1, 2. Ngande wakatshikitana andja ɔnɛ ntatɛ oma lo nshi ya Nɔa, ndo shɛngiya yakɔna yaki la dui sɔ le Abrahama?

ABRAHAMA akendaka la ntondo kande, ko nde akɛnyi zigurata, mbuta ate tɛmpɛlɔ ka l’osomba ande wa Ura. * Anto wakadaka ekoko ndo dinga diakatotɔka lɛkɔ. Ɛlɔmbɛdi wa nzambi-ngɔndɔ wakalambolaka elambo. Tɔshi dia tekɔ lo mɛna woho wambonya Abrahama washo oma lɛkɔ ndo watshindjande ɔtɛ la lonyangu. Lam’akandatetetaka l’atei wa nyemba y’anto waki lo toshinga, nde akakanyiyaka ondo dikambo di’ɔtɛmwɛlɔ wa dikishi wakakokanɛ la Ura. Ande woho wakakokanɛ ɔtɛmwɛlɔ wa kɔlɔ ɔsɔ ntatɛ oma lo nshi ya Nɔa lee!

² Nɔa akavu ɛnɔnyi ehende eto la ntondo k’Abrahama mbotɔ. Etena kakatombe Nɔa la nkumbo kande oma lo waato wa luudu l’ɔkɔngɔ wa Mvula k’elola, nde akalambola Jehowa Nzambi olambo, ko Jehowa Nzambi akatondja ngolo l’olongo. (Etat. 8:20; 9:12-14) Etena kɛsɔ, ɔtɛmwɛlɔ ɔtɔi oto wa pudipudi mbaki lo nkɛtɛ k’otondo. Koko etena kɛnɛ kambodiangana lɔlɔnga la dikumi oma le Nɔa lo nkɛtɛ k’otondo, ɔtɛmwɛlɔ wa pudipudi waya bu ahole tshɛ. Anto wa l’ahole tshɛ wekɔ lo ntɛmɔla tozambizambi t’apanganu. Kaanga Tɛra ka she Abrahama, akatɛmɔlaka dikishi, ndo ondo nde akadisɛlaka.—Jash. 24:2.

3. Dionga diakɔna diakatshikitanya Abrahama l’anto akina, ndo wetshelo akɔna wakokaso nkondja oma lo dikambo sɔ?

³ Abrahama akatshikitana l’anto akina, nɛ dia nde aki la mbetawɔ le Nzambi. Diakɔ diakayowelɛka ɔpɔstɔlɔ Pɔɔlɔ l’ɔkɔngɔ ate: “She anto tshɛ wele la mbetawɔ.” (Adia Rɔmɔ 4:11.) Nyɛsɔ tende kɛnɛ kakakimanyiya Abrahama dia nde monga la mbetawɔ ka nge ka ngasɔ. Sho kokaka nkondja wetshelo w’efula wendana la woho wa monga la mbetawɔ ka ngasɔ.

4, 5. Oma le na ondo akeke Abrahama akambo efula wendana la Jehowa ndo lande na kataso dia ondo dikambo sɔ diaki ngasɔ?

⁴ Ngande wakayokomaka Abrahama lo mbeya awui wendana la Jehowa Nzambi? Sho mbeyaka dia Jehowa aki l’ekambi wa kɔlamelo la nkɛtɛ lo nshi shɔ. Shɛmɛ aki ɔmɔtshi l’atei awɔ. Kaanga mbakinde komonga ɔna l’enondo l’ana asato waki Nɔa, mbala efula nde mbadimolawɔ ntondo. Ekɔ ngasɔ nɛ dia Shɛmɛ aki la mbetawɔ k’efula. * Yema tshitshɛ l’ɔkɔngɔ wa Mvula k’elola, Nɔa akelɛ Jehowa ate: ‘Nzambi ka Shɛmɛ.’ (Etat. 9:26) Shɛmɛ akalɛmiyaka Jehowa ndo ɔtɛmwɛlɔ wa pudipudi.

