1, 2. Perubahen kai si terjadi i doni mulai jaman Nuah, janah kai pengaruhna man Abram?

ITATAP Abram ku datas, itatapna ndekah menara si megah dingen meganjang i kuta kemulihenna, Ur. * Terbegi sora si seh kal gejekna, janah teridah asap erdipul ku langit. Imam-imam dewa bulan paksana ka mpersembahken korban. Bayangken, erbalik Abram janah ikupir-kupirkenna takalna, iringutkenna ayona. Asum mulih ia mentasi terpuk jelma si nterem bas dalan, banci saja iukurina penembahen berhala si seh kal buena i Ur. Penembahen si ciga ate e tuhu-tuhu nggo seh ku japa pe mulai jaman Nuah nari!

² Nuah mate dua tahun sope Abram tubuh. Paksa ndarat Nuah ras keluargana bas bahtera nari kenca Banjir si Mbelin, ipersembahkenna korban man Dibata Jahwe, jenari teridah benteha. (Kej. 8:20; 9:12-14) Paksa si e, sada ngenca agama i doni eme agama situhu-tuhu. Tapi gundari, paksa kesusuren Nuah si pesepuluhken reh buena seh ku sebelang doni, kalak si nembah Jahwe sitik ngenca. I japa pe kalak nembah dewa-dewi kafir. Bapa Abram pe, Terah, ikut i bas penembahen berhala, banci saja erban berhala.—Jos. 24:2.

3. Asum Abram reh belinna, kai si erbanca ia beda, janah kai pelajarenna man banta?

³ Abram la seri ras kalak e. Asum ia reh belinna, teridah kal perbedanna erkiteken kinitekenna. Bas pudi wari pe, isuruh Dibata rasul Paulus nggelari ia ”bapa nandangi kerina kalak si tek”! (Oge Roma 4:11.) Mari siperdiateken uga Abram jadi sekalak dilaki  si bage. Alu bage, banci ka mbue sipelajari kerna cara mpebelin kiniteken.

4, 5. Kira-kira janari Abram erlajar kerna Jahwe, janah ngkai maka banci sikataken bage?

⁴ Uga Abram banci nandai Dibata Jahwe? Sieteh maka paksa si e lit juak-juak Jahwe si setia i doni. Salah sadana eme Sem, anak Nuah. Amin gia labo anak sintua, megati ia si pemena ituriken. Enda banci saja erkiteken mbelin kal kiniteken Sem. * La ndekah kenca Banjir e, ikataken Nuah maka Jahwe e ”Dibata Sem”. (Kej. 9:26) Iergai Sem kal Jahwe ras ibadat situhu-tuhu.

⁵ Itandai Abram nge Sem? Mungkin itandaina. Bayangken paksa Abram kitik denga. Pasti megah akapna paksa ietehna maka lit nini bulangna si nggeluh denga si umurna lebih 400 tahun! Enggo iidah Sem sendiri kejahaten doni sope Banjir, kenca e Banjir si Mbelin si mbersihken doni, janah uga bangsa-bangsa si pemena terbentuk asum umat manusia reh buena, bage ka pe masa-masa si serbut paksa pemberontaken Namrut i Menara Babil. Sem si setia la ikut i bas pemberontaken e, emaka paksa ikacauken Jahwe cakap kalak si mbangun menara e, Sem ras keluargana terus nggunaken cakap asli manusia, eme cakap si ipake Nuah. Keluarga Sem termasuk Abram. Emaka, kitik-kitikna nari Abram pasti ngergai Sem. Terlebih ka, Sem nggeluh denga ngasa umur Abram 150 tahun. Emaka, banci jadi Abram erlajar kerna Jahwe bas Sem nari.

6. (a) Uga Abram ncidahken maka idatna pelajaren si meherga i bas Banjir si Mbelin nari? (b) Kegeluhen si uga si idalani Abram ras Sarai?

⁶ Si pasti, mbue pelajaren si meherga si banci idat Abram bas Banjir si Mbelin nari. Iusahakenna erdalan ras Dibata, bali bagi Nuah. Eme sabapna Abram la nggit nembah berhala janah dungna la seri ras kalak si deban i Ur, banci saja ras keluargana pe. Tapi, dungna datna teman geluhna si merandal. Iempoina Sarai, sekalak diberu si labo ngenca mejile kal rupana, tapi mbelin ka kinitekenna man Jahwe. * Amin gia la lit pupusna, pasti mbelin kal  keriahen ukur si idatken pasangen enda i bas ngelayani Jahwe ras-ras. Kalak enda pe mpebelin anak senina Abram si melumang, Lut.

