; Joh 18:10, 11) Petrusi Naalak­kaminut ajor­tulioqat­taareerami isumak­keerfigineqar­nis­samik pisariaqar­titsivoq. Petrusip kuk­kuneri tamat­ta ajor­tuliukulasar­nitsin­nik eq­qaasitsis­sutigaavut. (Jaaku 3:2 atuaruk). Tamat­ta ul­lut tamaasa Guutimit isumak­keerfigineqar­nis­saq pisariaqar­tit­tar­par­put. Petrusili un­nuaq taan­na suli ingasan­nerusunik ajor­tulior­tus­saavoq.

11, 12. (a) Jiisusi tigusaareermat Petrusip sapiis­suseqar­nini qanoq ersersip­paa? (b) Petrusi oqar­nermisut qanoq iliun­ngila?

¹¹ Jiisusip inupiluit oqarfigai ujaarip­pan­ni apustilini qimagutitiin­naq­qul­lugit. Petrusip al­latut ilioriarsin­naanani Jiisusi inupilun­nit tigusarineqar­toq isigin­naar­paa. Tamatumalu kingor­na apustilit al­lat ilagalugit qimaavoq.

¹² Palasiunerusimasup An­nasip il­luani Jiisusi siul­lermeerluni kil­lisior­neqar­poq, im­maqalu taas­suma eq­qaani Petrusip Johan­nesil­lu qimaajun­naarlutik Jiisusi tas­san­nga ingerlan­neqarmat “ungasianiit” maliler­paat. (Matt 26:58; Joh 18:12, 13) Petrusi qunutuujun­ngilaq. Malin­naas­saguni sapiis­suseqangaar­tariaqar­poq. Inupiluit sak­kulisar­tut ilaat Petrusip in­narlereer­paa. Matumanili Petrusi  pisariaqas­sap­pat Naalak­kaminik toqoqateqar­nis­samut piumas­suseqar­nerminik, ilumoorfigin­nil­luni asan­nin­nermik ersersitsiumaar­nerminik, oqarsimanini malil­lugu iliun­ngilaq. – Mark 14:31.

13. Kristusi taamaal­laat qanoq malin­neqarsin­naava?

¹³ Ul­lumik­kut inup­pas­suit Petrusip pisimaneratut al­lanit malugineqan­ngin­nias­sagamik Kristusi “ungasianiit” malin­niar­tar­paat. Petrusil­li kingusin­nerusuk­kut al­lan­neratut Kristusi malis­sagutsigu sapin­ngisamik qanit­tariaqarlugulu iliuutsit­ta qanoq kinguneqar­nis­saat apeq­qutaatin­nagu maligas­siuinera ilaar­tariaqar­par­put. – 1 Petrusi 2:21 atuaruk.

14. Jiisusip un­nuak­kut eq­qar­tuus­saanerani Petrusi sua?

¹⁴ Jiisusi Jerusalemimi il­lorsuarmukaan­neqarmat Petrusi malin­naavoq. Il­lorsuaq taan­na Kajfasip, pisuup palasiunerul­lu pis­saaneqangaar­tup, najugaraa. Il­lorsuit taamaat­tut nalingin­naasumik kaajaluisalerlugit saavatigul­lu isaarialerlugit sananeqar­tar­put. Petrusi isaariamut pivoq, iseq­qusaananili. Johan­nesip, palasiunermik ilisarisiman­nit­tup isereersul­lu, uterluni isaaf­fim­mik paarsisoq akuersitil­lugu Petrusi iser­tip­paa. Petrusip Johan­nesi nikorfaqatigigunan­ngilaa; aam­ma Naalak­kani tapersersor­niarlugu il­lumut iser­niarsarin­ngilaq. Inus­siat kif­fal­lu un­nuak­kut nil­ler­tumi eq­qar­tuus­sinerup nalaani Jiisusi pil­lugu sal­lul­lutik nalunaajaasus­sat iserlutil­lu aneqat­taar­tut isigin­naarlugit ikumatitap eq­qaaniit­tut ilagalugit kaajaluisamiigin­nar­poq. – Mark 14:54-57; Joh 18:15, 16, 18.

15, 16. Petrusip pingasoriarluni miserratigin­nin­nis­saa pil­lugu Jiisusip siulit­tuutaa qanoq eq­quut­toq nas­suiaruk.