⁵ Onde Abrahama akeyaka Shɛmɛ? Mbeyaka monga ngasɔ. Tokanyiya yema nshi yaki Abrahama dikɛnda. Nde aki l’ɔngɛnɔngɛnɔ efula dia mbeya dia nde aki la tshɛnde kɛmɔtshi kakasɛnɛ ɛnɔnyi ndekana nkama nyɛi! Shɛmɛ akɛnyi akambo wa kɔlɔ wakasalemaka la ntondo ka Mvula k’elola ka woke kakɛdia nkɛtɛ. Nde akɛnyi wedja wa ntondo wakatɔngɔ etena kakafule anto la nkɛtɛ ndo nshi ya kɔlɔ yakatɔmbɔkɔ Nimirɔdɛ la Babɛlɛ. Shɛmɛ kondjela lokolo la wanɛ wakatɔmbɔkwɛ Jehowa, ɔnkɔnɛ, lam’akafukutanya Jehowa ɔtɛkɛta wa wanɛ wakakaka osomba wa Babɛlɛ, Shɛmɛ la nkumbo kande wakatetemala ntɛkɛta ɔtɛkɛta wakatɛkɛtaka anto ntondo, mbuta ate ɔtɛkɛta wakatɛkɛtaka Nɔa. Lo nkumbo kɛsɔ mbaki ndo Abrahama. Lo mɛtɛ, Abrahama akɔsaka Shɛmɛ la nɛmɔ di’efula. Kɛnɛ koleki ele, Shɛmɛ akatshikala la lɔsɛnɔ l’etena k’otale kaki Abrahama la lɔsɛnɔ. Mbokɛmaka di’Abrahama akeke akambo efula wendana la Jehowa oma le Shɛmɛ.

6. a) Ngande wakɛnya Abrahama dia nde akakondja wetshelo oma lo Mvula k’elola? b) Woho akɔna wa lɔsɛnɔ laki la Abrahama nde la Sara?

⁶ L’akambo tshɛ, Abrahama akakondja wetshelo oma lo Mvula k’elola. Nde akasale la wolo dia nkɛndakɛnda la Nzambi oko wakasale Nɔa. Diakɔ diakinde kondjasha l’ɔtɛmwɛlɔ wa dikishi oko wakayashaka ase Ura, mbidja ndo nkumbo kande ka kasuke. Nde akayotshukaka womoto l’oshika. Nde akatshuke Sara lakatshikitana la wamato akina, aha tsho oma l’olangala ande, koko ndo l’ɔtɛ wa mbetawɔ k’efula kaki la nde le Jehowa. * Aha la taamu, kaanga mbakiwɔ  kombota, atshukanyi asɔ waki l’ɔngɛnɔngɛnɔ efula lo kambɛ Jehowa kaamɛ. Vɔ wakayɔsaka Lɔta l’ɔnaki ɔnango Abrahama oko ɔnawɔ.

7. Ngande wahomba ambeki waki Yeso mbokoya Abrahama?

⁷ Ndooko lushi lakashisha Abrahama kɔlamelo yande le Jehowa lo ndjasha l’ɔtɛmwɛlɔ wa dikishi wakakokanɛ la Ura. Nde la Sara waketawɔ dia ndjatshikitanya l’anto akina wakaadinge. Dia sho ndjala la mbetawɔ ka mɛtɛ, sho pombaka nkɛnɛmɔla dionga diakɔ diamɛ. Yeso akate dia ambeki ande ‘hawotonga anto wa l’andja ɔnɛ’ ndo ɔnɛ as’andja ɔnɛ wayowahetsha l’ɔtɛ wa dikambo sɔ. (Adia Joani 15:19.) Naka wɛ ambokaka kandji katongaka l’onto naka ase nkumbo kande wambɔsɛka l’ɔtɛ wa yɛdikɔ yambondɔsa ya kambɛ Jehowa, kete aha wɛ oto mbambokaka kandji kɛsɔ. Wɛ ekɔ l’okongamelo wa dimɛna wakɛndakɛnda kaamɛ la Nzambi oko wakasale Abrahama nde la Sara.

8, 9. a) Kakɔna kakakomɛ Abrahama kakinde kokoka mbohɛ? b) Losango lakɔna lakewoya Jehowa Abrahama?