7. Uga carana pengikut Jesus ngusih Abram?

⁷ Abram la pernah nadingken Jahwe guna nembah berhala kota Ur. Ia ras Sarai nggit beda ras masarakat si nembah berhala i je. Adi sipebelin ateta kiniteken situhu-tuhu, perlu siusih kalak enda. Arus kita nggit beda. Ikataken Jesus maka pengikutna ’la sikerajangen doni’ emaka nembeh ate doni nandangi kalak e. (Oge Johanes 15:19.) Adi pernah kitik ukurndu perban itulak anggota keluarga ntah pe masarakat erkiteken keputusenndu guna ngelayani Jahwe, ingetlah maka kam labo sisada. Enggo ikutkenndu contoh si mehuli bas Abram ras Sarai nari si ngelayani Dibata alu kiniteken.

8, 9. (a) Kai pengalamen Abram si la terlupaken e? (b) Kai perentah Jahwe man Abram?

⁸ Bas sada wari, lit sada pengalamen Abram si la terlupaken. Idatna perentah bas Dibata Jahwe nari! Sitik ngenca ituriken bas Pustaka kerna keterangen e, tapi ikatakenna maka ”Dibata si Mulia” ncidahken baNa i lebe-lebe dilaki si erkiniteken enda. (Oge Perbahanen 7:2, 3.) Banci saja erkelangken malekat, iidah Abram kentisik kemulian si luar biasa bas Pribadi Si Erdolat bas alam semesta. Banci sibayangken uga riahna ukur Abram paksa idahna perbedan Dibata si nggeluh ras berhala si la nggeluh si isembah jelma si nterem paksa si e.

⁹ Kai perentah Jahwe man Abram? ”Tadingkenlah kade-kadendu ras negerindu; berkatlah ku negeri si Kutuduhken man bandu.” La ikataken Jahwe negeri si apai si imaksudkenNa, ituduhkenNa saja nge pagi man Abram. Tapi, si pemena, arus itadingken Abram kuta kemulihenna bage pe kade-kadena. I bas kebudayan Timur Tengah si nai, seh kal pentingna keluarga e. Adi lit sekalak dilaki si nadingken kade-kadena janah pindah ku ingan si ndauh, megati ianggap la mejile nasipna. Menurut piga-piga kalak, enda keleken asangken kematen!

10. Engkai maka keputusen Abram ras Sarai guna nadingken rumahna i Ur banci ikataken sada pengorbanen?

¹⁰ Nadingken kuta kemulihen perlu pengorbanen. Banci saja, Ur sada kota si sibuk janah makmur. (Nehen kotak ” Kota si Itadingken Abram ras Sarai”.) Penelitin nggo mbuktiken maka rumah-rumah si seh kal sikapna lit i Ur mbarenda; piga-piga rumah lebih sepuluh kamarna man keluarga ras pelayan, kerina ngkeleweti halamen si arah bas si lantena batu. Lit ka i je air mancur,  kamar mandi, ras WC. Selain si e, ingetlah maka Abram ras Sarai nggo metua; mungkin umur Abram 70-en, Sarai 60-en. Pasti ate Abram kegeluhen Sarai sikap ras terurus, bagi sura-sura kerina perbulangen si mehuli nandangi ndeharana. Bayangken kai si icakapken kalak e kerna tugas enda, erbage penungkunen ras kearun ate banci saja turah bas pusuhna. Pasti meriah kal ukur Abram paksa Sarai nggit ngadapi tantangen enda! Bali bagi Abram, ia pe nggit nadingken rumah ras kegeluhenna si nggo sikap.

11, 12. (a) Persikapen ras keputusen kai saja si perlu ibahan sope nadingken Ur? (b) Uga bayangenndu kerna kai si terjadi paksa kalak enda berkat?