¹⁵ Kif­fap ar­nap Petrusi isaariak­kut iser­titani ikumatitap qaamanerani takul­luarsin­naaleramiuk ilisariler­paa. Ima un­nerluus­ser­palul­luni oqar­poq: “Il­lit­taaq Jiisusi Galilæamioq ilagaat.” Petrusi tupaal­lal­luni Jiisusi ilisarisiman­ngin­nerar­paa al­laal­lu kif­fap ar­nap suna pineraa paasin­ngin­nerarlugu. Al­lanit maluginiar­neqarumanani isaariaanut anil­lap­poq, kif­fal­li ar­nap al­lap ilisaraa imalu oqarluni: “Uuma Jiisusi Nazaretimioq ilagaa.” Petrusi up­per­narsaavoq: “Inuk taan­na naluara.” (Matt 26:69-72; Mark 14:66-68) Im­maqa matumani aap­pas­saanik misiar­nermini kuk­kukooq angutiviaq qarlor­toq Petrusip tusaavaa, Jiisusil­li nalunaaqut­tap-akun­neri arlalialuit sioq­qul­lugit siulit­tuutaanik eq­qaaman­nin­nis­samut tupaq­qaval­laarluni.

¹⁶ Petrusi malugineqarumanani toq­qor­ter­niarsarivoq. Sivitsun­ngitsorli inuit kaajaluisamiit­tut taas­suma tungaanukar­put. Malkusip, kif­fap Petrusimit in­narler­neqar­tup, ilaqutaa taak­kua ilagaat. Taan­na Petrusimut ima oqar­poq: “Ilagalugu naatsiivim­miit­tutit takun­ngin­ner­pak­kit!” Petrusi misigigami kuk­kuneran­nik qularun­naarsit­tariaqarlugit, sal­lusimaguni perloq­quneqar­nis­saminik oqaaseqarunarluni, up­per­narsaaq­qip­poq. Matumani Petrusip Jiisusi pingajus­saanik  miserratigaa. Taamatul­lu oqar­niariar­toq kuk­kukooq angutiviaq un­nuk taan­na aap­pas­saanik qarlor­poq. – Joh 18:26, 27; Mark 14:71, 72.

17, 18. (a) Naalak­kaminut qanoq ingasatsigisumik ajor­tuliorsimal­luni paasigamiuk Petrusi sua? (b) Petrusi qanoq misigigunar­pa?

¹⁷ Jiisusi aneerasaar­tarfim­mut kaajaluisamut sam­misumut anil­laq­qam­mer­poq. Tas­sani kapitalip aal­laq­qaataani al­laatigineqar­tutut Petrusi qiviar­paa. Taamaalisorlu Petrusip qanoq ingasatsigisumik Naalak­kaminut ajor­tuliorsimal­luni paasiler­paa. Kaajaluisamit anil­lap­poq ilerasungaangaarluni. Qaam­matip tarrik­kiar­tor­tup qin­ngor­nerani il­loqarfiup aq­quser­ngisigut ingerlavoq. Qul­lilineranik isigisai iseriaasap­put. Nunusin­naajun­naarami qiangaaler­poq. – Mark 14:72; Luk 22:61, 62.

¹⁸ Inuk qanoq ingasatsigisumik ajor­tuliorsimal­luni paasigaangamiuk isumak­keerfigineqarsin­naan­ngitsutut misigeq­qajaasin­naasar­poq. Petrusi aam­ma taamatut misigigunar­poq. Isumak­keerfigineqarsin­naava?

19. Petrusi ajor­tulior­nini pil­lugu qanoq misigisimas­sava, qanorlu nalun­ngilar­put isumatsan­nini pil­lugu sapilin­ngitsoq?

¹⁹ Aqaguani Jiisusi qanoq pineqar­toq takul­lugu Petrusi aliasun­nerulersimas­saaq. Ul­loq taan­na nalunaaqut­tap-akun­neri arlal­lit naal­lioreerluni Jiisusi toqum­mat im­minut avoq­qaarisimas­saaq. Naalak­kami nunarsuarmi inut­tut naggam­mik inuunermini naal­liun­neranik ajor­nerulersitsisimanini eq­qaagaangamiuk Petrusi aliasungaar­tarsimas­saaq. Petrusi aliasungaaraluarluni isumatsaq­qanini pil­lugu sapilin­ngilaq. Sivitsun­ngitsormi ajoqersuk­kat al­lat ilagilerai oqalut­tuami eq­qaaneqarmat taman­na nalun­ngilar­put. (Luk 24:33) Qular­nan­ngitsumik apustilit tamarmik ip­pas­saam­mat alianar­tumik pisoqarmat iliuutsitik peq­qis­simis­sutigalugit sapin­ngisamin­nik tup­pal­lersaqatigiin­niarsarip­put.