⁸ Lushi lɔmɔtshi, Abrahama akahomana la dikambo dimɔtshi diakinde kokoka mbohɛ. Nde akalongola losango lɔmɔtshi oma le Jehowa Nzambi! Bible hatolembetshiya akambo efula lo woho wakandalongola losango lɔsɔ, koko tɔ mbutaka dia ‘lotombo laki Nzambi’ lakɛnɛ le pami ka kɔlamelo kɛsɔ. (Adia Etsha 7:2, 3.) Ondo oma lo tshimbo y’ondjelo mbakalongola Abrahama yema ya lotombo laki Nkum’Olongo. Sho kokaka tsho nkanyiya ɔngɛnɔngɛnɔ waki l’Abrahama dia mɛna otshikitanu waki lam’asa Nzambi kasɛna la dikishi diaha la lomu diakatɛmɔlaka anto wa lo nshi yande.

⁹ Losango lakɔna lakewoya Jehowa Abrahama? Nde akawotɛ ate: “Umo uma lu kete yaye, uma l’atei w’asikaye, utshu lu kete yayumukenya.” Jehowa kombutɛ Abrahama nkɛtɛ yakɔna yakandalange mbotoma, koko nde akawotɛ dia nde ayowɛnya. Kele ntondotondo, Abrahama akahombe tokotshika nkɛtɛ yande ndo ewotɔ ande. Lo ndjela mbekelo ya lo Moyen-Orient k’edjedja, nkumbo kakɔsamaka la nɛmɔ di’efula. Ntshika ewotɔ ko ntshɔ dihole dikina, akɔsamaka mbala efula oko dui dioleki tshɛ kɔlɔ. Le anto amɔtshi, diɔ diakalekaka nyɔi kɔlɔ!

10. Lande na kele komonga dui dia tshitshɛ di’Abrahama la Sara ntshika nkɛtɛ yawɔ?

¹⁰ Komonga dui dia tshitshɛ le Abrahama dia ntshika nkɛtɛ yande. Ura aki mɛtɛ osomba wakasalemaka awui efula ndo w’ɔngɔnyi. (Enda kiombo yele l’ɔtɛ a dui ɔnɛ:  “Osomba wakatshike Abrahama nde la Sara.”) Emindo wakawashola wakɛnya dia mvudu y’amɛna efula yaki l’osomba w’edjedja wa Ura. Mɔtshi l’atei ayɔ yaki la toshambrɛ dikumi l’ahende kana ndekana dikambo di’ase nkumbo ndo di’ase olimu. Ndo sɛkɛ dia l’etei ka lokombo diaki la sima to. Mvudu  y’anto tshɛ yaki la ɛlɔnda w’ashi, dihole dia mbɔka kana ahole wa solaka anya ndo nkombo y’amɛna. Tohɔ nto dia Abrahama la Sara komonga akɛnda. Abrahama aki ondo l’ɛnɔnyi 70 l’ɛmɔtshi ndo Sara ɛnɔnyi 60 l’ɛmɔtshi. Abrahama akakombolaka dia Sara monga la lɔsɛnɔ la dimɛna, koko lele la wɛdimo lalanga omi tshɛ dia wadɛnde monga la lɔ. Tokanyiya yema kɛnɛ kakawasawolaka lo kɛnɛ kendana la dihole diakaatome Jehowa, ambola wakaayɛka lo wɔɔngɔ ndo ekiyanu wakawakoke monga la wɔ. Abrahama akahombe monga l’ɔngɛnɔngɛnɔ etena kaketawɔ Sara ekakatanu ɛsɔ. L’ɛnyɛlɔ kande, Sara aketawɔ ntshika lɔsɛnɔ la dimɛna la la Ura.

11, 12. a) Ɛlɔngɔswɛlɔ ndo tɛdikɔ takɔna takahombe Abrahama la nkumbo kande mbɔsa la ntondo ka vɔ ntshika Ura? b) Akokaso mbuta lo kɛnɛ kendana la lushi lakawonɛ?