¹¹ Erkiteken keputusen e, mbue si arus ilakoken Abram ras Sarai. Mbue kal si arus isikapkenna ras iaturkenna. Kai si perlu ibaba guna perdalanen ku ingan si lenga ietehna e, ras kai si arus itadingkenna? Arus ka iputuskenna kerna kai si arus ilakokenna nandangi keluarga, pelayanna, janah khususna bapa Abram, Terah. Iputuskenna me gelah maba Terah janah ngurus ia sedekah sisa geluhna. Banci ikataken Terah setuju berkat ras kalak enda, erkiteken ituriken kisah e maka Terah, selaku nini bulang, maba keluargana ndarat bas Ur nari. La iraguken, pasti nggo itadingkenna penembahen berhala. Anak senina Abram, Lut, ikut ka bas perdalanen e.—Kej. 11:31.

¹² Dungna, seh me wari kalak e berkat. Bayangken rombongen e pulung i darat tembok kota ras parik Ur. Bayangken ka unta-unta ras kelede-kelede si nggo dem barang, asuh-asuhen pe nggo ipepulung, keluarga ras pelayan pe nggo pulung. * Gundari, semangat me kalak enda guna berkat. Banci saja kerina mperdiateken Abram, nimai tanda bas ia nari gelah berkat. Dungna, seh me paksana, berkat me kalak enda, nadingken Ur seh rasa lalap.

13. Uga nterem juak-juak Jahwe gundari ncidahken semangat bagi Abram ras Sarai?

¹³ Gundari, nterem juak-juak Jahwe pindah ku negeri si lebih merluken mbue perberita Kinirajan. Si deban iputuskenna guna mpelajari cakap si mbaru gelah banci ningkatken pelayanen. Entah pe, lit ka si ncubaken cara erberita si lenga pernah icubakenna ntah pe la cocok man bana. Biasana, keputusen si bage perlu pengorbanen, alu ukur meriah nadingken kegeluhen si nggo jore ngasa taraf tertentu. Seh kal ulina semangat e, janah tuhu-tuhu menam bali ras semangat si icidahken Abram ras Sarai! Adi sicidahken kiniteken si bage, banci kita tek maka lalap nge buen kai  si ibereken Jahwe man banta asangken kai si nibereken man baNa. La pernah Ia lupa mereken upah nandangi kiniteken juak-juakNa. (Heb. 6:10; 11:6) Bage kin si ilakokenNa man Abram?

14, 15. Jelasken uga perdalanen bas Ur nari ku Haran, janah ngkai maka iputusken Abram tading piga-piga waktu i Haran?

¹⁴ Rombongen ndai terbiasa dungna bas perdalanen. Banci sibayangken Abram ras Sarai si maun-maun erdalan, janah maun-maun ngersak unta ntah pe kelede. Asum kalak e ercakap-cakap, terbegi sora giring-giring asuh-asuhenna. Alu manjar-anjar, perlajang si kurang erpengalamen e nggo reh beluhna masang ras mbongkar kemah janah nampati Terah si nggo metua i das unta ntah pe kelede. Terus kalak enda erdalan ku barat laut, ngalur-ngaluri Lau Eprat. Tande wari tande mingguna, sambar terus pemandangen si iidahna.

¹⁵ Dungna, kenca erdalan kira-kira 960 kilometer dauhna, seh me kalak e i sapo-sapo si bentukna bagi asar lebah i Haran, sada kota si makmur i persimpangen jalur perdagangen Timur-Barat. Ngadi me kalak e, janah tading i je piga-piga waktu dekahna. Banci saja, nggo lanai ngasup Terah nerusken perdalanen.

16, 17. (a) Perjanjin kai si erban meriah ukur Abram? (b) Uga Jahwe masu-masu Abram sedekah tading i Haran?

 ¹⁶ Dungna, mate me Terah paksa umurna 205 tahun. (Kej. 11:32) Terapuli kal Abram paksa ia erceda ate e erkiteken ngerana Jahwe sekali nari. Iulihi Dibata perentah si ikatakenNa i Ur janah iperjelasNa janji-janjiNa. Abram jadi ”bangsa si mbelin” me pagi, janah kerina keluarga i doni ipasu-pasu arah ia. (Oge Kejadin 12:2, 3.) Meriah kal ukur Abram megi perjanjin si ibahan Dibata enda janah sedar ia maka gundari me waktuna guna nerusken perdalanen.

¹⁷ Tapi, sekali enda arus terbuen si man pesikapen Abram erkiteken ipasu-pasu Jahwe ia sedekah tading i Haran. Kisah e nuriken kerna ”kerina erta-ertana, ras budak-budakna si idatsa sanga ia i Haran”. (Kej. 12:5) Gelah jadi sada bangsa, perlu Abram terbuen erta ras juak-juak, sada keluarga si mbelin. Labo lalap ibahan Jahwe juak-juakNa bayak, tapi ibereNa kai si iperluken juak-juakNa guna ngelakoken peratenNa. Erkiteken nggo ipegegehi, berkat Abram ras rombongen e ku ingan si la ietehna.

