Ọmwa rhọkpa he ta ẹmwẹ ẹkhokho ma ruẹ ẹdẹ ra?— * E Baibol guan kan ẹmwẹ ẹkhokho ne kpataki na tiẹre ‘emwi ẹkhokho nọ huanrẹn.’ Ọ keghi re emwi nọ huanrẹn rhunmwuda obọ Osanobua ẹre ọ ke rre. Kevbe wẹẹ, a vbe tiẹre emwi ẹkhokho rhunmwuda emwa nibun ma rẹn vbekpa re. Uhiẹn avbe odibo vbe gha hoo niran rẹn sayọ vbekpa re. U hoo nu rẹn emwi ne emwi ẹkhokho na khin ra?—

Vbe ẹghẹ nọ kakabọ kpẹ fua nọ gberra, Osanobua keghi yi okpia kevbe okhuo nokaro. Eni ọghe iran ke gha re Adam kevbe Ivi. Osanobua keghi bọ owa ne mose ne iran, na ghaa tiẹre ogba ọghe Idẹn. Akpawẹ te Adam kevbe Ivi họn ẹmwẹ ne Osanobua, iran kevbe emọ ne iran biẹlẹ gha te ye uhun otagbọn hia khian e paradais vbene ogba nii ghaa ye. Kevbe wẹẹ, iran gha te gha rrọọ vbe Paradais vbe etẹbit. Sokpan u yerre emwi ne Adam kevbe Ivi ru ra?—

Adam kevbe Ivi keghi he ẹmwẹ ye Osanobua obọ, ọni ẹre ọ siẹre ne ima i na rrọọ vbe paradais vbe ẹdẹnẹrẹ. Sokpan Osanobua khare wẹẹ, irẹn gha ye otagbọn hia khian nọ mose, kevbe emwa hia gha rrọọ vbe etẹbitẹ vbuwe oghọghọ. De vbene irẹn khian ya ru ọna hẹ? Vbe ẹghẹ nọ kpẹre gha dee, emwa ma rẹn. Ọ kegha re emwi ẹkhokho.

Vbe Jesu ghi sẹ agbọn, ọ ma emwa emwi vbekpae emwi ẹkhokho na. Ọ khare wẹẹ, ọ dekaẹn arriọba ọghe Osanobua. Jesu tama emwa ne iran na erhunmwu ne arriọba na rre. Ọ gha ye agbọn na khian e paradais ne mose.

Ọ sẹ ruẹ ọyẹnmwẹ nu rẹn vbekpae emwi ẹkhokho na ra?— Yerre wẹẹ, emwa ni họn ẹmwẹ ne Jehova ọkpa, ẹre ọ khian gha rrọọ vbe Paradais. E Baibol tama ima okha nibun ọghe ikpia kevbe ikhuo ni họn ẹmwẹ ne Jehova. U hoo nu ruẹ vbekpae iran ra?— Gima ruẹ vbekpae iran eso kevbe vbene ima khian ya yegbe ta iran hẹ.