¹¹ Abrahama la Sara waki l’awui efula wa nsala lo menda yɛdikɔ yakawɔshi. Vɔ wakahombe nɔnga diangɔ ndo nɔngɔsɔla lɔkɛndɔ lakawahombe munda. Diangɔ diakɔna diakawahombe mbɔsa dia ntshɔ la diɔ ndo diakɔna diakawahombe ntshika na? Koko kɛnɛ kakaleke ohomba ele anto wakasɛnaka la wɔ. Akawahombe nsala la Tɛra laki aya osombe na? Vɔ wakɔshi yɛdikɔ ya ntshɔ la nde ndo mbokokɛ l’edja tshɛ ka lɔkɛndɔ lawɔ. Lam’ele ɔkɔndɔ totɛka dia Tɛra akatombe la nkumbo kande oma l’osomba wa Ura, dui sɔ tokiyaka dia nde aketawɔ dia ntshɔ la wɔ. Aha la taamu, nde akayotshikaka ɔtɛmwɛlɔ wa dikishi. Ndo Lɔta mbakatshu kaamɛ la Abrahama.—Etat. 11:31.

¹² L’ekomelo, lushi lakawahombe monɛ lakakoke. Tɔshi dia tekɔ lo mɛna lemba l’anto lambotshumanyema la diangɔ tshɛ l’andja w’osomba wa Ura. Kamɛlɔ ndo mponda yakakelekama, dongalonga diakatshumanyema, nkumbo ndo as’olimu wakemala l’ahole awɔ ndo wakalomɔlomɔka dia munda lɔkɛndɔ lɔsɔ. * Ondo vɔ tshɛ wakendaka Abrahama, wakongɛ dia nde mbatɛ ɔnɛ aya sho monɛka. Etena kakakoke, ko vɔ wakonɛ, wakatshike Ura lo pondjo.

13. Ngande wakɛnɛmɔla ekambi waki Jehowa efula woho wa dionga diaki la Abrahama nde la Sara ɛlɔ kɛnɛ?

¹³ Ɛlɔ kɛnɛ, ekambi waki Jehowa efula mbɔsaka yɛdikɔ ya ntshɔ lɛnɛ ele ohomba efula w’apandjudi wa Diolelo. Akina mbɔsaka yɛdikɔ ya mbeka ɔtɛkɛta okina l’oyango wa mpamia olimu awɔ. Kana mpemba dia nkamba la toho tɔmɔtshi t’esambishelo tele vɔ watakambaka la tɔ. Tɛdikɔ tɔsɔ tshɛ nɔmbaka di’onto monga la yimba ya ndjahombia, mbuta ate mbetawɔ ndjahombia diangɔ dimɔtshi dia l’emunyi. Mongaka dui dia dimɛna efula etena kakɛnɛmɔla ekambi waki Jehowa dionga sɔ lo mbokoya ɛnyɛlɔ kaki Abrahama la Sara. Naka tekɔ la mbetawɔ ka ngasɔ, kete tonge l’eshikikelo ɔnɛ Jehowa  ayotoshaka nshi tshɛ kɛnɛ koleki kɛnɛ kawoshaso. Nde futaka mbala tshɛ wanɛ wele la mbetawɔ. (Hɛb. 6:10; 11:6) Onde nde akafute Abrahama?

14, 15. Lɔkɛndɔ l’oma la Ura otsha la Harana laki ngande ndo lande na kakɔshi Abrahama yɛdikɔ ya vɔ mpanga la Harana lo tshanda mɔtshi?

¹⁴ Amindji wa lɔkɛndɔ asɔ wakatatɛ mbekɛ yema yema lɔkɛndɔ lawɔ. Tonge oko anto wɛna woho wakongaka Abrahama la Sara ele vɔ mbahema lo mponda, ele nkɛndakɛnda l’ekolo ndo woho wakasɔhanaka londjo l’asawo awɔ la nkindo ya waa nyama. Yema yema, amindji wa lɔkɛndɔ waki komonga la diewo di’efula l’awui wa lɔkɛndɔ wakayokomaka tomanyi lo mbika apɛma ndo mbikola apɛma naka etena kambokoka ndo nkimanyiya Tɛra laki aya osombe dia nde ndjaoka dimɛna laadiko wa kamɛlɔ kana mponda kakandahema. Vɔ wakɛlɛ otsha lo lɛkɛ la nɔrdɛ-owɛstɛ, ko wakatenyanya ɔkɛdi wa Eyufarata. Vɔ wakakɔlamɛ la lɔkɛndɔ lawɔ.