20. Petrusip aalajangigaasa pitsaaner­paar­taasa ilaat qanoq ilin­niarfigisin­naavar­put?

²⁰ Matumani Petrusip aalajangigaasa pitsaaner­paar­taasa ilaat ersarip­poq. Guutip kif­fani kuk­kus­sutiminik, im­maqa al­laat ajorluin­nar­tumik, aaq­qiiniarluni sapin­ngisaminik iliuuseqar­toq isumak­keerfigisin­naavaa. (Ussatit 24:16 atuaruk). Aliasungaaraluarluni qatan­ngutiminik peqateqar­nermigut Petrusip ilumoor­tumik up­per­nini ersersip­paa. Inuk aliasungaar­toq ilerasuuteqangaar­torluun­niit im­mik­koor­niarsin­naasar­poq, taman­nali ulorianarsin­naavoq. (Us­s 18:1) Up­peqatinut at­taveqar­tuar­neq anersaak­kul­lu nakus­satseq­qin­neq pitsaanerujuaan­nar­put. – Hebr 10:24, 25.

21. Petrusip anersaak­kut qatan­ngutini ilagigamigit suna tusar­paa?

 ²¹ Petrusip anersaak­kut qatan­ngutini ilagigamigit Jiisusip timaata ilivermiin­ngin­nera pil­lugu nutaarsias­saq uis­suum­minar­toq tusar­paa. Petrusi Johan­nesilu Jiisusip ilivianut ujaq­qamik as­ser­neqarsimasumut ar­pap­put. Johan­nesi, inuusun­nerugunar­toq, siul­liul­luni apuup­poq. Iliveq am­masoq takugamiuk qulaler­poq. Petrusili aner­tik­karaluarluni ingerlaan­naq iser­poq. Jiisusip timaa ilivermiin­ngilaq! – Joh 20:3-9.

22. Sooq Petrusi aliasuk­kun­naarlunilu qularun­naar­pa?

²² Jiisusip makititaasimanera Petrusip up­peraa? Aal­laq­qaam­muun­ngitsoq. Jiisusip toqusunit makis­simanera nalunaarutiginiarlugu in­ngilit saq­qum­mer­nerat pil­lugu ar­nat oqalut­tuar­tut up­perin­ngilai. (Luk 23:55-24:11) Ul­lorli taan­na naangajalersoq Petrusi aliasuk­kun­naarlunilu qularun­naar­poq. Jiisusi anersaatut pis­saanilit­tut makis­simavoq! Ajoqersuk­kaminut tamanut saq­qum­mer­poq. Petrusili saq­qum­merfigeq­qaar­paa. Ul­loq taan­na apustilit ima oqar­put: “Naalagaq ilumut makis­simavoq, Siimuul­lu takusimavaa.” (Luk 24:34) Taamatut­taaq ul­loq taan­na Jiisusip “Kefasimit kingor­nalu taak­kunan­nga aq­qaneq-marluusunit” takuneqar­nera apustilip Paulusip al­laatigaa. (1 Kor 15:5) Petrusi Kefasimik Siimuumil­lu taaneqar­tar­poq. Jiisusip ul­loq taan­na Petrusi kisimiitsil­lugu saq­qum­merfigaa.

23. Sooq ul­lumik­kut kristumiut ajor­tuliorsimasut Petrusi pil­lugu oqalut­tuaq eq­qaamasariaqar­paat?

²³ Naapin­neq kil­litsin­nar­toq taan­na Biibilimi sukumiinerusumik al­laatigineqan­ngilaq. Jiisusip Petrusil­lu kisimik qanoq pisoqar­toq nalun­ngilaat. Takorluuin­narsin­naavar­put Naalak­kami asasami makis­simasup takunera aam­ma aliasungaar­nerminik peq­qis­siminerminil­lu oqalut­tuun­nera Petrusip kil­lin­neqaatigingaarai. Petrusip isumak­keerfigineqar­nis­sani al­lanit tamanit kis­saatiginer­paavaa. Jiisusimit isumak­keerfigineqarluin­nar­nera qularin­ngil­luin­narsin­naavar­put. Ul­lumik­kut kristumiut ajor­tuliorsimasut Petrusi pil­lugu oqalut­tuaq eq­qaamasariaqar­paat. Guutimit isumak­keerfigineqarsin­naan­ngitsutut eq­qarsan­ngisaan­nar­tariaqar­pugut. Jiisusip Ataatani, ‘isumak­keerfigin­nit­tuar­toq’, as­sigil­luin­nar­paa. – Es 55:7.

24, 25. (a) Petrusip Galilæap Tasersuani un­nuak­kut aalisar­nera oqalut­tuariuk. (b) Aqaguani ul­laak­kut Jiisusi tupin­nar­tuliormat Petrusi sua?

