Kọ ohwo jọ ọ ta ẹme jọ kẹ owhẹ no ẹdẹjọ, jẹ vuẹ owhẹ nọ whọ ta kẹ ohwo ọvo ho?— * Ebaibol na ọ ta kpahe oware uwoma jọ nọ a se “oware udidi oghaghae.” A se rie oware oghaghae keme obọ Ọghẹnẹ u no ze. Yọ a se rie oware udidi keme ahwo a riẹ kpahe iẹe he. Makọ ijẹle dede a gwọlọ riẹ oware nana ziezi. Kọ whọ gwọlọ riẹ oware udidi nana?—

Ikpe buobu nọ i kpemu, Ọghẹnẹ ọ ma ọzae gbe aye jọ. Edẹ rai họ Adamu avọ Ivi. Ọghẹnẹ o fi rai họ emamọ oria jọ nọ a se ọgbọ Idẹn. O hae jọnọ Adamu avọ Ivi a yoẹme kẹ Ọghẹnẹ, te ae te emọ rai, a hai ti zihe otọakpọ nana soso ruọ aparadase. Yọ a hae te rria etẹe bẹdẹ bẹdẹ. Kọ whọ kareghẹhọ oware nọ Adamu avọ Ivi a ru?—

Aimava na a yoẹme kẹ Ọghẹnẹ hẹ, fiki oye ma gbẹ rrọ aparadase nẹnẹ hẹ na. Rekọ Ọghẹnẹ ọ ta nọ ọ te wariẹ ru otọakpọ na soso wowoma nọ ahwo a te rria bẹdẹ bẹdẹ avọ evawere. Kọ whọ riẹ oghẹrẹ nọ Ọghẹnẹ o ti ro ru onana? Ahwo a riẹ vievie he evaọ ikpe buobu. O jọ oware udidi.

Okenọ Jesu ọ jọ otọakpọ, o wuhrẹ ahwo kpahe oware nana. Ọ ta nọ oware nana họ Uvie Ọghẹnẹ. Jesu ọ ta nọ ahwo a lẹ re Uvie na o ze. Uvie na u ti ru otọakpọ na soso fihọ aparadase owowoma.

Kọ eva e gbẹ be were owhẹ nọ whọ riẹ oware nana?— Kareghẹhọ nọ ahwo nọ a yoẹme kẹ Jihova ọvo a te rria Aparadase na. Ebaibol na o gbiku kpahe ezae gbe eyae buobu nọ i yoẹme kẹ Jihova. Kọ whọ gwọlọ riẹ kpahe ahwo nana?— Joma se kpahe ahwo nana jọ re ma ruẹ oghẹrẹ nọ ma sae rọ rehọ aro kele ae.