¹⁵ L’ekomelo, l’ɔkɔngɔ wa vɔ nsala kilɔmɛtrɛ oko 960, vɔ wakakome la totombotombo tele oko dikutshu dia la Harana, osomba w’ɔngɔnyi wa l’asanga w’etadimbo w’oma la ɛstɛ la owɛstɛ. Laawɔ mbakawemala ndo mbakawahange lo tshanda mɔtshi. Ondo Tɛra komonga nto la wolo wa ntetemala la lɔkɛndɔ.

16, 17. a) Sheke yakɔna yakasha Abrahama ɔngɛnɔngɛnɔ? b) Jehowa ngande wakandatshɔkɔla Abrahama lo nshi yakandadjasɛ la Harana?

 ¹⁶ L’edjedja ka wonya, Tɛra akayovɔka ele l’ɛnɔnyi 205. (Etat. 11:32) Abrahama akakeketshama efula l’etena kakandavusha she, nɛ dia Jehowa akasawola la nde nto. Nde akawotɛ paka kɛnɛ kakandawotɛ la Ura, koko nde akokotshɛ alaka akina. Abrahama akakome ‘wodja wa woke,’ ndo nkumbo tshɛ ya la nkɛtɛ yakahombe nkondja ɛtshɔkɔ oma lo tshimbo yande. (Adia Etatelu 12:2, 3.) Ɔngɛnɔngɛnɔ waki la Abrahama l’ɔtɛ wa sheke yaki lam’asande la Nzambi akootshutshuya dia ntetemala la lɔkɛndɔ lande.

¹⁷ Mbala kɛnɛ, Abrahama akaleke monga la diangɔ efula dia nɔnga nɛ dia Jehowa akɔɔtshɔkɔla lo nshi yakandahange la Harana. Ɔkɔndɔ tɛkɛtaka dia “diango tshe diaki la wo, ndu ekambi wakawa[kondja] la Harana.” (Etat. 12:5) Dia nkoma tshondo ya wodja, Abrahama akahombe monga la lomombo la l’emunyi ndo la ekambi, mbuta ate nkumbo ka woke. Aha mbala tshɛ mbangɔnya Jehowa ekambi ande, koko nde mbashaka kɛnɛ tshɛ kewɔ l’ohomba dia nkotsha lolango lande. Ɔnkɔnɛ, oko wakandakeketshama, Abrahama akatetemala la lɔkɛndɔ lande otsha lo dihole diakinde kombeyaka.

18. a) Lushi lakɔna lakaleke ohomba le Abrahama l’ɔkɔndɔ wendana la kɛnɛ kasalɛ Nzambi ekambi ande? b) Naa awui akina w’ohomba wakasalema lo Nisana 14 l’ɛnɔnyi wakayele? (Enda kiombo yele l’ɔtɛ a dui ɔnɛ: “Datɛ di’ohomba efula dia l’ɔkɔndɔ wa Bible.”)

¹⁸ Abrahama la lemba lande l’anto wakasale nshi efula oma la Harana polo la Eyufarata. Lo lushi la 14 la ngɔndɔ kakayelamɛka l’ɔkɔngɔ ɔnɛ Nisana, l’ɔnɔnyi 1943 N.T.D., mbakatenyanya Abrahama la lemba lande l’anto ɔkɛdi wa Eyufarata. Ɔsɔ aki lushi lakaleke ohomba le Abrahama l’ɔkɔndɔ wa kɛnɛ kasalɛ Nzambi ekambi Ande. (Etum. 12:40-43) Otsha lo sidɛ mbaki nkɛtɛ yakalake Jehowa dia mɛnya Abrahama. Lushi lɔsɔ mbakatatɛ nkamba sheke yakadje Nzambi nde l’Abrahama olimu.