18. (a) Ndigan Abram ngalami peristiwa si seh kal pentingna i bas sejarah kerna hubungen Dibata ras umatNa? (b) Kejadin si penting kai ka si terjadi bas tanggal 14 Nisan? (Nehen kotak ” Tanggal si Penting i bas Sejarah Pustaka”.)

¹⁸ Kenca piga-piga wari berkat Haran nari, seh me kalak enda i Karkemis, ingan si biasa ibentasi rombongen perlajang guna ngepari Eprat. Banci saja, i jenda me Abram ngalami peristiwa si seh kal pentingna i bas sejarah kerna hubungen Dibata ras umatNa. Banci jadi ibaba Abram rombongenna ngepari lau e bas wari si pesepuluh empatken bas bulan si bas pudi wari igelari Nisan, i bas tahun 1943 SM. (Kel. 12:40-43) I selatan, lit negeri si nggo ijanjiken Jahwe man Abram. Bas wari e me perjanjin Dibata ras Abram mulai berlaku.

19. Janji Dibata man Abram nuriken kerna kai, janah banci saja enda ngingetken Abram nandangi kai?

¹⁹ Erdalan Abram ku arah selatan negeri e, janah ngadi rombongen e i deher batang-batang kayu Moreh, deher Sikem. I je, sekali nari ngerana Jahwe man Abram.  Sekali enda kerna janji Dibata si nuriken kerna kesusuren Abram, si ngkuasai negeri e pagi. Inget Abram nge nubuat si ijanjiken Jahwe i Eden, kerna ’kesusuren’, si sada masa pagi nelamatken umat manusia? (Kej. 3:15; 12:7) Banci saja. Tempa nggo mulai iidahna, amin pe lenga jelassa, maka ia me bagin i bas tujun Jahwe si mulia.

20. Uga nge Abram ncidahken pengerganna nandangi hak istimewa si ibereken Jahwe man bana?

²⁰ Iergai Abram kal hak istimewa si ibereken Jahwe man bana. Asum mereksa negeri e alu metenget erkiteken kalak Kanaan denga si ngianisa, ipajekken Abram me batar-batar man Jahwe, si pemena i deher batang-batang kayu Moreh, kenca e i deher Betel. Ilebuhna gelar Jahwe, banci saja guna nuriken pengataken bujur bas pusuhna nari man Dibata asum ngukuri masa depan kesusurenna. Banci saja, erberita ka ia man kalak Kanaan si lit i je. (Oge Kejadin 12:7, 8.) Tentu saja, lit denga tantangen-tantangen si mbelin nandangi kiniteken Abram. Alu bijaksana la inehen Abram ku pudi, ku rumah ras kesangapen si itadingkenna i Ur. Itatapna ku lebe. Ikataken Heber 11:10, ”Abraham nimai kuta si enggo irencanaken dingen ipanteki Dibata, e me kuta si nteguh palasna.”

21. Uga buena pemetehta kerna Kinirajan Dibata ibandingken ras Abram, janah teriahken kam guna ngelakoken kai?

²¹ Gundari, kita si ngelayani Jahwe nggo buen sieteh asangken Abram kerna kuta gambaren e, Kinirajan Dibata. Sieteh maka Kinirajan e nggo erkuasa i surga janah nandangi ngkernepken doni enda, janah sieteh maka Kesusuren Abram si nggo ndekah ijanjiken, Jesus Kristus, nggo merentah gundari bas Kinirajan e. Tuhu-tuhu sada hak istimewa adi banci siidah Abraham nggeluh mulihi janah dungna iangkaina tujun Dibata si lenga jelassa kal iangkaina mbarenda! Nggit nge kam ngidah Jahwe nggenepi tep-tep janjiNa? Emaka, seh kal pentingna adi terus ilakokenndu kai si nggo ilakoken Abram. Cidahken semangat erkorban alu ukur meriah, kepatuhen, ras pengergan si mbages nandangi hak istimewa si ibereken Jahwe man bandu. Usihlah kiniteken Abram. Alu bage, ”bapa nandangi kerina kalak si tek” e pe banci jadi bapandu!