မ့ၢ်​ပှၤ​တဲဘၣ်​နၤ တၢ်​ခူသူၣ်​တဘျီဘျီ​ဧါ.— * လံာ်စီဆှံ​စံး​ဘၣ်​ပှၤ ဘၣ်ဃး​ဒီး “တၢ်​ခူသူၣ်” လီၤဆီ​တခါ လၢ​ယွၤ​အ​အိၣ်​လီၤ. မ့ၢ်​လၢ​ပှၤ​တ​သ့ၣ်ညါ တၢ်ဂ့ၢ်​အံၤ​အဃိ ပှၤ​ကိး​အီၤ​လၢ တၢ်​ခူသူၣ်​တခါ​လီၤ. မူခိၣ်​ကလူး​တဖၣ်​စ့ၢ်ကီး အဲၣ်ဒိး​ဃု​သ့ၣ်ညါ​အါထီၣ်​ဝဲ တၢ်ဂ့ၢ်​အံၤ​လီၤ. န​အဲၣ်ဒိး​သ့ၣ်ညါ တၢ်​ခူသူၣ်​အံၤဧါ.—

လၢပျၢၤ​န့ၣ်​ယွၤ​တ့လီၤ ပိာ်မုၣ်​ဒီး​ပိာ်ခွါ အဆိ​ကတၢၢ်​ခံဂၤ​လီၤ. အဝဲသ့ၣ် အ​မံၤ​မ့ၢ် စီၤ​အၤဒၣ်​ဒီး​နီၢ်​အံၣ်အု​လီၤ. ကစၢ်​ယွၤ​ပာ်​အဝဲသ့ၣ်​လၢ ဖီကရၢၢ်​ဃံလၤ​လၢ အ​မံၤ​မ့ၢ် ဧ့ၤဒ့ၣ်​တၤသၣ်​လီၢ်​အ​ပူၤ​လီၤ. စီၤ​အၤဒၣ်​ဒီး​နီၢ်​အံၣ်အု မ့ၢ်​ဒိကနၣ် ကစၢ်​ယွၤ​အ​ကလုၢ်​န့ၣ် အဝဲသ့ၣ်​ဒီး​အဖိ​အလံၤ​တဖၣ် က​မၤ​ကဲထီၣ်​ဝဲ ဟီၣ်ခိၣ်​ဒီဘ့ၣ် လၢ​ပၤရဒံစူး လၢ​က​လီၤဂာ်​ဒ် ဖီကရၢၢ်​ဃံလၤ​အံၤ​အသိး​န့ၣ်​လီၤ. အဝဲသ့ၣ်​က​အိၣ်မူဘၣ်ဝဲ​လၢ ပၤရဒံစူး​အ​ပူၤ​လီၤထူ​လီၤယိာ်​လီၤ. ဘၣ်ဆၣ်, စီၤ​အၤဒၣ်​ဒီး​နီၢ်​အံၣ်အု မၤဝဲ​တၢ်မနုၤ​လဲၣ်.—

စီၤ​အၤဒၣ်​ဒီး​နီၢ်​အံၣ်အု​တ​ဒိကနၣ် ကစၢ်​ယွၤ​အ​ကလုၢ်​အဃိ မုၢ်မဆါ​တနံၤ​အံၤ ပ​တ​အိၣ်မူ​ဘၣ်​လၢ ပၤရဒံစူး​အ​ပူၤ​ဘၣ်. ဘၣ်ဆၣ်, ကစၢ်​ယွၤ​စံး​ဝဲ​လၢ က​မၤဃံလၤ​ဟီၣ်ခိၣ်​ဒီဘ့ၣ် ဒီး​ပှၤ​ကိးဂၤ​ဒဲး က​အိၣ်မူ​ဘၣ်​လီၤထူ​လီၤယိာ်​လၢ တၢ်​သူၣ်ခု​သးခု​အ​ပူၤ​လီၤ. ကစၢ်​က​မၤဝဲ​ဒ်လဲၣ်. လၢ​တၢ်​ဆၢကတီၢ်​ဖးယံာ်​န့ၣ် ပှၤကညီ​တဖၣ် တ​သ့ၣ်ညါ​ဘၣ်​ဝဲ​ဘၣ်. တၢ်အံၤ​မ့ၢ်​တၢ်​ခူသူၣ်​တခါ​လီၤ.

ဖဲ​ယ့ၣ်ၡူး ဟဲ​လီၤ​ဆူ​ဟီၣ်ခိၣ်​ချၢ​အခါ အါတက့ၢ်​အဝဲ​သိၣ်လိ​ဝဲ ပှၤကညီ​တဖၣ်​လၢ တၢ်​ခူသူၣ်​တခါ​အံၤ​အဂ့ၢ်​လီၤ. ကစၢ်​စံး​ဝဲ​လၢ တၢ်​ခူသူၣ်​အံၤန့ၣ်​ဘၣ်ဃး​ဒီး ယွၤ​အဘီ​အမုၢ်​လီၤ. ယ့ၣ်ၡူး​မၢ​ပှၤ​ဃ့​ဘါ​ထုကဖၣ်​လၢ ဘီမုၢ်​အံၤ​က​ဟဲ​အဂီၢ်​လီၤ. ဘီမုၢ်​အံၤ​က​မၤ​ကဲထီၣ် ဟီၣ်ခိၣ်​ဒီဘ့ၣ်​လၢ ပၤရဒံစူး​ဃံလၤ​လီၤ.

န​သ့ၣ်ညါ​ဘၣ် တၢ်​ခူသူၣ်​အံၤ​အဃိ န​သးခု​ဧါ.— သ့ၣ်နီၣ်​ထီၣ်​လၢ ထဲဒၣ်​ပှၤလၢ​အ​ဒိကနၣ် ယဟိဝၤ​ယွၤ​အ​ကလုၢ်​တဖၣ် က​အိၣ်မူ​ဘၣ်​လၢ ပၤရဒံစူး​အ​ပူၤ​န့ၣ်​တက့ၢ်. လံာ်စီဆှံ​တဲဘၣ်​ပှၤ ဘၣ်ဃး​ပိာ်မုၣ်​ဒီး​ပိာ်ခွါ​အါဂၤ​လၢ အ​ဒိကနၣ်​ယဟိဝၤ​ယွၤ အ​ကလုၢ်​န့ၣ်​လီၤ. မ့ၢ်​န​အဲၣ်ဒိး​သ့ၣ်ညါ အဝဲသ့ၣ်​အဂ့ၢ်​ဧါ.— ပ​ကကွၢ်​သကိး အဝဲသ့ၣ်​တနီၤ​အဂ့ၢ် ဒီး​ပ​မၤ​ဒ်သိး​ဒီး အဝဲသ့ၣ်​က​သ့​ဒ်လဲၣ်​န့ၣ်​တက့ၢ်.