“Mulungu . . . an’dzapukuta misozi yentse m’maso mwawo, ndipo infa in’dzawoneka lini pomwe. Pan’dzawoneka lini pomwe kusunama, kulira ne kuwawidwa.”—Apokalipse 21:3, 4

Bzin’dzakutsimikizani kuti Mulungu ambacitisa lini mabvuto yathu.​—Tiyago 1:13.

Bzin’dzakutsangalazani pakudziwa kuti Mulungu ambazindikira kubonera kwathu.​—Zakariya 2:8.

Bzin’dzakupasani cidikhiro cakuti kubonera kwentse kun’dzamala.​—Salimo 37:9-11.

Inde, pa mathangwe mawiri:

• Mulungu ambawenga kubonera na kusaya cirungamo. Onani momwe Yahova Mulungu adabvera pomwe wanthu wace m’nthawe zakale-kale wakhaboneresedwa mwadzawoneni. Bibliya limbalewa kuti Mulungu akhabva ntsisi thangwe ra ‘wale womwe wakhambawagwinyagwinya.’​—Wayeruzi 2:18

  Mulungu ambawengeratu wale womwe wambapweteka wanzawo. Mwa ciratizo, Bibliya limbalewa kuti iye ‘ambanyantsidwa na manja yakuthamangira kucosa mulopa wa anyakusaya mulandu.’​—Mimwani 6:16, 17.

• Mulungu ambatikumbukira m’bodzi na m’bodzi pa tekha. Sikuti munthu ali-wentse pa yekha ‘ambadziwa bza tsoka na kuwawidwa kwace,’ koma Yahova caiyeyo ambadziwambo!​—2 Nkhani 6:29, 30.

  Na umambo bwace, tsapanopapa Yahova an’dzamalisa kubonera kwa munthu m’bodzi na m’bodzi pa yekha. (Mateu 6:9, 10) Tsono pakali pano, iye ambatsangalaza wale womwe wambamulinga na mtima wadidi.​—Mabasa 17:27; 2 Akolinto 1:3, 4.