«Reʼ Dios [...] naa rujuxwiik reh chuʼnchel i riis naqʼ kiwach. Eh maʼ naa ta chik rilariik wach i kimik, ni xata oqʼik, ni xata tiʼkiil kʼuxliis» (Apocalipsis [Revelación] 21:3, 4, Santo Laj Huuj, Sociedad Bíblica de Guatemala).

Naqehtʼaliim chi korik chi maʼ reʼ taj rumahk i Dios chi wilik i tiʼ kʼaxik (Santiago 1:13).

Iruchʼikaʼ qakʼux rehtʼeljik chi reʼ Dios irikʼraaj i qatiʼkiil (Zacarías 2:8).

Qehtʼal chi maʼ na ta chik ruwihʼik tiʼkiil kʼuxliis (Salmo 37:9-11).

Hooʼ, qil kiʼibʼ ehtalil:

• Reʼ Dios iruxowaaj wach i kʼaxkilaal. ¿Nikʼwach xikʼraaj riibʼ i Jehová noq xkiʼan i tiʼ kʼaxik reh i rutinamit najtir qʼiij? Reʼ Santo Laj Huuj iruqʼor chi tiʼ xikʼraaj noq rilow «chi kʼahchiʼ naq kikʼik chi tiʼ kʼaxik eh intibʼik kikʼux» kuum taqeh tokoom tinamit (Jueces 2:18).

  Reʼ Dios maʼ inponik ta chuwach taqeh i kibʼanik i tiʼ reh i tokoom kʼachareel. Jeʼ rukabʼ i ehtalil wilih, reʼ Santo Laj Huuj iruqʼor chi iruxowaaj kiwach taqeh aj kansaneel (Proverbios 6:16, 17).

• Reʼ Dios iraaj kiwach i juʼjun chi kʼachareel. Reʼ taqeh kʼachareel inkikapaaj chi xa reʼ keh inkehtʼaliij i kikʼaxkilaal kiikʼik wiiʼ. Reʼ laʼ i Jehová rehtʼal i kʼahchiʼ kiikʼik wiiʼ (2 Crónicas 6:29, 30).

  Kʼisiin chik iraaj chi reʼ runimal Rajaawriik i Dios narisam i kikʼaxkilaal i juʼjun chi kʼachareel (Mateo 6:9, 10). Pan qaqʼijil, reʼ Dios iruchʼikaaʼ i kikʼux chuʼnchel i kisikʼwik reh (Hechos 17:27; 2 Corintios 1:3, 4).