‘Nyamuhanga asyasangulha emisonia yosi oko meso wabo, kandi olhuholho silhwendi syasabyaho, erisusumana, eririra, kutse eriaghalhwa.’​—Eribisulirwa 21:​3, 4, e Biblia eye Kinandi eya 1980.

Kikaleka ithwakakasya ngoku Nyamuhanga yuthethulethera ebitsibu.​—Yakobo 1:13.

Thukahumulikana thukaminya ngoku Nyamuhanga syalitsema thukaghalhwa.​—Zekaria 2:⁠8.

Thukabya n’amaha indi eriaghalhwa likendi syahwaho.​—Esyonyimbo 37:​9-11.

Ee, habw’esyonzumwa ng’ibiri:

• Nyamuhanga akapona eriaghalhwa n’erinubibwa ly’abandu. Thalengekania ngoku Yehova Nyamuhanga ayowa omughulhu abandu biwe omwa buthuku bwakera banubibawa. E Biblia yikabugha yithi abandu babere ‘bakaghalyabo,’ mwapona.​—Abatsweri 2:⁠18.

  Nyamuhanga akaghanira ighuma abakaghalhaya abandi. Ng’eky’erileberyako, e Biblia yikabugha yithi ‘ebyalha ebikutha omusasi owathe ko lhubanza’ ninye okw’iyo.​—Emisyo 6:​16, 17.

• Nyamuhanga akatsomana omundu ng’omundu. Yehova akathubwira athi thumughusire erihangya-hangya lyethu lyosi ‘kusangwa akathutheghaya.’​—1 Petero 5:7.

  Yehova akisiya iniakolesya Obwami bwiwe erighunzaho eriaghalhwa ly’obuli mundu. (Matayo 6:​9, 10) Ekyo kithe kyabya, anemuhumulikania abakamusonda-sonda omwa kwenene.​—Emibiri 17:27; 2 Abanya Korinto 1:3, 4.