¿Kʼo nawi juna qʼiij kakʼis ri kʼax?
Kabʼij ri at...
-
... kakʼis na?
-
... na kakʼis taj?
-
... na wetaʼam taj?
RI KUBʼIJ RI BIBLIA
«Dios kusuʼ ruwaʼal kiwach konoje rike. Chwi kʼu woʼora na jinta chi kamik, na jinta chi oqʼej, na jinta chi kejuyuyik y na jinta chi kʼaxkʼobʼik.» (Apocalipsis [Revelación] 21:4, Nuevo Testamento en Rabinal Achí.)
SAʼ UʼANIK KOJUTOʼO KAQETAMAJ
Kukubʼsaj qakʼux ke na e ta ri Dios kaʼanow ri kʼax kaqakʼulumaj (Santiago 1:13).
Kukubʼsaj qakʼux ke Ri Dios kunaʼ ri kʼax kaqanaʼ (Zacarías 2:8).
Kojutoʼo kaqetamaj ke chi qawach panoq jinta chik kʼax (Salmo 37:9-11).
¿UTZ KAQAKOJO RI KUBʼIJ RI BIBLIA?
Utz. Qilaʼ kebʼ kʼutubʼal:
-
Dios tzel karil ri kʼax. Ojeer xkiʼan kʼax che ri utinamit ri Jehová, ¿saʼ, o wach, xunaʼ ri re? Ri Biblia kubʼij ke ri re lik xbʼisonik ruma xkiʼan kʼax chike (Jueces 2:18).
Dios tzel karil ri winaq ri kakiʼan kʼax chike jujuun chik. Ri Biblia kubʼij ri Dios tzel karil ri kekikamisaj winaq jinta kimaak (Proverbios 6:16, 17).
-
Dios kojraj chi qajujunal. E kʼo winaq kakichʼobʼo ke ni junoq kuna ri kʼax kakinaʼo, pero na je ta laʼ. Ri Biblia kubʼij ke Jehová utz qachajixik kuʼano (1 Pedro 5:7).
Ruukʼ ri Utaqaneel o Qʼatbʼal Tziij, ri Dios xa naqaj chik kuresaj ronoje ri kʼax kaqanaʼ chi qajujunal (Mateo 6:9, 10). Woʼora kukubʼsaj kikʼux konoje ri winaq kakitzukuj ruukʼ ronoje ri kanimaʼ (Hechos 17:27; 2 Corintios 1:3, 4).
CHʼOBʼO PE
¿Suʼchak ri Dios uyaʼoom luwar che kʼo kʼax?
Kariq ri kʼulubʼal uwach pa ROMANOS 5:12 y 2 PEDRO 3:9.
You May Also Like
SPECIAL CAMPAIGN
Video: ¿Suʼ chak kaqetamaj ri Biblia?
Kʼiyaal taq winaq re ronoje ri Uwachulew kiriqom chupa ri Biblia ri kʼulubʼal uwach ri tzʼonobʼenik re ri kʼaslemaal. ¿Kawaj kawetamaj?