19. Daka diakalake Jehowa Abrahama diakendanaka la na? Ndo diɔ diakohola Abrahama dui diakɔna?

¹⁹ Etena kakatshu Abrahama otsha lo lɛkɛ la sidɛ, lemba l’anto lakatatshɔka la nde lakemala l’etamba wa weke wa la Mɔre, suke la Shikɛmɛ. Lɛkɔ, Jehowa akatɛkɛta nto l’Abrahama. Daka diaki Nzambi dia mbala  kɛnɛ diakendanaka la kanula, kana ɔna lakahombe ndjokita nkɛtɛ shɔ. Onde Abrahama akohɔ prɔfɛsiya kakate Jehowa l’Ɛdɛna kendana la ‘kanula,’ yakahombe ndjotshungola anto lushi lɔmɔtshi? (Etat. 3:15; 12:7) Ondo ngasɔ. Koko ondo nde akatatɛ nshihodia dia Jehowa aki la sangwelo dimɔtshi dia woke diakendanaka la nde.

20. Ngande wakɛnya Abrahama lowando lande lo diɛsɛ diakawosha Jehowa?

²⁰ Abrahama aki la lowando efula lo diɛsɛ diakawosha Jehowa. Aha la taamu, lam’akatononɔka Abrahama la ngelo, nɛ dia laasɔ ko ase Kanana watadjasɛ l’ɛtshi ka nkɛtɛ kɛsɔ, Abrahama akakɛ Jehowa ahole w’elambwelo, ntondotondo suke l’etamba wa weke wa la Mɔre, oma laasɔ ko suke la Bɛtɛlɛ. Nde akelɛ elambwelo kɛmɔtshi lokombo la Jehowa, lo mɛnya lowando lande le Nzambi lo nkanyiya woho wayonga nkumbo kande lo nshi yayaye. Ondo nde akasambisha asukanyi ande w’ase Kanana. (Adia Etatelu 12:7, 8.) Lo mɛtɛ, ekakatanu efula wa weke wakakongɛka Abrahama lo lɔsɛnɔ lande. Koko, Abrahama kokaloya washo ande l’ɔkɔngɔ, lo nkanyiya lɔsɛnɔ la dimɛna lakandatshike la Ura. Nde akake washo lo kɛnɛ kaki la ntondo kande. Hɛbɛru 11:10 mbutaka ɔnɛ: “Nde akakongaka osomba wele la dihikamelo di’eshika, osomba wele Nzambi kakakongɛ ndo kakahike.”

21. Akokaso mbuta lo kɛnɛ kendana la ewo kele la so lo dikambo dia Diolelo diaki Nzambi lo mbɛdika la kɛnɛ kaki la Abrahama, ndo kakɔna kambotoyashikikɛ dia nsala?

²¹ Sho wanɛ wakambɛ Jehowa ɛlɔ kɛnɛ mbeyaka awui efula wendana l’osomba wa didjidji ɔsɔ, mbuta ate Diolelo diaki Nzambi, oleki Abrahama. Sho mbeyaka dia Diolelo diaki Nzambi diekɔ lo mbolɛ l’olongo ndo diaya suke la ndanya dikongɛ nɛ di’akambo. Ndo sho mbeyaka dia Kanula yaki Abrahama yakalakema deko aha nɛ, mbuta ate Yeso Kristo ekɔ lo mbolɛ kakianɛ lo Diolelo sɔ. Ande diɛsɛ diayonga la so dia ndjɛna Abrahama lam’ayondolwama lee! L’etena kɛsɔ, Abrahama ayoyoshihodia dimɛna woho wakakotshama sangwelo diaki Jehowa. Onde wɛ hangɛnangɛna dia mɛna woho wayokotsha Jehowa alaka ande tshɛ? Naka wɛ ngɛnangɛnaka, kete tetemala nsala kɛnɛ kakasale Abrahama. Onga la yimba ya ndjahombia, l’okitanyiya ndo la lowando lo waɛsɛ wambokosha Jehowa. Naka wɛ mbokoya mbetawɔ kaki Abrahama, “she anto tshɛ wele la mbetawɔ,” kete nde ayokoma shɔ.