²⁴ Jiisusip apustilini naapeq­qin­nias­sagamigit Galilæamukaq­quai. Apuuk­kamik Petrusi Galilæap Tasersuani aalisar­niarluni aalajanger­poq. Apustilit arlal­lit aalisariaqatigaat. Petrusi tasersuarmi ilisimal­luak­kamini  aalisaq­qiler­poq. Umiatsiap neeq­qulup­palun­nera, imar­palun­nera qas­sutinil­lu pas­sus­sinini alian­naarutigisimas­savai. Un­nuaq taan­na angutit pisaqan­ngil­lat. – Matt 26:32; Joh 21:1-3.

²⁵ Qaaler­nerani angutip tasersuup sinaaniit aalisar­tut umiatsiap il­luatungaatigut qas­suseq­qul­lugit suaar­pai. Peq­qusineratut ilioramik aalisak­kat 153-it pisaraat! Petrusip angut kinaanersoq nalun­ngilaa. Umiatsiamit imaanut tingivoq nunal­lu tungaanut nalulerluni. Jiisusip ikin­ngutini aalajaatsut aalisak­kanik siaasak­kaminik tasersuup sinaani sas­saal­lerfigereerlugit Petrusi oqaloqatigiler­paa. – Joh 21:4-14.

26, 27. (a) Jiisusip Petrusi sunis­samut pingasoriarluni periarfis­sip­paa? (b) Jiisusip Petrusi isumak­keerfigil­luin­narlugu qanoq up­per­narsar­paa?

 ²⁶ Jiisusip aalisak­kat im­maqa tik­kuariarlugit Petrusi ima aperaa: “Taak­kunan­nga asaneruinga?” (NW) Petrusip aalisar­tutut inuuneq Jiisusimit asaneruaa? Petrusip Naalak­kani pingasoriarluni miserratigaa, maan­nalu ikin­ngutini tusaatil­lugit Jiisusimik asan­nin­nerminik pingasoriarluni up­per­narsaanis­samut periarfis­sin­neqar­poq. Petrusi up­per­narsaagaangat Jiisusip il­ler­nar­tumik kif­far­tor­nermik sal­liutitsinik­kut, Kristusip savaataanik – ajoqersuk­kanik aalajaatsunik – nerliinik­kut, nakus­satsitsinik­kut paarsinik­kul­lu asan­nin­nermik ersersitsisaq­qul­lugu oqarfigisar­paa. – Luk 22:32; Joh 21:15-17.

²⁷ Jiisusip taamaalil­luni Petrusip im­minit Ataataminil­lu atorluar­neqarsin­naanera up­per­narsar­paa. Ilagiin­ni Kristusimit siulersor­neqar­tuni Petrusi pingaarutilim­mik inis­sisimaf­feqalis­saaq. Jiisusip isumak­keerfigin­nil­luin­nar­neranut taman­na up­per­narsaataal­luar­poq! Qular­nan­ngitsumik Petrusip Jiisusimit isumak­keerfigineqar­nini qujamasuutigalugulu kuk­kus­sutini ilin­niutigaa.

28. Petrusi aterminut naaper­tuut­tumik qanoq iliuuseqar­pa?

²⁸ Petrusip sulias­sani ukior­pas­suar­ni aalajaal­luni isumagaa. Jiisusip toqunis­sani aqagut­toq un­nuk­kut peq­qusineratut qatan­ngutini nakus­satsip­pai. Kristusip ajoqersugai Petrusip saamal­luni kamagit­tarlunilu paaralugil­lu nerlersor­pai. Jiisusimit Petrusimik, qaarsumik isumalim­mik, atser­neqar­nerminut naaper­tuut­tumik iliuuseqar­poq. Petrusi ilagiin­nut iluaqutaasumik patajaal­lunilu aalajaal­lunilu tatiginar­tuuvoq. Taman­na asan­nil­luni al­lagaanit marlun­nit, Biibilimi atuak­kanit pingaaruteqar­tunit, up­per­narsar­neqar­poq. Jiisusip isumak­keerfigin­nin­neq pil­lugu ilin­niar­titsis­sutaanik Petrusip puiuk­kius­sisimanera al­lak­kanit taak­kunan­nga aam­ma ersersin­neqar­poq. – 1 Petrusi 3:8, 9; 4:8 atuakkit.

29. Petrusi up­per­toq Naalagaalu nal­lit­tuisoq qanoq ilaarsin­naavavut?

²⁹ Uagut­taaq taman­na ilin­niarfigil­luarsin­naavar­put. Kuk­kus­sutivut amerlasuut pil­lugit isumak­keerfigeq­qul­luta Guuti ul­lut tamaasa qin­nuigisar­par­put? Isumak­keerfigin­nin­nera akuerisarlugulu ajor­titsin­nik minguiar­neqarsin­naaner­put up­peraar­put? Al­lanik isumak­keerfigin­nik­kumasar­pugut? Taamaalior­tarut­ta Petrusi up­per­toq Naalagaalu nal­lit­tuisoq ilaas­savavut.